დღე: თებერვალი 27, 2025

“არ მჯერა, რომ ზელენსკის დიქტატორი დავუძახე”- განაცხადა დონალდ ტრამპმა დიდი ბრიტანეთის პრემიერ-მინისტრ კირ სტარმერთან შეხვედრამდე ჟურნალისტებთან საუბარის დროს. ერთ-ერთმა ჟურნალისტმა აშშ-ის პრეზიდენტს ჰკითხა, ჯერ კიდევ სჯერა თუ არა მას, რომ ზელენსკი “დიქტატორია”? “მე ვთქვი ეგ? არ მჯერა, რომ ამას ვიტყოდი” – უპასუხა ტრამპმა. პლატფორმა Truth Social-ზე 19 თებერვალს გამოქვეყნებულ განცხადებაში ტრამპმა უკრაინის პრეზიდენტი ვოლოდიმირ ზელენსკი როგორც “არჩევნების გარეშე დიქტატორი” მოიხსენია.          

თეთრ სახლში, ხვალ უკრაინის პრეზიდენტს ვოლოდიმირ ზელენსკის ელოდებიან. არსებული ინფორმაციით, პრეზიდენტები ხელს იშვიათი წიაღისეულის და სხვა რესურსებთან დაკავშირებულ შეთანხმებას მოაწერენ. შემდეგ კი ორი ქვეყნის ლიდერს შორის დაიწყება დისკუსია. გუშინ, აშშ-ის პრეზიდენტმა განაცხადა რომ უკრაინამ NATO-ში გაწევრიანება უნდა დაივიწყოს. აღნიშნულთან დაკავშირებით, უცნობია ზელენსკის პოზიცია. დონალდ ტრამპთან შეხვედრას ელოდება რუსეთის პრეზიდენტიც.  

აშშ-ის პრეზიდენტი, დონალდ ტრამპი კიდევ ერთი წლით ახანგრძლივებს რუსეთის წინააღმდეგ სანქციებს. ამის შესახებ, ფედერალურ რეესტრში გამოქვეყნებულ დოკუმენტშია ნათქვამი. ამავდროულად აღნიშნულია, რომ უკრაინაში არსებულ ვითარებასთან დაკავშირებული საგანგებო მდგომარეობა აგრძელებს მოქმედებას, რაც აშშ-ის ყოფილ პრეზიდენტებს აღმასრულებელი ბრძანებებით სანქციების დაწესების უფლებას აძლევდა 2014, 2018 და 2022 წლებში.

უკრაინის პრეზიდენტი, ვოლოდიმირ ზელენსკი დღეს ირლანდიას ეწვევა, სადაც პრემიერ-მინისტრ მაიკლ მარტინს შეხვდება, ირლანდიის შემდეგ კი შეერთებულ შტატებში ჩავა. „ირლანდია, ჩვენს ევროკავშირელ პარტნიორებთან ერთად, გააგრძელებს გლობალური მხარდაჭერის ჩამოყალიბებას უკრაინის პირობებით ყოვლისმომცველი, სამართლიანი და ხანგრძლივი მშვიდობისთვის, რომელიც მხარს უჭერს უკრაინის სუვერენიტეტსა და ტერიტორიულ მთლიანობას და რომელიც ეფუძნება გაეროს წესდების და საერთაშორისო სამართლის პრინციპების პატივისცემას. ჩვენ ვიცით, რომ თუ რაიმე სამშვიდობო შეთანხმება იქნება, ის უნდა ეფუძნებოდეს, სამართლიანობასა და პასუხისმგებლობას“, – აღნიშნა ირლანდიის სახელმწიფო მინისტრმა ევროპისა და თავდაცვის საკითხებში, თომას ბირნმა.

ისრაელის ჯარი არ გავა ფილადელფის დერეფნიდან, რომელიც ღაზის სექტორის და ეგვიპტის საზღვარზე მდებარეობს. ცეცხლის შეწყვეტის და მძევლების გათავისუფლების შეთანხმების მიხედვით, ისრაელის თავდაცვის ძალებმა, პირველი ეტაპის ბოლოს, უნდა დატოვოს ეგვიპტე-ღაზის საზღვრის მონაკვეთი. „ჩვენ არ დავტოვებთ ფილადელფის დერეფანს. ჩვენ არ დავუშვებთ, რომ „ჰამასის“ მკვლელებმა კვლავ იარონ ჩვენ საზღვრებზე პიკაპის მანქანებით და იარაღით. ჩვენ არ დავუშვებთ მათ ხელახლა შეიარაღებას კონტრაბანდის საშუალებით“, – განაცხადა ისრაელის მთავრობის წევრმა ადგილობრივ მედიასთან საუბრისას. გეგმის თანახმად, ფილადელფის დერეფნიდან ისრაელის ჯარების გასვლა პირველი ფაზის 42-ე დღეს, ანუ 1-ელ მარტს უნდა დაიწყოს და 50-ე დღეს, ანუ 9 მარტს დასრულდეს.

უკრაინის პრემიერ-მინისტრმა, დენის შმიგალმა გამოსცა განკარგულება, რომლის საფუძველზე აშშ-თან წიაღისეულის შესახებ ხელშეკრულების ხელმოწერის უფლება საგარეო საქმეთა მინისტრს, ანდრეი სიბიგას და ვიცე-პრემიერს, ეკონომიკის მინისტრს, იულია სვირიდენკოს მიენიჭა. განკარგულების თანახმად, ხელშეკრულებას ხელი ან ერთმა, ან მეორე მინისტრმა უნდა მოაწეროს. გავრცელებული ინფორმაციის თანახმად, ხელშეკრულებას ხელი 28 თებერვალს უკრაინის პრეზიდენტის, ვოლოდიმირ ზელენსკის აშშ-ში ვიზიტის დროს მოეწერება.

,,ბრიუსელში იცოდნენ, რომ თუ არაფერს იღონებდნენ, ვაშინგტონი ტარიფებს დააწესებდა, მათაც არაფერი გააკეთეს, რადგან არაკომპეტენტურები და მხდალები არიან”, – ამის შესახებ უნგრეთის საგარეო საქმეთა მინისტრმა, პიტერ სიიარტომ განაცხადა. „გასული წლის ნოემბრიდან მთელმა მსოფლიომ იცოდა, რომ აშშ-ში პატრიოტი პრეზიდენტი აირჩიეს. მთელმა მსოფლიომ, ბრიუსელისა და ევროკომისიის ჩათვლით, რომელსაც ფონ დერ ლაიენი ხელმძღვანელობს, იცოდა, რომ დონალდ ტრამპი დაბალანსებული სავაჭრო ურთიერთობებისკენ ისწრაფვის. ბრიუსელში ასევე იცოდნენ, რომ თუ არაფერს იღონებდნენ, ვაშინგტონი ტარიფებს დააწესებდა. მათ იცოდნენ, მაგრამ არაფერი გააკეთეს. ისინი არაკომპეტენტურები და, უპირველეს ყოვლისა, მხდალები არიან. ისინი მხდალები არიან, რადგან რვა წლის განმავლობაში ჩაგრავდნენ დონალდ ტრამპს და…

,,ევროკავშირი არავის გასაცურებლად არ შექმნილა, შეიქმნა მშვიდობის შესანარჩუნებლად, ერებს შორის პატივისცემის დასამყარებლად”, – ამის შესახებ პოლონეთის პრემიერ-მინისტრმა, დონალდ ტუსკმა განაცხადა, რითაც ევროკავშირთან დაკავშირებით აშშ-ის პრეზიდენტის, დონალდ ტრამპის განცხადებას გამოეხმაურა. „პირიქით, ევროკავშირი შეიქმნა მშვიდობის შესანარჩუნებლად, ერებს შორის პატივისცემის დასამყარებლად, რომ შექმნილიყო თავისუფალი, სამართლიანი ვაჭრობა, გაძლიერებულიყო ტრანსატლანტიკური მეგობრობა. ყველაფერი ასე მარტივადაა“, -წერს დონალდ ტუსკი. ,,ევროკავშირის დაარსების მიზანი იყო აშშ-ს დაზიანება” – ტრამპი

,,დონეცკის, ლუგანსკის, ხერსონისა და ზაპოროჟიეს ოლქები რუსეთის ნაწილია და ამის განხილვა მოლაპარაკებებზე შეუძლებელია”, – ამის შესახებ კრემლის პრესსპიკერმა დიმიტრი პესკოვმა განაცხადა. „ტერიტორიები, რომლებიც რუსეთის ნაწილი გახდა და ჩვენი ქვეყნის კონსტიტუციაში შევიდა, რუსეთის განუყოფელი ნაწილია. ეს ფაქტია, რომლის უარყოფა ან განხილვა აბსოლუტურად შეუძლებელია“, – განაცხადა პესკოვმა. რუსეთის კონსტიტუციის თანახმად, დონეცკის, ლუგანსკის, ხერსონისა და ზაპოროჟიეს ოლქები რუსეთის ნაწილია, მიუხედავად იმისა, რომ რუსულ ძალებს ამ ტერიტორიებზე სრული კონტროლი არ აქვთ. კრემლის პრესსპიკერმა აღნიშნა, რომ თუ რუსეთსა და აშშ-ს ექნებათ პოლიტიკური ნება და მზაობა, მოუსმინონ ერთმანეთს, ისინი შეძლებენ უკრაინის საკითხზე მოლაპარაკებების წარმატებით წარმართვას.

უკრაინის საჰაერო ძალების ინფორმაციით, რუსულმა ძალებმა, უკრაინას ,,შაჰედისა“ და სხვა ტიპის 166 დრონით შეუტიეს, მათგან 162-მა სამიზნეს ვერ მიაღწია. მათი თქმით, საჰაერო თავდაცვის ძალებმა 90 დრონი ჩამოაგდეს, 72 კი – ლოკაციურად დაიკარგა. უკრაინის ტერიტორიის მიმართულებით უპილოტო საფრენი აპარატები რუსეთის ფედერაციის ორიოლის, ბრიანსკის, მილეროვოს, შატალოვოსა და პრიმორსკო-ახტარსკი ტერიტორიიდან გაუშვეს. უკრაინელებმა დრონები ხარკოვის, პოლტავას, სუმის, კიევის, ჩერნიგოვის, ჩერკასის, ვინიცის, ხმელნიცკის, კიროვოგრადის, ნიკოლაევისა და ოდესის ოლქებში ჩამოაგდეს. მტრის თავდასხმის შედეგად დაზარალდა კიევის, ჩერნიგოვისა და სუმის ოლქები.

სტამბოლში, ამერიკის გენერალური კონსულის რეზიდენციაში, რუსეთისა და შეერთებული შტატების წარმომადგენლებს შორის მოლაპარაკებები მიმდინარეობს. ინფორმაციას რუსული მედია ავრცელებს და აღნიშნავს, რომ მხარეები საელჩოების მუშაობასთან დაკავშირებულ საკითხებს განიხილავენ. რუსეთის საგარეო საქმეთა მინისტრმა, სერგეი ლავროვმა გუშინ განაცხადა, რომ დიპლომატები და მაღალი დონის ექსპერტები შეხვდებიან და შეისწავლიან სისტემურ პრობლემებს, რომელიც აშშ-ის წინა ადმინისტრაციის „უკანონო ქმედებების შედეგად, რუსეთის საელჩოს საქმიანობისთვის ხელოვნური დაბრკოლებების შექმნით“ დაგროვდა.

ევროპული საბჭოს პრეზიდენტმა, ანტონიო კოსტამ უკრაინის პრეზიდენტი, ვოლოდიმირ ზელენსკი ევროკავშირის ლიდერების სამიტზე მიიწვია. ამის შესახებ ევროპული საბჭოს პრეზიდენტის წერილშია აღნიშნული. სამიტი 6 მარტს გაიმართება და მასზე ევროპის თავდაცვისა და უკრაინის საკითხებს განიხილავენ. „ჩვენთვის მნიშვნელოვანია აზრთა გაცვლა იმაზე, თუ როგორ დავუჭიროთ მხარი უკრაინას და რა პრინციპებს უნდა მივყვეთ მომავალში. ევროკავშირი და მისი წევრი ქვეყნები მზად არიან აიღონ მეტი პასუხისმგებლობა ევროპის უსაფრთხოებაზე. ამიტომ, ჩვენ მზად უნდა ვიყოთ უსაფრთხოების გარანტიებში შესაძლო ევროპული წვლილისთვის, რაც აუცილებელი იქნება უკრაინაში ხანგრძლივი მშვიდობის უზრუნველსაყოფად. ევროპული საბჭოს შეხვედრასთან დაკავშირებით პრეზიდენტი ზელენსკი ბრიუსელში მოვიწვიე, რათა ერთად განვიხილოთ ბოლო დროს…