დღე: მარტი 19, 2025

უკრაინის პრეზიდენტი ვოლოდიმირ ზელენსკი აცხადებს, რომ აშშ-ის პრეზიდენტ დონალდ ტრამპთან ძალიან პოზიტიური და გულწრფელი საუბარი ჰქონდა. „ეს შეხვედრა მნიშვნელოვნად დაგვეხმარა ომის დასრულების წინსვლაში. შევთანხმდით, რომ უკრაინამ და აშშ-მ ერთად უნდა განაგრძონ მუშაობა ომის რეალური დასრულებისთვის და ხანგრძლივი მშვიდობის მისაღწევად. გვჯერა, რომ ამერიკასთან, პრეზიდენტ ტრამპთან და ამერიკის ლიდერობასთან ერთად ხანგრძლივი მშვიდობა წელს იქნება მიღწეული. პრეზიდენტმა ტრამპმა გამიზიარა პუტინთან საუბრის დეტალები და მთავარი საკითხები, რაც განიხილეს. პირველი ნაბიჯებიდან ერთ-ერთი, შეიძლება, იყოს ენერგეტიკულ და სამოქალაქო ინფრასტრუქტურაზე თავდასხმების შეწყვეტა. მე მხარი დავუჭირე ამ ნაბიჯს და უკრაინამ დაადასტურა, რომ მზად ვართ ამის შესასრულებლად. ჩვენმა გუნდებმა ეს…

აშშ-ის პრეზიდენტი, დონალდ ტრამპი უკრაინის პრეზიდენტ ვოლოდიმირ ზელენსკის ტელეფონით ესაუბრა. როგორც ტრამპი ამბობს,  ზელენსკისთან „კარგი საუბარი“ ჰქონდა. “ახლა დავასრულე ძალიან კარგი სატელეფონო საუბარი უკრაინის პრეზიდენტ ზელენსკისთან. ის დაახლოებით ერთ საათს გრძელდებოდა. საუბრის დიდი ნაწილი ემყარებოდა პრეზიდენტ პუტინთან გუშინ განხორციელებულ ზარს, რათა თანხვედრაში მოვაქციოთ რუსეთიც და უკრაინაც მათი მოთხოვნებისა და საჭიროებების მხრივ. ძალიან სწორ გზაზე ვართ, და სახელმწიფო მდივან მარკო რუბიოს და ეროვნული უსაფრთხოების საკითხებში მრჩეველს მაიკლ უოლცს ვთხოვ, რომ განხილული თემების ზუსტი აღწერა წარადგინონ. ეს განცხადება მალე გამოქვეყნდება” – წერს ტრამპი.

რუსეთმა და უკრაინამ ტყვეები გაცვალეს. ინფორმაციას რუსეთის თავდაცვის სამინისტრო ავრცელებს. ტყვეების გაცვლა, არაბთა გაერთიანებული საამიროების შუამავლობით მოხდა. რუსეთის თავდაცვის სამინისტროს ცნობით, მოსკოვმა დააბრუნა 175 უკრაინელი სამხედრო ტყვე, ასევე „22 მძიმედ დაჭრილი სამხედრო ტყვე, რომლებსაც სასწრაფო სამედიცინო დახმარება ესაჭიროებათ“, ხოლო კიევმა 175 რუსი ჯარისკაცი. ინფორმაცია დაადასტურა უკრაინის პრეზიდენტმა ვოლოდიმირ ზელენსკიმ.

აშშ ვენესუელას დამატებითი სანქციების დაწესების შესახებ აფრთხილებს, იმ შემთხვევაში, თუ ქვეყანა არ მიიღებს აშშ-დან დეპორტირებულ საკუთარ მოქალაქეებს. „მადუროს რეჟიმი დეპორტაციის ფრენების თანმიმდევრულ ნაკადს თუ არ მიიღებს, დამატებითი მიზეზების ან დაყოვნების გარეშე, აშშ დააწესებს ახალ, მკაცრ და მზარდ სანქციებს“, – წერს აშშ-ის სახელმწიფო მდივანი, მარკო რუბიო X-ზე.

„თავდასხმები სამოქალაქო ინფრასტრუქტურაზე ამ სავარაუდოდ გადამწყვეტი და დიდებული სატელეფონო ზარის შემდეგ, პირველივე ღამეს არ შემცირებულა. პუტინი აქ თამაშობს და დარწმუნებული ვარ, რომ ამერიკის პრეზიდენტი დიდხანს ვეღარ შეძლებს უმოქმედოდ ყურებას“, – ამის შესახებ გერმანიის თავდაცვის მინისტრმა ბორის პისტორიუსმა განაცხადა. ცნობისთვის, აშშ-ის პრეზიდენტს, დონალდ ტრამპსა და რუსეთის პრეზიდენტს, ვლადიმერ პუტინს შორის სატელეფონო საუბრის შემდეგ კრემლმა ოფიციალური განცხადება გაავრცელა. მათი ინფორმაციით, ვლადიმერ პუტინმა მხარი დაუჭირა ტრამპის ინიციატივას უკრაინის ენერგეტიკულ ობიექტებზე დარტყმების 30 დღით შეწყვეტის შესახებ და რუს სამხედროებს უკვე მისცა შესაბამისი ბრძანება.

სტამბოლის პოლიციის მთავარ განყოფილებასთან დემონსტრანტები შეიკრიბნენ. ისინი სტამბოლის მერის, ეკრემ იმამოღლუს დაკავებას აპროტესტებენ. პოლიციის განყოფილებასთან შეკრებილები აცხადებენ, რომ იმამოუღლუს დაკავება დარტყმაა თურქეთის დემოკრატიისთვის. ადგილზე მობილიზებულია უსაფრთხოების ძალები და წყლის ჭავლის მანქანები. სტამბოლის გუბერნატორის ოფისმა საზოგადოებრივი შეკრებები აკრძალა ოთხი დღით. ოპოზიციური „რესპუბლიკური სახალხო პარტიის“ წევრი, სტამბოლის მერი ეკრემ იმამოღლუ გამთენიისას საკუთარ სახლში დააკავეს. მას ბრალად ედება კორუფცია და ტერორისტული დაჯგუფების ხელშეწყობა. მანამდე ცნობილი გახდა, რომ სტამბოლის უნივერსიტეტმა მთავარი ოპოზიციური რესპუბლიკური სახალხო პარტიის ლიდერს, ეკრემ იმამოღლუს დიპლომი გაუუქმა, რის გამოც ის საპრეზიდენტო არჩევნებში მონაწილეობას ვეღარ მიიღებს.

„ბუნებრივია, რომ რუსეთის ქმედებები ყველაზე მეტად მის მეზობლებს აწუხებთ. ეს თავისთავად ცხადია, მაგრამ ყველამ უნდა გაიგოს, რომ ეს კოლექტიურ საფრთხეს წარმოადგენს“, – ამის შესახებ ევროპული საბჭოს პრეზიდენტმა, ანტონიო კოსტამ განაცხადა. ,,მომავალში ევროპამ აქცენტი იარაღის წარმოებაზე უნდა გააკეთოს. ეს დროის საკითხია. შეიარაღება, რომელიც ახლა გვჭირდება იქ უნდა შევიძინოთ, სადაც ეს შესაძლებელია, ევროპაში, სამხრეთ კორეაში, იაპონიაში, აშშ-ში ან თურქეთში. ცხადია, თუ ამას უფრო გრძელვადიან პერსპექტივაში განვიხილავთ, მაშინ მნიშვნელოვანია არა მხოლოდ შესყიდვა, არამედ წარმოებაც. ამ მიზნით ჩვენი სამრეწველო და ტექნოლოგიური ბაზა უნდა გავაძლიეროთ, რასაც უკვე ვაკეთებთ“, – აღნიშნა ევროპული საბჭოს პრეზიდენტმა.

უკრაინის პრეზიდენტმა, ვოლოდიმირ ზელენსკიმ განაცხადა, რომ ოკუპირებული ტერიტორიები რუსეთთან მოლაპარაკებებში წითელ ხაზს წარმოადგენს და ის მათ ოფიციალური მოსკოვის ნაწილად არასდროს აღიარებს. „რაც შეეხება ტერიტორიებს, ეს, რა თქმა უნდა, იქნება ერთ-ერთი სენსიტიური და რთული საკითხი მოლაპარაკებების დროს. მაგრამ, ამის მიუხედავად, პირველი ნაბიჯი არის ცეცხლის უპირობო შეწყვეტა“, – განაცხადა ზელენსკიმ. მისი თქმით, ფრონტის გარკვეულ ადგილებში, ცაში ან ზღვაში, ცეცხლის შეწყვეტა საერთო ჯამში ფრონტის მთელ ხაზზე ომის შეჩერებას გამოიწვევს. „ეს სწორი ნაბიჯებია, თუ ჩვენ ომის დასრულება სამართლიანი მშვიდობით გვსურს“, – თქვა ზელენსკიმ.

„შემიძლია დარწმუნებით ვთქვა, რომ პრეზიდენტებს, ტრამპსა და პუტინს ერთმანეთის კარგად ესმით, ერთმანეთს ენდობიან და რუსეთ-ამერიკის ურთიერთობების ნორმალიზების გზაზე ეტაპობრივად სვლას გეგმავენ“, – ამის შესახებ კრემლის პრესსპიკერმა, დიმიტრი პესკოვმა ბრიფინგზე განაცხადა. „ძალიან ბევრი რამ იყო, რაც წინა ადმინისტრაციის დროს გაფუჭდა. ამიტომ, რა თქმა უნდა, ურთიერთობების აღდგენას, ორი ქვეყნის პრეზიდენტის ნების მხარდაჭერით, დრო და ძალისხმევა დასჭირდება. ორი პრეზიდენტის ძლიერი სურვილი საუკეთესო გარანტიაა იმისთვის, რომ ამ გზას ყველა გაივლის, როგორც ამერიკაში, ისე რუსეთში“, – აღნიშნა კრემლის პრესსპიკერმა.

,,ისრაელის მიზნები უცვლელი რჩება: ყველა ჩვენი მძევლის – ცოცხალის და დაღუპულის – გათავისუფლება, ჰამასის სამხედრო და მმართველობითი შესაძლებლობების ჩამოშლა და ღაზადან მომდინარე ტერორისტული საფრთხის აღმოფხვრა”, – აცხადებს ისრაელის საელჩო საქართველოში და მძევლების გათავისუფლებისა და ჰამასის ტერორისტული ქმედებების წინააღმდეგ მიმართული მცდელობების შესახებ, განცხადებას ავრცელებს. ,,თითქმის სამი კვირის წინ, ისრაელსა და ჰამასს შორის მძევლების გათავისუფლების შეთანხმებისა და ცეცხლის შეწყვეტის პირველი ეტაპი დასრულდა. ამ პერიოდში ტერორისტულმა ორგანიზაცია „ჰამასმა“ უარი თქვა მოლაპარაკებებში პროგრესზე და უარყო ორი ამერიკული შემოთავაზება გაახანგრძლივოს შეთანხმება და გაათავისუფლოს დამატებითი მძევლები. ამჟამად, ღაზაში ჰამასის ტყვეობაში რჩება 59 მძევალი – ცოცხალიც და გარდაცვლილიც…

„აშშ-ის პრეზიდენტის წინადადებაზე პასუხის მხოლოდ ორი ვარიანტი არსებობს. ეს არის დიახ ან არა. არავითარი მაგრამ ან პირობების წამოყენება. უკრაინა ცეცხლის შეწყვეტას ყოველგვარი პირობების გარეშე დათანხმდა“, – ამის შესახებ ფინეთის პრეზიდენტმა, ალექსანდრ სტუბმა უკრაინის პრეზიდენტთან, ვოლოდიმირ ზელენსკისთან ერთად გამართულ პრესკონფერენციაზე განაცხადა. მისი თქმით, ერთადერთ გამოსავალს რუსეთის მიერ უკრაინის წინააღმდეგ აგრესიული ომის შეწყვეტა წარმოადგენს. „თუ რუსეთი არ დათანხმდება, ჩვენ უკრაინის გასაძლიერებლად მხარდაჭერა უნდა გავზარდოთ და რუსეთზე ზეწოლა გავაძლიეროთ, რათა რუსეთი დარწმუნდეს, რომ მოლაპარაკებების მაგიდასთან მივიდეს“, – აღნიშნა ფინეთის პრეზიდენტმა.

უკრაინის პრეზიდენტი, ვოლოდიმირ ზელენსკი დღეს აშშ-ის ლიდერს, დონალდ ტრამპს დაელაპარაკება. ზელენსკი იმედოვნებს, რომ ტრამპთან საუბრისას პუტინთან დიალოგის შესახებ უფრო მეტ დეტალს გაიგებს. ,,დღეს მექნება კონტაქტი პრეზიდენტ ტრამპთან. დღეს, შემდგომი ნაბიჯების დეტალებს განვიხილავთ”, – თქვა ზელენსკიმ პრესკონფერენციაზე. შეგახსენებთ, რომ გუშინ, დონალდ ტრამპსა და ვლადიმერ პუტინს შორის სატელეფონო საუბარი შედგა. კრემლის ცნობით, სატელეფონო საუბრისას, პუტინმა მხარი დაუჭირა ტრამპის იდეას, რუსეთისა და უკრაინის მიერ ენერგეტიკულ ობიექტებზე თავდასხმების ორმხრივი 30-დღიანი უარის თქმის შესახებ.