დღე: მარტი 22, 2025

სლოვაკეთის რამდენიმე ქალაქში ათასობით მოქალაქე რობერტ ფიცოს მთავრობის პოლიტიკის წინააღმდეგ გამოვიდა. აქციის ორგანიზატორების თქმით, რობერტ ფიცოს მთავრობა საფრთხეს უქმნის სლოვაკეთის მომავალს დემოკრატიულ და თავისუფალ ევროპაში. რობერტ ფიცოს გადადგომის მოთხოვნით, ბოლო სამი თვის განმავლობაში, ათასობით ადამიანი ბრატისლავასა და სხვა ქალაქებში აქციებს მართავს. პროტესტი 2024 წლის დეკემბრის ბოლოს, მას შემდეგ დაიწყო, რაც სლოვაკეთის პრემიერ-მინისტრი მოსკოვში რუსეთის პრეზიდენტთან, ვლადიმერ პუტინთან მოლაპარაკებების გასამართად გაემგზავრა.

თურქეთის შინაგან საქმეთა სამინისტროში აცხადებენ, რომ ღამის განმავლობაში ქვეყნის ათობით ქალაქში საპროტესტო აქციებზე 343 ადამიანი დააკავეს. მედიის ცნობით, აქციები გაიმართა სტამბოლში, ანკარაში, იზმირში, ადანაში, ანტალიაში, კონიაში და სხვა ქალაქებში. „არ იქნება არანაირი შემწყნარებლობა მათ მიმართ, ვინც საზოგადოებრივ წესრიგს არღვევს“, – განაცხადა თურქეთის შინაგან საქმეთა მინისტრმა, ალი იერლიკაიამ.

უკრაინის პრეზიდენტი ვოლოდიმირ ზელენსკი დონეცკის ოლქში იმყოფებოდა. მან „პოკროვსკის“ ტაქტიკური ჯგუფის სამეთაურო პუნქტი მოინახულა და Drone Line-ის მეთაურებს შეხვდა. „მოხსენება მოვისმინე პოკროვსკის მიმართულების დაცვის, ოპერატიული ვითარებისა და მისიების მიმდინარეობის შესახებ. მადლობა ყველას, ვინც უკრაინას ეხმარება და მხარს უჭერს“ – წერს უკრაინის პრეზიდენტი. ვოლოდიმირ ზელენსკიმ უკრაინის დამცველები სახელმწიფო ჯილდოებით დააჯილდოვა.

„ამერიკის ხმა“  აშშ-ის პრეზიდენტის დონალდ ტრამპის ადმინისტრაციას სასამართლოში უჩივის.  ჟურნალისტების განცხადებით, აშშ-ის მიერ დაფინანსებული საინფორმაციო სააგენტოების დახურვა ქვეყნის კონსტიტუციის პირველი შესწორებით გარანტირებულ სიტყვის თავისუფლებას არღვევს. „მსოფლიოს ბევრ ქვეყანაში ობიექტური ახალი ამბების კრიტიკულად მნიშვნელოვანი წყარო გაქრა და ვაკუუმს სახელმწიფოების მიერ დაფინანსებული ცენზურა გავლილი საინფორმაციო საშუალებები შეავსებენ“ – აცხადებენ „ამერიკის ხმის“ ჟურნალისტები. გასულ კვირას, აშშ-ის პრეზიდენტის, დონალდ ტრამპის აღმასრულებელი ბრძანების საფუძველზე აშშ-ის გლობალური მედიის სააგენტომ (USAGM) „რადიო თავისუფლებას“ გრანტები შეუწყვიტა და „ამერიკის ხმის“ 1300-ზე მეტი თანამშრომელი ანაზღაურებად ადმინისტრაციულ შვებულებაში გაუშვა.

აშშ ფასების შესამცირებლად თურქეთიდან და სამხრეთ კორეიდან მილიონობით კვერცხის იმპორტს გეგმავს. როგორც მედია წერს, ტრამპის ადმინისტრაციამ კვერცხის იმპორტს ამერიკელი მომხმარებლებისთვის ისტორიულად მაღალი ფასების შესამცირებლად გადაწყვიტა. „მოკლევადიან პერსპექტივაში ასობით მილიონ კვერცხზეა საუბარი“, – განაცხადა აშშ-ის სოფლის მეურნეობის მინისტრმა, ბრუკ როლინსმა თეთრ სახლში გამართულ პრესკონფერენციაზე. როლინსმა აღნიშნა, რომ მისი დეპარტამენტი ასევე აწარმოებს მოლაპარაკებებს სხვა ქვეყნებთან ახალი მიწოდების წყაროების უზრუნველსაყოფად, თუმცა არ დაუკონკრეტებია, რომელ ქვეყნებზეა საუბარი.

აშშ-ის იუსტიციის დეპარტამენტის განცხადებით, ირანელი ჟურნალისტის და აქტივისტის, მასიჰ ალინეჯადის მოსაკლავად ირანის ხელისუფლებამ ორი ადამიანი დაიქირავა. ესენი არიან 46 წლის ირანის მოქალაქე რაფატ ამიროვი და 40 წლის საქართველოს მოქალაქე პოლად ომაროვი, იგივე არაზ ალიევი. ნაფიცმამსაჯულებმა დამნაშავედ ცნეს ორივე მათგანი. აღნიშნულ საქმეზე მოსამართლე კოლინ მაკმაჰონი განაჩენს 17 სექტემბერს გამოაცხადებს. სასამართლო დოკუმენტების თანახმად, ამიროვი და ომაროვი იყვნენ აღმოსავლეთ ევროპის ორგანიზებული დანაშაულებრივი ჯგუფის მაღალი რანგის წევრები და ამ ჯგუფის სხვა წევრებთან ერთად, მასიჰ ალინეჯადის მკვლელობის მცდელობაზე „ისლამური რევოლუციის გვარდიის კორპუსის” (IRGC) მაღალი რანგის წევრების მითითებით მუშაობდნენ.

ლონდონის ჰითროუს აეროპორტმა მუშაობა სრულად განაახლა. „შეგვიძლია დავადასტუროთ, რომ ჰითროუ დღეს ღიაა და სრულად მუშაობს. აეროპორტის თანამშრომლები ყველაფერს აკეთებენ, რათა მგზავრებს, რომლებიც გუშინ ელექტრო ქვესადგურის მუშაობის შეფერხების შედეგად დაზარალდნენ, დაეხმარონ“ – განაცხადა აეროპორტის წარმომადგენელმა. შეგახსენებთ, ახლომდებარე ელექტრო ქვესადგურში გაჩენილი ხანძრის გამო გუშინ ლონდონის ჰითროუს აეროპორტმა მუშაობა შეაჩერა. ფრენების უმეტესობა გაუქმდა ან გადაიდო, ხოლო ნაწილი საღამოს განახლდა.

ახლო აღმოსავლეთში აშშ-ის პრეზიდენტის, დონალდ ტრამპის სპეციალური წარმომადგენელი სტივ უიტკოფი აცხდაბეს, რომ უკრაინაში არჩევნები ჩატარდება. მისი თქმით, შესაბამისი გადაწყვეტილება უკვე მიღებულია. „დიახ, თქვენ მართალი ხართ. იქნება. მათ შეათანხმეს ეს. უკრაინაში არჩევნები ჩატარდება. ვფიქრობ, ზელენსკი ცდილობს, ყველაფერი გააკეთოს. ის ძალიან, ძალიან რთულ მდგომარეობაშია, მაგრამ ის ბირთვული სახელმწიფოს წინააღმდეგ იბრძვის, ასევე ისეთი სახელმწიფოს წინააღმდეგ, რომელსაც მასზე ოთხჯერ მეტი მოსახლეობა ჰყავს, ამიტომ მან უნდა იცოდეს, რომ ის განადგურდება. ახლა მისთვის საუკეთესო დროა შეთანხმების დასადებად. პრეზიდენტ ტრამპს შეუძლია, მისცეს მას საუკეთესო შესაძლო გარიგება, რაც ოდესმე შეიძლება ჰქონდეს“– განაცხადა უიტკოფმა.

რუსეთის თავდაცვის უწყების განცხადებით, ქვეყნის ტერიტორიაზე 47 უკრაინული დრონი ჩამოაგდეს. უწყების ცნობით, თავდაცვის სისტემებმა 12 დრონი ვორონეჟის ოლქის თავზე ჩამოაგდეს, 11 ბელგოროდის, 7 შავი ზღვის, 6 როსტოვის ოლქის, 4 ვოლგოგრადის, 3 ასტრახანის, თითო-თითო ბრიანსკის, კურსკის, სამარას ოლქებისა და აზოვის ზღვის თავზე. „გასული ღამის განმავლობაში მორიგე საჰაერო თავდაცვის სისტემებმა 47 უკრაინული დრონი გაანადგურეს“ – განაცხადეს რუსეთის თავდაცვის სამინისტროში.

უნგრეთის პარლამენტმა ექვს ოპოზიციონერს საკანონმდებლო ორგანოში შესვლა მას შემდეგ აუკრძალა, რაც  შეეცადნენ, ჩაეშალათ კანონის მიღების პროცესი, რომელიც ლგბტქ+ საზოგადოებას ყოველწლიური პრაიდ-მარშის ჩატარებას უკრძალავს. ოპოზიციონერმა დეპუტატებმა სესიაზე ფერადი კვამლის ყუმბარები გაუშვეს. შედეგად, სამ დეპუტატს პარლამენტში ორი თვის ვადით შესვლა აეკრძალათ და ჯარიმის სახით, ხელფასი ექვსი თვის ვადით დაუყოვნდებათ. კიდევ სამ დეპუტატს კი, პარლამენტში შესვლა ერთი თვის ვადით შეეზღუდათ, ხელფასს კი ოთხი თვით დაუკავებენ. საერთო ჯამში, ჯარიმა 80 მილიონ უნგრულ ფორინტს, დაახლოებით 200 000 ევროს შეადგენს და ყველაზე დიდ ჯარიმას წარმოადგენს, რომელიც დეპუტატებისთვის ოდესმე დაუკისრებიათ.

სტამბოლში ოპოზიციონერი მერის, ეკრემ იმამოღლუს მხარდამჭერი საპროტესტო აქცია გამართეს. ქვეყნის პრეზიდენტის გაფრთხილების მიუხედავად, რომ საპროტესტო აქციების მიმართ ტოლერანტობა არ იქნება, ქუჩაში ასიათასობით ადამიანია გამოვიდა. ისინი ქალაქის მერის დაკავებას აპროტესტებენ. ვრცელდება ცნობები, რომ რამდენიმე ლოკაციაზე აქციის მონაწილეები ბარიკადების გარღვევას შეეცადნენ, რის გამოც სამართალდამცველებმა დემონსტრანტების უკან დასახევად წიწაკის სპრეი და წყლის ჭავლი გამოიყენეს. დემონსტრაციები იმართება დედაქალაქ ანკარასა და იზმირშიც, სადაც პოლიციამ აქციის მონაწილეთა დასაშლელად ასევე გამოიყენა წყლის ჭავლი. ეკრემ იმამოღლუ კორუფციისა და ტერორისტული კავშირების ბრალდებით ოთხშაბათს დააკავეს.