დღე: მარტი 20, 2025

რუსეთის საგარეო საქმეთა სამინისტროს ოფიციალური წარმომადგენელი მარია ზახაროვა აცხადებს, რომ კიევის რეჟიმისთვის ამერიკული იარაღის მიწოდება ეწინააღმდეგება მშვიდობის მიღწევის განზრახვებს. „რა თქმა უნდა, [აშშ] იარაღის მიწოდება კიევის რეჟიმისთვის ეწინააღმდეგება დეკლარირებულ განზრახვებს, მიაღწიოს მშვიდობას და გადაიტანოს პოლიტიკური და დიპლომატიური მოგვარების ძირითად ხაზში“ – განაცხადა ზახაროვამ. „ვისაც მშვიდობა სურს, ბუნებრივია, ტერორისტული ბანდის მილიტარიზაციის შეწყვეტას დაუჭერს მხარს” – აღნიშნა მან.

უკრაინის მხარდამჭერ დოკუმენტს ევროკავშირის ყველა წევრმა მოაწერა ხელი, გარდა უნგრეთისა. დოკუმენტი, რომელიც 20 მარტის ევროპული საბჭოს სამიტის შედეგად გამოქვეყნდა რუსეთს ომის დასასრულებლად ნამდვილი პოლიტიკური ნების გამოჩენისკენ მოუწოდებს. “ევროპული საბჭო მიესალმება 2025 წლის 11 მარტს საუდის არაბეთში შეხვედრის შემდეგ უკრაინისა და შეერთებული შტატების ერთობლივ განცხადებას, მათ შორის ცეცხლის შეწყვეტის შეთანხმებისთვის წინადადებებს, ჰუმანიტარულ დახმარებას, ამერიკული სადაზვერვო ინფორმაციისა და სამხედრო დახმარების გაგრძელებას. ევროპული საბჭო რუსეთს მოუწოდებს, ომის დასასრულებლად ნამდვილი პოლიტიკური ნება გამოაჩინოს” – ნათქვამია სამიტის შედეგებში. ევროკავშირის 26 წევრი ქვეყნის ლიდერები აღნიშნავენ, რომ მშვიდობისკენ გზა უნდა მოიცავდეს ჰუმანიტარული დახმარების მიწოდებისთვის ძალისხმევებს, ომის ტყვეების…

პოლიტიკური მომენტიდან სამხედრო დაგეგმარებაზე გადავდივართ. ამის შესახებ დიდი ბრიტანეთის პრემიერ-მინისტრმა, კირ სტარმერმა განაცხადა. სტარმერმა კომენტარი გააკეთა 20 მარტს დიდ ბრიტანეთში დაგეგმილ შეხვედრაზე, რომელიც დახურულ კარს მიღმა ფორმატში ჩატარდება. “რასაც დღეს ვაკეთებთ, არის გადასვლა პოლიტიკური მომენტიდან, რომელიც შაბათ-კვირას გვქონდა… სამხედრო დაგეგმარებაზე, ასე რომ, ეს ხდება დღეს შტაბ-ბინაში… კონცეფციიდან გეგმებზე გადასვლა, კონკრეტულად იმ მხრივ, თუ როგორ დავიცავთ უკრაინაში ცას, ზღვებსა და საზღვრებს უსაფრთხოდ” – განაცხადა სტარმერმა.  

უკრაინის პრეზიდენტმა, ვოლოდიმირ ზელენსკიმ უარყო ინფორმაცია, რომ აშშ-ის პრეზიდენტთან, დონალდ ტრამპთან საუბრისას ზაპოროჟიეს ატომური ელექტროსადგურის საკუთრების გადაცემის საკითხი განიხილა. „მას ვუთხარი, რომ თუ არ არის უკრაინული, არავისთვის არ იმუშავებს. ეს უკანონოა და ჩვენ უბრალოდ არ შეგვიძლია, განვკარგოთ ეს სადგური, რადგან არის სახელმწიფო საკუთრებაში. უკრაინა მზად არის, განიხილოს უკრაინული ბირთვული ელექტროსადგურების ინვესტიციების საკითხი და მათი მოდერნიზაცია, მაგრამ ჩვენ, რა თქმა უნდა, პრეზიდენტ ტრამპთან საკუთრების საკითხზე არ გვისაუბრია“, – განაცხადა ვოლოდიმირ ზელენსკიმ.

,,ევროპისთვის და ევროპული საბჭოს სხდომისთვის დატვირთული დღის წესრიგი გვაქვს, ეს არის გადამწყვეტი დღეები”, – ამის შესახებ ევროკომისიის პრეზიდენტმა, ურსულა ფონ დერ ლაიენმა ბრიუსელში ევროკავშირის ორდღიანი სამიტის დაწყების წინ განაცხადა. „ეს არის გადამწყვეტი დღეები ევროპისთვის და ევროპული საბჭოსთვის დატვირთული დღის წესრიგი გვაქვს. განვიხილავთ, რა თქმა უნდა, უკრაინას, თუ როგორ მივაღწიოთ სამართლიან და გრძელვადიან მშვიდობას, მაგრამ ჩვენ გამოწვევების წინაშე ვართ ჩვენს კონკურენტუნარიანობასა და უსაფრთხოების დღის წესრიგთან დაკავშირებით. ამიტომ კონკურენტუნარიანობის თემა მნიშვნელოვანი იქნება ევროპული საბჭოს ამ სხდომაზე. ასევე „მზადყოფნა 2030“ და ახალი გეგმა უსაფრთხოებისთვის იქნება დღევანდელი დისკუსიების ცენტრში“, – განაცხადა ლაიენმა. გავრცელებული ცნობებით,…

საქართველოს პრემიერ-მინისტრი ირაკლი კობახიძე ერევანში სომხეთის რესპუბლიკის პრემიერ-მინისტრ ნიკოლ ფაშინიანს შეხვდა. სომხეთის რესპუბლიკის მთავრობის სახლში პირისპირ შეხვედრისას მხარეებმა საქართველოსა და სომხეთს შორის არსებულ ნაყოფიერ თანამშრომლობასა და მრავალწლიან კეთილმეზობლურ ურთიერთობებზე ისაუბრეს. ყურადღება დაეთმო სტრატეგიული პარტნიორობის დღის წესრიგში არსებულ ძირითად საკითხებს, მათ შორის, სავაჭრო-ეკონომიკურ, სატრანსპორტო და კულტურის სფეროში თანამშრომლობას. საუბარი, ასევე შეეხო რეგიონში არსებულ გამოწვევებს და სამხრეთ კავკასიაში მშვიდობისა და სტაბილურობის განსაკუთრებულ მნიშვნელობას. ირაკლი კობახიძემ აღნიშნა, რომ საქართველო მიესალმება სომხეთსა და აზერბაიჯანს შორის სამშვიდობო შეთანხმებაზე მოლაპარაკებების დასრულებას, რაც რეგიონში ხანგრძლივი მშვიდობისა და სტაბილურობისკენ გადადგმული ისტორიული ნაბიჯია. ორი ქვეყნის პრემიერ-მინისტრები დღეს საქართველო-სომხეთის ეროვნული…

ღაზის სექტორში ისრაელის სამხედრო ოპერაციას, სულ მცირე, 71 ადამიანი ემსხვერპლა. დაღუპულებს შორის არიან ქალები და ბავშვები. „ალ ჯაზირას“ ცნობით, ხან იუნისში, რაფაჰსა და ბეით ლაჰიაში ისრაელის სამხედროებმა 11 საცხოვრებელი სახლი გაანადგურეს. საცხოვრებელ ზონებზე თავდასხმა იმ დროს განხორციელდა, როდესაც მოსახლეობას ეძინა. დაბომბვის გამო არაერთი ადამიანი კვლავ ნანგრევებშია მოყოლილი. „ალ ჯაზირა“ წერს, რომ 18 მარტს ისრაელის მიერ ცეცხლის შეწყვეტის შეთანხმების დარღვევის შემდეგ ისრაელის სამხედრო მოქმედებების შედეგად ღაზის სექტორში 436 ადამიანი დაიღუპა, მათ შორის 183 ბავშვია.

სლოვაკეთის პრემიერ-მინისტრი, რობერტ ფიცო ამბობს, რომ რუსეთის წინააღმდეგ სანქციათა ახალ პაკეტს დაბლოკავს, თუ ეს უკრაინაში ომის მშვიდობიანად დარეგულირებას ხელს შეუშლის. „შესაძლოა, დადგეს მომენტი, როცა ჩვენ ვიტყვით, რომ არ ვეთანხმებით, ან რომ ეს ეწინააღმდეგება იმ სამშვიდობო ნაბიჯებს, რომელიც ახლა გადაიდგმება. თუ ჩვენ მომდევნო სანქციებს შევხედავთ ისე, რომ ისინი ძირს გამოუთხრიან სამშვიდობო პროცესს, ჩვენ მზად ვართ მათ ვეტო დავადოთ“, – თქვა სლოვაკეთის პრემიერმა. მისი თქმით, ევროკავშირის სასანქციო სია, რომელიც 2400 ადამიანსა და ორგანიზაციაზე მეტს მოიცავს, უახლოეს კვირებსა და თვეებში, შესაძლოა, შემცირდეს.

უკრაინის პრეზიდენტი, ვოლოდიმირ ზელენსკი ნორვეგიაში ჩავიდა. უკრაინული მედიის ცნობით, ვიზიტის ფარგლებში, ზელენსკი ნორვეგიის პრემიერ-მინისტრს, იონას გარ სტიორეს შეხვდება. ნორვეგიის პრემიერის განცხადებით, მოხარულია, რომ ნორვეგიაში ზელენსკისთან შეხვედრის შესაძლებლობა მიეცა. მისი თქმით, ნორვეგიის საკანონმდებლო ორგანოს ყველა პარტიამ ცოტა ხნის წინ მიაღწია შეთანხმებას უკრაინის დაფინანსების გაზრდის შესახებ. გავრცელებული ინფორმაციით, უკრაინის პრეზიდენტი და ნორვეგიის პრემიერ-მინისტრი დღეს რამდენიმე შეხვედრას გამართავენ. უკრაინის პრეზიდენტის დელეგაციასთან სამუშაო შეხვედრას ასევე დაესწრებიან ნორვეგიის ფინანსთა მინისტრი იენს სტოლტენბერგი, საგარეო საქმეთა მინისტრი ესპენ ბარტ ეიდე და თავდაცვის მინისტრი ტორე სანდვიკი.

„შპიგელის” ცნობით, სირიის პრეზიდენტის, ბაშარ ალ-ასადის დამხობიდან სამი თვის შემდეგ, გერმანიამ სირიაში დიპლომატიური მისიის მუშაობა განაახლა. მათი თქმით, საელჩო, რომელიც 2012 წლის შემდეგ დაკეტილი იყო, გერმანიის საგარეო საქმეთა მინისტრმა, ანალენა ბერბოკმა დამასკოში ვიზიტის დროს გახსნა. თუმცა, საელჩო სრულფასოვნად, ჯერჯერობით, მაინც არ ფუნქციონირებს. არსებული ინფორმაციით, გერმანიის საგარეო საქმეთა მინისტრი, რომელიც თანამდებობას მალე ტოვებს, ლიბანიდან სირიაში დღეს დილით გაემგზავრა. ბეირუთში ის ახალ პრეზიდენტს, გენერალ ჯოზეფ ხალილ აუნს შეხვდა.

რუსეთის უშიშროების საბჭოს თავმჯდომარის მოადგილე, დიმიტრი მედვედევი ,,ტელეგრამის“ არხზე წერს, რომ გერმანიის საპარლამენტო არჩევნებში გამარჯვებული ,,ქრისტიან-დემოკრატიული კავშირის“ ლიდერი, ფრიდრიხ მერცი ცუდად იწყებს. „მომავალმა კანცლერმა მერცმა აგრესიულ ომზე ისაუბრა, რომელსაც რუსეთი ყოველდღიურად აწარმოებს ევროპაში, ხანძრების, დაკვეთით მკვლელობების, ვანდალიზმისა და დეზინფორმაციის სახით. ჯერ ერთი დღეც არ უმუშავია და უკვე გებელსივით ტყუის. მერც, სწორედ ასეთი ომი აწარმოა თქვენმა ნაცისტურმა ქვეყანამ ჩვენს წინააღმდეგ 1941-1945 წლებში. ვიცით, როგორი გამარჯვებით დასრულდა ეს. ფრიც, ცუდად იწყებ და იმედი მაქვს, ასევე დაასრულებ!“, – აღნიშნა მედვედევმა.

ლიეტუვის პრეზიდენტი გიტანას ნაუსედა აცხადებს, რომ ახლა სტრატეგიული არჩევანის წინაშე დგანან, ნება მისცენ აგრესორს ძალადობისა და შიშის ესკალაციაში ან შეაჩერონ ის. „აბსოლუტურად აშკარაა, რომ უკრაინას სჭირდება სამხედრო დახმარება და ისინი მზად არიან, უზრუნველყონ იგი, მაგრამ რუსეთზე ზეწოლა უნდა გაიზარდოს. ჩვენი ლიდერობა არ არის დამოკიდებული ჩვენს რიტორიკაზე, ჩვენი ლიდერობა დამოკიდებულია ჩვენს გადაწყვეტილებებზე“, – განაცხადა ნაუსედამ.

„მთავარი სიგნალები ბრიუსელიდან და ევროპული დედაქალაქებიდან ახლა ევროპის მილიტარიზაციის გეგმებს ეხება, რაც კონფლიქტის მოგვარების მშვიდობიანი გზების ძიების შესახებ რუსეთისა და აშშ-ის პრეზიდენტების დამოკიდებულებას ეწინააღმდეგება. ევროპა ომის პარტიად კიდევ უფრო მეტად გადაიქცა“, – ამის შესახებ კრემლის პრესსპიკერმა, დიმიტრი პესკოვმა ბრიფინგზე განაცხადა. მისი თქმით, აშშ-ისა და რუსეთის პრეზიდენტების, დონალდ ტრამპისა და ვლადიმერ პუტინის სატელეფონო საუბრის შემდეგ მოლაპარაკებების პროცესში მონაწილეობის შესახებ მოსკოვს ბრიუსელიდან სიგნალი არ მიუღია.

ნიკოლ ფაშინიანი ილჰამ ალიევს სამშვიდობო შეთანხმების ხელმოსაწერად კონსულტაციების დაწყებას სთავაზობს. სომხეთის მთავრობის ხელმძღვანელი მოკლე განცხადებას სოციალურ ქსელში ავრცელებს. „სომხეთ-აზერბაიჯანის სამშვიდობო ხელშეკრულების პროექტი შეთანხმებულია და ელოდება ხელმოწერას. მე ვთავაზობ აზერბაიჯანის პრეზიდენტ ილჰამ ალიევს, დავიწყოთ ერთობლივი კონსულტაციები შეთანხმებული სამშვიდობო ხელშეკრულების ხელმოწერის შესახებ“, – წერს სომხეთის პრემიერ-მინისტრი.

,,ბირთვულ საკითხებში დიპლომატია შედეგებს თუ ვერ გამოიღებს, ტრამპი ირანის წინააღმდეგ ზომებს მიიღებს”, – ამის შესახებ აშშ-ის სახელმწიფო მდივანმა, მარკო რუბიომ ერთ-ერთ ინტერვიუში განაცხადა. მისი თქმით, დონალდ ტრამპის სურვილია, ირანის ბირთვულ საკითხზე დიპლომატიური საშუალებებით იმუშაოს, მაგრამ თუ არჩევანის გაკეთება ბირთვული იარაღით აღჭურვილ ირანსა და ზომების მიღებას შორის მოუწევს, დონალდ ტრამპი ზომებს მიიღებს. „პრეზიდენტი თუ გადაწყვეტს, რომ ჩვენ უნდა მივიღოთ ზომები, თავიდან ავიცილოთ ირანი ბირთვული პოტენციალით, ამის გასაკეთებლად შესაძლებლობა გვაქვს და კიდევ უფრო შორს წასვლისთვის, შესაძლოა, რეჟიმისთვის საფრთხის შესაქმნელად“, – განაცხადა რუბიომ.

,,ჩვენი ფიქრები დღესაც საქართველოსთან იქნება და ჩვენი მოთხოვნები რეფორმებისა და სწორი მიმართულების შესახებ კვლავ დარჩება ისე, როგორც ადრე”, – ამის შესახებ შვედეთის პრემიერმინისტრმა ულფ კრისტერსონმა ევროკავშირის სამიტის დაწყებამდე ჟურნალისტებთან განაცხადა. ,,როგორც იცით საქართველო დღის წესრიგში ძალიან ხშირად არის და დღეს, რომ არ არის, ეს მხარდაჭერის ნაკლებობას არ ნიშნავს. რა თქმა უნდა, ჩვენ შეშფოთებულები ვართ და ეს ბევრჯერ გამოვხატეთ სხვადასხვა ფორმით. ჩვენი ფიქრები დღესაც საქართველოსთან იქნება და ჩვენი მოთხოვნები რეფორმებისა და სწორი მიმართულების შესახებ კვლავ დარჩება ისე, როგორც ადრე”, – აღნიშნა კრისტერსონმა.

,,იმედი გვაქვს, რომ ქართველი ხალხი დაიცავს საკუთარ უფლებასა და დემოკრატიულ ღირებულებებს”, – განაცხადა ლატვიის პრემიერ-მინისტრმა, ევიკა სილინამ ევროკავშირის 2-დღიანი სამიტის დაწყებამდე ჟურნალისტებთან საუბარში. ,,არ ვარ ინფორმირებული იმის შესახებ, რომ საქართველოს საკითხი გვაქვს დღის წესრიგში. მაგრამ, იმედი გვაქვს, რომ ქართველი ხალხი დაიცავს საკუთარ უფლებასა და დემოკრატიულ ღირებულებებს. ლატვიას ყოველთვის კარგად ესმოდა, თუ რამდენად რთულია იბრძოლო საკუთარი თავისუფლებისთვის, რადგან ჩვენ საერთო ისტორია გვაქვს”, – აღნიშნა პრემიერმა.

,,უკრაინამ ევროკავშირისგან 1 მილიარდი ევრო ERA-ს ინიციატივის ფარგლებში მიიღო. ეს უკვე მეორე ტრანშია, რომელიც გაყინული რუსული აქტივებისგან შედგება”, – ამის შესახებ უკრაინის საგარეო საქმეთა მინისტრმა, დენის შმიგალმა განაცხადა. ,,საერთო ჯამში დიდი შვიდეულის ინიციატივის ფარგლებში, ევროპელმა პარტნიორებმა უკრაინას უკვე 4 მილიარდი ევრო გადასცეს. გაყინული რუსული აქტივები უნდა მუშაობდეს ჩვენი სახელმწიფოს სასარგებლოდ. ჩვენ ვიმუშავებთ იმაზე, რომ მათი სრული კონფისკაცია და უკრაინის აღდგენაზე დახარჯვა მოხდეს”, – თქვა შმიგალმა.

The Times of Israel-ის ცნობით, იემენიდან ისრაელის მიმართულებით რაკეტა გაუშვეს, რომელიც ისრაელის საჰაერო ძალებმა ქვეყნის საჰაერო სივრცეში შესვლამდე ჩამოაგდეს. ისრაელის თავდაცვის ძალების განცხადებაში აღნიშნულია, რომ მოსალოდნელი თავდასხმის გამო, პროტოკოლის შესაბამისად, საჰაერო განგაში გამოცხადდა. თავდასხმაზე პასუხისმგებლობა იემენელმა „ჰუსიტებმა“ აიღეს. მათი განცხადებით, ისრაელის მიმართულებით ბალისტიკური რაკეტა გაუშვეს, რომლის სამიზნე ბენ გურიონის აეროპორტი იყო.