დღე: თებერვალი 23, 2025

უკრაინის პრეზიდენტმა, ვოლოდიმირ ზელენსკიმ განაცხადა, რომ როდესაც ამის დრო დადგება, კურსკის ოლქს უკრაინის ტერიტორიებში გაცვლიან. ზელენსკიმ აღნიშნა, რომ რუსეთთან მოლაპარაკებების დროს უკრაინა კურსკის ოლქის ტერიტორიას, რომელსაც ამჟამად უკრაინის შეიარაღებული ძალები აკონტროლებენ, რუსეთის მიერ ოკუპირებულ უკრაინულ ტერიტორიებში გაცვლის. „ჩვენ გვაინტერესებს ჩვენი ტერიტორიები, უკრაინული. ნებისმიერ შემთხვევაში, კურსკის ოლქი მოგვცემს საშუალებას, გავცვალოთ ის ჩვენს ტერიტორიებში. დარწმუნებული ვარ, როცა მივალთ ტერიტორიული მთლიანობის საკითხამდე და გარკვეული ნაბიჯების გადადგმის საკითხამდე, ვფიქრობ, ეს დაგვეხმარება”- განაცხადა ზელენსკიმ.​​​​​​​​​​​​​​​​

უკრაინის პრეზიდენტმა, ვოლოდიმირ ზელენსკიმ განაცხადა, რომ ომის დასრულება ამ კვირაში შეუძლებელია. “ამ კვირაში შეუძლებელია ომის დასრულება უკრაინისთვის გარანტიებით. ყოველ შემთხვევაში, გულწრფელად არ ვიცი, როგორ შეიძლება, ეს დღეს გაკეთდეს ჩვენი შეხვედრების გარეშე“– განაცხადა ზელენსკიმ. ასევე, ზელენსკიმ აღნიშნა, რომ აშშ-ის პირობები სასარგებლო წიაღისეულის შესახებ შეთანხმებაში ვალის ხასიათს ატარებდა, რომელიც უკრაინას აშშ-სთვის უნდა გადაეხადა.

პრეზიდენტი ვოლოდიმირ ზელენსკი არ აღიარებს უკრაინის მხრიდან 500 მილიარდი დოლარის მოცულობის ვალს აშშ-სთან, იმ დახმარებისთვის, რომელიც ვაშინგტონმა კიევს მიაწოდა. მისი მტკიცებით, თანხა რომელიც აშშ-ს წინა პრეზიდენტის ჯო ბაიდენისგან მიიღო, იყო გრანტი და არა სესხი. “არ ვაპირებ 500 მილიარდის პრეტენზია მივიღო, მიუხედავად იმისა, მოეწონება თუ არა ეს ვინმეს. არც კი ვარ მზად, ვაშინგტონთან $100 მილიარდის გადახდა განვიხილო, რადგან ეს გრანტი იყო და არა – სესხი. მე ბაიდენთან შევთანხმდი, რომ ეს გრანტია – გრანტი კი ვალი არ არის. გრანტს ჩვენ არ დავაბრუნებთ”- თქვა უკრაინის პრეზიდენტმა ვოლოდიმირ ზელენსკიმ.

ორშაბათს, 24 თებერვალს კიევში 13 ქვეყნის ლიდერს ელოდებიან. ამის შესახებ პრეზიდენტმა ვოლოდიმერ ზელენსკიმ პრესკონფერენციაზე განაცხადა. მისი თქმით, ორშაბათს კიევში სამიტი გაიმართება, რომელშიც ლიდერები მიიღებენ მონაწილეობას. „ჩვენ გვეყოლება 13 ლიდერი „ოფლაინში“ და 24 ლიდერი ონლაინ. ევროკავშირის ხელმძღვანელობა იქნება აქ, კიევში, ევროპარლამენტის ხელმძღვანელობა იქნება აქ, ბევრი დელეგაცია… ჩვენი პლატფორმა “უკრაინა – სკანდინავია-ბალტიისპირეთი”, ჩრდილოეთ ევროპის ლიდერები აქ იქნებიან”, – განაცხადა ზელენსკიმ.

უკრაინის პრეზიდენტის, ვოლოდიმირ ზელენსკის მზადაა, უკრაინაში მშვიდობისთვის, ან ქვეყნის ნატო-ში გაწევრიანების სანაცვლოდ, პრეზიდენტის თანამდებობა დათმოს. ამის შესახებ მან პრესკონფერენციაზე, ჟურნალისტის კითხვის საპასუხოდ განაცხადა. „უკრაინაში მშვიდობისთვის თუ ნამდვილად გჭირდებათ, რომ ჩემი პოსტი დავტოვო, მაშინ მე მზად ვარ“ – აღნიშნა ზელენსკიმ. მისი თქმით, მზადაა, პრეზიდენტის თანამდებობა დატოვოს უკრაინის ნატო-ში გაწევრიანების სანაცვლოდაც.

გაერთიანებული სამეფოს საგარეო საქმეთა მინისტრმა, დევიდ ლემმა განაცხადა, რომ გაერთიანებული სამეფო ხვალ, რუსეთის უკრაინაში სრულმასშტაბიანი შეჭრის მესამე წლისთავზე, მოსკოვის წინააღმდეგ სანქციების მასშტაბურ პაკეტს გამოაცხადებს. „დროა, პუტინის რუსეთზე ზეწოლა მოვახდინოთ. ვგეგმავ, ხვალ გამოვაცხადო რუსეთის წინააღმდეგ სანქციების ყველაზე დიდი პაკეტი ომის პირველი დღეებიდან – მათი სამხედრო მანქანის დასაშლელად და შემოსავლების შესამცირებლად, რომელიც უკრაინაში განადგურების ცეცხლს აღვივებს“ – აღნიშნა დევიდ ლემმა. ამასთან, მან ხაზი გაუსვა, უკრაინის სამხედრო მხარდაჭერის გაძლიერების აუცილებლობას და განაცხადა, რომ გაერთიანებული სამეფო უკრაინას ყოველწლიურად 3 მილიარდ გირვანქა სტერლინგს გამოუყოფს, საჭიროების შემთხვევაში კი, ბრიტანელი ჯარისკაცები სამშვიდობო ძალებს შეუერთდებიან.

რუსეთის საგარეო საქმეთა მინისტრი სერგეი ლავროვი ხვალ თურქეთში ჩავა. მედიის ინფორმაციით, ლავროვი თურქეთში უკრაინის ომის დასრულების თაობაზე აშშ-ის ოფიციალურ პირებთან გამართული მოლაპარაკებების განსახილველად და ასევე იმის გასარკვევად ჩავა, თუ როგორ შეუძლია ანკარას ამ პროცესში წვლილის შეტანა. ლავროვის ვიზიტი ემთხვევა უკრაინაში რუსეთის სრულმასშტაბიანი შეჭრის სამი წლის თავს. ამასთან, წყაროს თქმით, რუსეთის საგარეო საქმეთა მინისტრი თურქეთის საგარეო საქმეთა მინისტრთან, ჰაკან ფიდანთან ღაზაში ცეცხლის შეწყვეტასა და სირიაში არსებულ ვითარებას განიხილავს. თურქულმა წყარომ განაცხადა, რომ მხარეები განიხილავენ ნაბიჯებს „დიპლომატიური ძალისხმევით სამართლიანი და ხანგრძლივი მშვიდობის მისაღწევად, აშშ-სა და რუსეთს შორის ბოლოდროინდელ კონტაქტებს და წვლილს, რომელიც თურქეთს…

რუსულმა ძალებმა 23 თებერვლის ღამეს უკრაინის რეგიონებს ბალისტიკური რაკეტებით და 267 დრონით შეუტიეს. უკრაინული მედიის ინფორმაციით, 138 დრონი ჩამოაგდეს, 119 კი – ლოკაციურად დაიკარგა. გარდა, ამისა სამი დრონი რუსეთის ტერიტორიაზე გაფრინდა, ერთი კი – ბელარუსში. რუსებმა უკრაინას დროებით ოკუპირებული ყირიმიდან „ისკანდერ-მ/კნ-23“ ტიპის სამი ბალისტიკური რაკეტით შეუტიეს. უკრაინელებმა დრონები ხარკოვის, პოლტავას, სუმის, კიევის, ჩერნიგოვის, ჩერკასის, კიროვოგრადის, ჟიტომირის, ხმელნიცკის, რივნეს, ნიკოლაევის, ოდესისა და დნეპროპეტროვსკის ოლქებში ჩამოაგდეს. თავდასხმის შედეგად დნეპროპეტროვსკის, ოდესის, პოლტავას, კიევისა და ზაპოროჟიეს ოლქები დაზარალდა.  

Bloomberg-ის ინფორმაციით,  უკრაინის ხელისუფლებამ უარყო აშშ-ის ადმინისტრაციის მიერ შეთავაზებული ბუნებრივი რესურსების შეთანხმების ახალი ვერსია, რომელიც ვაშინგტონისთვის 500 მილიარდი აშშ დოლარის ღირებულების რესურსების გადაცემას ითვალისწინებდა. მანამდე, ამერიკულმა გამოცემა The New York Times-მა დაწერა, რომ აშშ-სა და უკრაინას შორის რესურსების შესახებ შეთანხმების ახალი ვერსიის თანახმად, მიღებული შემოსავალი უნდა გაიგზავნოს ფონდში, სადაც აშშ 100%-ს მიიღებს. კიევს სთხოვენ ფონდში წვლილის შეტანას მანამ, სანამ ის 500 მილიარდ დოლარს არ მიაღწევს, რასაც აშშ-ის პრეზიდენტი, დონალდ ტრამპი ამერიკული დახმარების სანაცვლოდ ითხოვს.

თეთრი სახლის პრეს-მდივნის განცხადებით, რუსეთ-უკრაინის კონფლიქტი შესაძლოა, „ამ კვირაში“ დასრულდეს. ინფორმაციას გამოცემა „ჰილი“ ავრცელებს. „პრეზიდენტი და მისი გუნდი ფოკუსირებული არიან კონფლიქტის დასასრულებლად ამ ომის ორივე მხარესთან მოლაპარაკებების გაგრძელებაზე. პრეზიდენტი დარწმუნებულია, რომ ამის მიღწევა ამ კვირაში შეგვიძლია“- განაცხადა კაროლინ ლევიტმა. ლევიტმა აღნიშნა, რომ ეროვნული უსაფრთხოების საკითხებში აშშ-ის პრეზიდენტის მრჩეველი, მაიკ უოლცი ამ შაბათ-კვირას „24 საათის განმავლობაში“ იმუშავებს შეთანხმებაზე. მისივე თქმით, აშშ-ის სახაზინო მდივანი, სკოტ ბესენტი ჩართულია უკრაინელებთან სასარგებლო წიაღისეულის შესახებ შეთანხმების განხილვაში.  

„ჰამასმა“ დაუყოვნებლივ უნდა გაათავისუფლოს ყველა მძევალი, წინააღმდეგ შემთხვევაში განადგურდება” – ამის შესახებ აშშ-ის სახელმწიფო მდივანი, მარკო რუბიო აცხადებს. რუბიო ამბობს, რომ „ჰამასის“ მოპყრობა მძევლების კიდევ უფრო მეტად ასახავს მათ სისასტიკეს. „ჰამასის“ მოპყრობა მძევლების მიმართ, ბიბასების ოჯახის სასტიკი მკვლელობის ჩათვლით, კიდევ უფრო მეტად ასახავს მათ სისასტიკეს და არის კიდევ ერთი მიზეზი იმისა, რის გამოც ჩვენ ვამბობთ, რომ ამ ტერორისტებმა დაუყოვნებლივ უნდა გაათავისუფლონ ყველა მძევალი ან განადგურდნენ“ – წერს რუბიო სოციალურ ქსელში.