დღე: მარტი 9, 2025

აშშ-ის სამთავრობო ეფექტიანობის დეპარტამენტის ხელმძღვანელმა ილონ მასკმა პოლონეთის საგარეო საქმეთა მინისტრ რადოსლავ სიკორსკის „პატარა კაცი“ უწოდა. ამ კომენტარით მასკი პოლონეთის საგარეო საქმეთა მინისტრის განცხადებას გამოეხმაურა, რომელიც წერდა, რომ უკრაინას შესაძლოა, ილონ მასკის Starlink-ის სატელიტური სერვისის ალტერნატივა დასჭირდეს. „გაჩუმდი, პატარა კაცო. შენ ღირებულების უმნიშვნელო ნაწილს იხდი და Starlink-ის ჩამნაცვლებელი არ არსებობს“ – დაწერა მასკმა სოციალურ ქსელში.

მეტი...

აშშ-ის სახელმწიფო მდივანმა მარკო რუბიომ განაცხადა, რომ უკრაინას Starlink-ის გათიშვით არავინ დამუქრებია. ამით ის გამოეხმაურა პოლონეთის საგარეო საქმეთა მინისტრის, რადოსლავ სიკორსკის განცხადებას, რომლის თანახმად, „თუ SpaceX-ი არასანდო პროვაიდერი აღმოჩნდება, სხვა მომწოდებლებს მოვიძიებთ“. „ეს უბრალოდ რაღაცების გამოგონებაა, არავინ დამუქრებია უკრაინას Starlink-ის გათიშვის თაობაზე. მადლობა თქვი, რადგან Starlink-ის გარეშე უკრაინა დიდი ხნის წინ წააგებდა ამ ომს და რუსები ახლა პოლონეთის საზღვარზე იქნებოდნენ“ – დაწერა რუბიომ და გააზიარა სიკორსკის განცხადება. რუბიოს აღნიშნულ „ტვიტს“ მოგვიანებით ელონ მასკმა უპასუხა, რომ „რასაც სახელმწიფო მდივანი რუბიო ამბობს, აბსოლუტურად სწორია”.

მეტი...

აშშ-ის პრეზიდენტი, დონალდ ტრამპი ახცადებს, რომ აშშ-უკრაინას შორის წიაღისეულის შეთანხმება გაფორმდება. „ჩვენ იქ ვართ 350 მილიარდი დოლარით. ბაიდენს ეს არასდროს არ უნდა გაეკეთებინა“ – განაცხადა ტრამპმა. ასევე, დონალდ ტრამპის თქმით, უკრაინის პრეზიდენტმა ვოლოდიმირ ზელენსკიმ ბაიდენის დროს „ფული წაიღო“ ამერიკისგან, “როგორც ტკბილეული ბავშვისგან“ . „ეს იყო ბავშვისგან ტკბილეულის აღება, რაც მან გააკეთა. ის ჭკვიანი და მკაცრი ბიჭია და ბაიდენის დროს ამ ქვეყნიდან ფული ისე წაიღო, როგორც ტკბილეული ბავშვისგან. ასეთი მარტივი იყო. მე უბრალოდ, არ ვფიქრობ, რომ ის მადლიერია” – განაცხადა ტრამპმა.

მეტი...

გერმანიის საპარლამენტო არჩევნებში გამარჯვებულმა ფრიდრიხ მერცმა განაცხადა, რომ მას სურს მოლაპარაკება საფრანგეთთან და დიდ ბრიტანეთთან მათი ბირთვული იარაღის ერთობლივი გამოყენების შესახებ. „ატომური იარაღის გაზიარება არის საკითხი, რომელზეც ჩვენ უნდა ვისაუბროთ… ჩვენ ბირთვული შეკავების თვალსაზრისით ერთად უნდა გავძლიერდეთ” – განაცხადა მერცმა. მისივე თქმით, უნდა შენარჩუნდეს „ასევე ამერიკული ბირთვული ფარი“.

მეტი...

ურსულა ფონ დერ ლაიენმა 2024-2029 წლების კომისიის მუშაობის პირველი 100 დღე შეაფასა. ევროკომისიის პრეზიდენტი ამბობს, რომ გეოპოლიტიკური ძვრები არყევს ალიანსებს. „ტურბულენტური დროის მიუხედავად, ეს კომისია ეფექტურად მუშაობს. პირველივე დღიდან ჩვენ დავრჩით იმ კურსზე, რომელიც ჩამოვაყალიბეთ პოლიტიკურ სახელმძღვანელო პრინციპებში და რომელიც სამ საყრდენს ეფუძნება – კეთილდღეობას, უსაფრთხოებასა და დემოკრატიას. მანდატის მიღებიდან 100 დღის შემდეგ მხარს ვუჭერთ ევროპულ არჩევანს პოლიტიკურ სახელმძღვანელო პრინციპებში“, – აღნიშნა ევროკომისიის პრეზიდენტმა. მან ხაზი გაუსვა, რომ ევროპის გადაიარაღების გეგმამ, რომელიც არის 800 მილიარდი ევროს ღირებულების პაკეტი თავდაცვისთვის, ერთსულოვანი მხარდაჭერა მოიპოვა.

მეტი...

პოლონეთის საგარეო საქმეთა მინისტრი, რადოსლავ სიკორსკი Starlink-ის სისტემებთან დაკავშირებით აშშ-ის მთავრობის ეფექტურობის დეპარტამენტის ხელმძღვანელის, ილონ მასკის განცხადებას ეხმაურება. მისი განცხადებით,  თუ SpaceX-ი არასანდო პროვაიდერი აღმოჩნდება, პოლონეთი სხვების მოძიებას დაიწყებს. „უკრაინისთვის Starlinks-ის სერვისების მიწოდებისთვის პოლონეთის გაციფროვნების სამინისტრო წელიწადში, დაახლოებით, 50 მილიონ აშშ დოლარს იხდის. აგრესიის მსხვერპლის მუქარის ეთიკის გარდა, თუ დადასტურდება, რომ SpaceX-ი არასანდო პროვაიდერია, ჩვენ იძულებულნი ვიქნებით, სხვა მომწოდებლები მოვძებნოთ“, – წერს სიკორსკი სოციალურ პლატფორმა X-ზე. შეგახსენებთ, მანამდე ილონ მასკმა განაცხადა, რომ Starlink სისტემა უკრაინის არმიის ხერხემალია და თუ მას გათიშავს, უკრაინის მთელი ფრონტის ხაზი ჩამოიშლება.

მეტი...

აშშ-ის სახელმწიფო მდივანი, მარკო რუბიო უკრაინელ კოლეგებთან მოლაპარაკებებისთვის საუდის არაბეთის ქალაქ ჯიდაში 10-12 მარტს ეწვევა. სახელმწიფო დეპარტამენტის ინფორმაციით, მარკო რუბიოს მიზანია, ხელი შეუწყოს რუსეთ-უკრაინის ომის დასრულებასთან დაკავშირებით პრეზიდენტ დონალდ ტრამპის მიზნის განხორციელებას. გარდა ამისა, მარკო რუბიო 12-14 მარტს კანადაში გაემგზავრება, სადაც „დიდი შვიდეულის“ საგარეო საქმეთა მინისტრების შეხვედრას დაესწრება. „მდივანი რუბიოს ჩართულობა გააძლიერებს აშშ-ის ინტერესებს მშვიდობასა და უსაფრთხოებაში, სტრატეგიულ თანამშრომლობასა და გლობალურ სტაბილურობაში. საუბარი შეეხება ახლო აღმოსავლეთსა და ევროპაში არსებულ კონფლიქტებს, თანამშრომლობას აფრიკასა და ინდო-წყნარი ოკეანის რეგიონში და სტაბილურობას დასავლეთ ნახევარსფეროში“ – აღნიშნულია სახელმწიფო დეპარტამენტის ინფორმაციაში.  

მეტი...

“ჰამასის” მიერ დატყვევებული ისრაელის მოქალაქეების გათავისუფლების მოთხოვნით, თელ-ავივში მორიგი საპროტესტო აქცია გაიმართა. დემონსტრანტები ბენიამინ ნეთანიაჰუს მოუწოდებენ, რაც შეიძლება სწრაფად შედგეს მოლაპარაკებები მოწინააღმდეგე მხარესთან, რათა ყველა ტყვე საკუთარ ოჯახს დაუბრუნდეს.

მეტი...

ვოლოდიმის ზელენსკი აცხადებს, რომ რუსეთმა, ამ კვირის განმავლობაში, უკრაინელ  ხალხზე სხვადასხვა ტიპის იარაღის გამოყენებით ასობით თავდასხმა განახორციელა. მისი თქმით, მიმდინარე კვირაში რუსებმა უკრაინაზე თავდასხმისთვის 1 200-მდე მართვადი საჰაერო ბომბი, 870-მდე დრონი და 80-ზე მეტი სხვადასხვა ტიპის რაკეტა გამოიყენა. „Shahed-ის ყველა დრონი და საჰაერო ბომბი, რომელსაც რუსეთი იყენებს, შეიცავს სანქციების გვერდის ავლით მიწოდებულ კომპონენტებს. ეს იარაღი მოიცავს 82 000-ზე მეტ უცხოურ კომპონენტს. ჩვენ ყოველდღიურად ვმუშაობთ ჩვენს პარტნიორებთან, რათა უზრუნველვყოთ გადაწყვეტილებების მიღება სიცოცხლის გადარჩენის მიზნით: საჰაერო თავდაცვის სისტემები, ინვესტიციები ჩვენს თავდაცვით წარმოებაში და სანქციების გამკაცრება რუსეთის წინააღმდეგ. ვაგრძელებთ ძალისხმევას სამართლიან მშვიდობასთან დასაახლოებლად…

მეტი...

აშშ-ის მთავრობის ეფექტურობის დეპარტამენტის ხელმძღვანელი, ილონ მასკი აშშ-ის ნატო-სგან გასვლის იდეას კიდევ ერთხელ დაეთანხმა. მასკი “რესპუბლიკელი“ სენატორის, მაიკ ლის პოსტებს ეხმაურება, სადაც ის წერს, რომ ევროპა შეერთებულ შტატებს ისე ექცევა, როგორც ბანკომატს და რომ ქვეყანამ ნატო უნდა დატოვოს. “ნამდვილად, უაზრობაა ის, რომ ამერიკა ევროპის თავდაცვისთვის იხდიდეს“ – წერს მასკი.

მეტი...

სერბეთში ქალმა სტუდენტებმა ქალთა საერთაშორისო დღეს მასშტაბური საპროტესტო აქცია გამართეს. ისინი კორუფციის წინააღმდეგ გამოვიდნენ. სერბეთში აქციები თითქმის ყოველდღიურად იმართება. მასიური მსვლელობები ნოემბერში რკინიგზის სადგურზე მომხდარი კატასტროფის შემდეგ დაიწყო, რა დროსაც 15 ადამიანი დაიღუპა. აქციის მონაწილეები ხელისუფლებისგან სადგურის სახურავის ჩამონგრევასთან დაკავშირებული დოკუმენტების გამოქვეყნებას, პასუხისმგებლობის დაკისრებას, აქციაში მონაწილე სტუდენტების მიმართ ბრალდებების მოხსნას და უმაღლესი განათლების ბიუჯეტის გაზრდას ითხოვენ.

მეტი...

აშშ-ის ვიცე-პრეზიდენტი, ჯეი დი ვენსი აცხადებს, რომ მცირეწლოვან შვილთან ერთად სეირნობისას, უკრაინის მხარდამჭერები აედევნენ. “დღეს, ჩემი 3 წლის ქალიშვილთან ერთად სეირნობისას, “სლავა უკრაინის” მომიტინგეების ჯგუფი აგვედევნა ყვირილით. ჩემი ქალიშვილი სულ უფრო ღელავდა და ეშინოდა. მე გადავწყვიტე მომიტინგეებთან დალაპარაკება იმ იმედით, რომ ჩემს პატარა ბავშვს თავს დაანებებდნენ (თითქმის ყველა მათგანი დათანხმდა). ეს იყო, ძირითადად, თავაზიანი საუბარი, მაგრამ თუ თქვენ 3 წლის ბავშვს აედევნებით პოლიტიკური პროტესტის ფარგლებში, იცოდეთ, რომ ნაგავი ხართ” – წერს ჯეი დი ვენსი.  

მეტი...

რუსეთის საჰაერო თავდაცვის სისტემებმა ღამით რუსეთის ტერიტორიაზე 88 უკრაინული დრონი გაანადგურეს. ინფორმაციას რუსული მედია ავრცელებს. მათივე ინფორმაციით, 52 უპილოტო საფრენი აპარატი ბელგოროდის ოლქის ტერიტორიაზე ჩამოაგდეს, 13 – ლიპეცკის ოლქის ტერიტორიაზე, 9-როსტოვის ოლქის თავზე, 8 უპილოტო საფრენი აპარატი ვორონეჟის ოლქის ტერიტორიაზე, 3 – ასტრახანში და თითო-თითო კრასნოდარის, რიაზანისა და კურსკის ტერიტორიებზე.

მეტი...

სირიაში, ლატაკიას რეგიონში, უსაფრთხოების ძალებსა და ყოფილი პრეზიდენტის, ასადის მომხრე მებრძოლებს შორის შეტაკებისას, 1000-ზე მეტი ადამიანია დაღუპული. არსებული ინფორმაციით, დაღუპულთაგან 745 მშვიდობიანი მოქალაქეა. რეგიონში ვითარება ამ დრომდე დაძაბული რჩება. სირიის ქალაქებსა და სოფლებში სროლის ხმა ისმის. ბაშარ ალ-ასადის მხარდამჭერები სამთავრობო ძალებზე იერიშს არ წყვეტენ.

მეტი...