დღე: იანვარი 24, 2025

“კანადელები უკეთეს სამედიცინო დაზღვევასა და მასშტაბურად შემცირებულ გადასახადებს მიიღებდნენ, თუკი შეერთებული შტატების ნაწილი იქნებოდნენ”- ამის შესახებ აშშ-ის პრეზიდენტმა, დონალდ ტრამპმა განაცხადა. როგორც ტრამპმა აღნიშნა, კანადის 51-ე შტატად ხილვას ისურვებდა. „მე კანადის 51-ე შტატად ხილვას ვისურვებდი. კანადელები მიიღებდნენ უკეთეს სამედიცინო დაზღვევას, მასშტაბურად შემცირებულ გადასახადებს და გაცილებით მეტ ვაჭრობას, თუკი ისინი შეერთებული შტატების ნაწილი იქნებოდნენ“- განაცხადა ტრამპმა.

„ჰამასმა“ კიდევ ოთხი მძევლის ვინაობა დაასახელა, რომელთაც შაბათს, 25 იანვარს, ცეცხლის შეწყვეტის შეთანხმების პირველი ფაზის ფარგლებში გაათავისუფლებენ. ოთხივე მათგანი ქალი სამხედროა. მათ 180 პალესტინელ პატიმარში გაცვლიან, რომლებიც ამჟამად ისრაელის ციხეებში იმყოფებიან. უახლოეს მომავალში „ჰამასი“ ასევე გამოაქვეყნებს ინფორმაციას დარჩენილი 26 მძევლის შესახებაც, რომელთაც ეტაპობრივად, მომდევნო ხუთი კვირის ვადაში გაათავისუფლებენ.

სერბეთში მიმდინარე ანტისამთავრობო აქციების გამო, ბელგრადში სკოლები, წიგნის მაღაზიები, თეატრები და ბარები ერთი დღით დაიხურა. როგორც მედია წერს, მოსახლეობა საპროტესტო აქციებს მართავს და აქტიურად საუბრობს კორუფციაზე, ნეპოტიზმზე და უხარისხო სამშენებლო სამუშაოებზე. სერბეთში პროტესტი მას შემდეგ დაიწყო, რაც 2024 წლის პირველ ნოემბერს ახალგარემონტებულ სადგურზე ბეტონის ჭერი ჩამოინგრა და შედეგად 15 ადამიანი დაიღუპა. მომხდარზე პროკურატურამ 13 ადამიანი, მათ შორის ყოფილი ინფრასტრუქტურის მინისტრი დაადანაშაულა, თუმცა ბრალი ჯერ ოფიციალურად არ წარდგენით.

Fox news -ის ინფორმაციით, აშშ-ის პრეზიდენტმა, დონალდ ტრამპმა ქვეყნის ისტორიაში ყველაზე მასშტაბური დეპორტაცია დაიწყო. დაკავებულები არიან ასობით არალეგალები, რომლებსაც სამხედრო თვითმფრინავების მეშვეობით ადეპორტებენ. თეთრი სახლის პრესმდივანმა, კაროლინ ლევიტმა დღეს გამოაცხადა, რომ “დეპორტაციის ფრენები დაიწყო” და ფოტოები გამოაქვეყნა, სადაც ჩანს რომ ადამიანები სამხედრო თვითმფრინავში სხდებიან. “პრეზიდენტი ტრამპი ძლიერ და მკაფიო სიგნალს უგზავნის მსოფლიოს: თუ ამერიკის შეერთებულ შტატებში არალეგალურად შეხვალთ, სერიოზული შედეგების წინაშე აღმოჩნდებით,” – წერს ლევიტი სოციალურ ქსელ X-ზე.

რუსეთის პრეზიდენტმა,ვლადიმერ პუტინმა მოსკოვის სახელმწიფო უნივერსიტეტში სტუმრობისას განაცხადა, რომ უკრაინაში მიმდინარე კრიზისი დაკავშირებულია წინა არჩევნებში ბაიდენის გამარჯვებასთან. როგორც რუსული მედი წერს, პუტინმა გაიმეორა დონალდ ტრამპის მიერ არა ერთხელ გამოთქმული მოსაზრება, რომ ტრამპის პრეზიდენტობის შემთხვევაში 2022 წელს რუსეთ-უკრაინის ომი არ დაიწყებოდა. „დონალდ ტრამპი თუ იქნებოდა პრეზიდენტი, 2020 წელს თუ არ მოპარავდნენ გამარჯვებას, მაშინ შესაძლოა, უკრაინაში არ ყოფილიყო ისეთი კრიზისი, რომელიც 2022 წელს დაიწყო“ -აღნიშნა პუტინმა. მისივე თქმით, ტრამპი გონიერი, პრაგმატული ადამიანია და ნაკლებად სავარაუდოა, რომ  მიიღებს გადაწყვეტილებებს რუსეთის წინააღმდეგ სანქციების შესახებ, რამაც შეიძლება, ზიანი მიაყენოს თავად შეერთებული შტატების ეკონომიკას.

ამერიკის შეერთებული შტატების პრეზიდენტმა დავოსში, მსოფლიო ეკონომიკური ფორუმის ყოველწლიურ სხდომაზე ვირტუალურად გამოსვლისას განაცხადა, რომ ,,ამერიკას ევროკავშირი ძალიან, ძალიან უსამართლოდ ექცევა”. ამერიკის პრეზიდენტი აღნიშნავს, რომ მას უყვარს ევროპა, თუმცა მოითხოვს უფრო სამართლიან და ეფექტურ სავაჭრო პოლიტიკას. ტრამპმა ისაუბრა რუსეთ-უკრაინის ომის თემაზეც და იმედი გამოთქვა, რომ ჩინეთის პრეზიდენტი ამერიკას ომის შეჩერებაში დაეხმარება. შტატების პრეზიდენტმა დავოსის ეკონომიკურ ფორუმზე, ასევე ისაუბრა ბირთვული რესურსის შემცირების საკითხზეც.

რუსეთის პრეზიდენტის პრესსპიკერი, დიმიტრი პესკოვი გამოეხმაურა აშშ-ის პრეზიდენტის დონალდ ტრამპის განცხადებას, რომელმაც უკრაინის წინააღმდეგ რუსეთის ომის დასასრულებლად საუდის არაბეთსა და OPEC-ის ქვეყნებს ნავთობის ფასების დაწევისკენ მოუწოდა. „უკრაინაში არსებული კონფლიქტი ნავთობის ფასებზე არ არის დამოკიდებული“, – განაცხადა კრემლის პრესსპიკერმა. ,,მოვუწოდებ საუდის არაბეთსა და OPEC-ს დაწიონ ნავთობის ფასი, რათა უკრაინაში ომი დასრულდეს” – ტრამპი

უნგრეთის პრემიერ-მინისტრმა, ვიქტორ ორბანმა რუსეთის წინააღმდეგ დაწესებული სანქციები გააკრიტიკა და განაცხადა, რომ ამ სანქციებმა უნგრეთს 19 მილიარდი ევროს ოდენობის ფინანსური ზიანი მიაყენა. „ახლა დღის წესრიგში დგას სანქციების გახანგრძლივების საკითხი. მუხრუჭი ამოვწიე და ვთხოვე ევროკავშირის ლიდერებს გაეგოთ, რომ ამის გაგრძელება არ შეიძლება. არ არის კარგი, რომ ჩვენ ვიხდით უკრაინის დახმარების ფასს და ისინი გვიქმნიან პრობლემებს. ვთხოვთ მათ, დაარწმუნონ უკრაინა, განაახლონ გაზის ტრანზიტი“, – განაცხადა ორბანმა. Reuters-ი წერს, რომ უნგრეთს ჯერ არ გადაუწყვეტია, დაუჭიროს თუ არა მიმდინარე თვის ბოლოს მხარი სანქციების გახანგრძლივებას. ევროკავშირი ყოველ ექვს თვეში ერთხელ აახლებს სანქციებს და ეს ბლოკის…

,,დღეს რომ ხმის მიცემა იმართებოდეს იმაზე, უნდა გახდეს თუ არა უკრაინა ევროკავშირის წევრი, პასუხი არის: „ცხადია, არა“, – ამის შესახებ უნგრეთის საგარეო საქმეთა მინისტრმა, პიტერ სიიარტომ განაცხადა, რომლის სიტყვებსაც უნგრეთის მთავრობის პრესსპიკერი, ზოლტან კოვაჩი სოციალურ ქსელში ავრცელებს. მისი თქმით, დღეს უკრაინა არანაირად არ ასრულებს ევროკავშირში გაწევრიანების აუცილებელ პირობებს. „არ მინდა, გრძელი სია მოგცეთ, მაგრამ ერთ-ერთ მიზეზს გეტყვით : ეროვნული უმცირესობების უფლებები. ფაქტი ისაა, რომ უნგრეთის ეროვნული თემის უფლებები სასტიკად ირღვევა ბოლო ათზე მეტი წლის განმავლობაში. ცხადია, ეროვნული უმცირესობების უფლებების უგულებელყოფა ეწინააღმდეგება ევროკავშირის ღირებულებებს“, – აღნიშნა სიიარტომ.

,,უკრაინა რუსეთთან შეთანხმებისთვის მზადაა”, – ამის შესახებ აშშ-ის პრეზიდენტმა, დონალდ ტრამპმა, დავოსის მსოფლიო ეკონომიკურ ფორუმზე სიტყვით გამოსვლისას განაცხადა. მოდერატორის შეკითხვაზე, მომავალ წელს დავოსის მსოფლიო ეკონომიკური ფორუმის გამართვის დროს უკვე იქნება თუ არა რუსეთსა და უკრაინას შორის ცეცხლის შეწყვეტის შესახებ შეთანხმება მიღწეული, ტრამპმა უპასუხა: „თქვენ ეს რუსეთს უნდა ჰკითხოთ. უკრაინა შეთანხმებისთვის მზადაა“. მან ასევე აღნიშნა, რომ ომი უკრაინაში არასდროს უნდა დაწყებულიყო. ტრამპი დარწმუნებულია, რომ ის რომ პრეზიდენტი ყოფილიყო, სამხედრო კონფლიქტი არ დაიწყებოდა.

Reuters-ის ინფორმაციით, სასაზღვრო ქალაქ სიუდად ხუარესში დროებითი კარვების ბანაკები შენდება, სადაც ათასობით დეპორტირებული ლათინოამერიკელის განთავსება იგეგმება. მექსიკური მხარე მათ კვებას, სამედიცინო დახმარებასა და საბუთების აღებაში დახმარებას ჰპირდება. ადგილობრივი ხელისუფლების განმარტებით, კარვების თავშესაფრის მშენებლობა რამდენიმე დღეში დასრულდება. შეგახსენებთ, რომ პრეზიდენტმა ტრამპმა მექსიკის საზღვარზე საგანგებო მდგომარეობა გამოაცხადა და სამხედრო ძალების მიერ მისი დახურვის ბრძანება გასცა.

კრემლის პრესმდივანმა დიმიტრი პესკოვმა განაცხადა, რომ რუსეთის პრეზიდენტი ვლადიმერ პუტინი აშშ-ის პრეზიდენტთან დონალდ ტრამპთან სასაუბროდ მზად არის. „პუტინი მზად არის, ჩვენ სიგნალს ველოდებით. ყველაფერი მზადაა. აქ მარჩიელობა ახლა რთულია. როგორც კი რამე იქნება, შეგატყობინებთ“, – განუცხადა ჟურნალისტებს კრემლის წარმომადგენელმა. შეგახსენებთ, რომ ტრამპმა გუშინ დავოსის მსოფლიო ეკონომიკურ ფორუმზე გამოსვლის დროს განაცხადა, რომ მას რაც შეიძლება მალე პუტინთან საუბარი და უკრაინაში ომის დასრულება სურს.

აშშ-ის პრეზიდენტის, დონალდ ტრამპის განცხადებით, ჩრდილოეთ კორეის ლიდერი კიმ ჩენ ინი ჭკვიანი ბიჭია. ტელეკომპანია Fox News-თან ინტერვიუს დროს ტრამპმა გაიხსენა, რომ კიმ ჩენ ინთან პირველი საპრეზიდენტო ვადის დროს კარგი ურთიერთობები ჰქონდა. ჟურნალისტის კითხვას, აპირებს თუ არა ის კვლავ დაუკავშირდეს ჩრდილოეთ კორეის ლიდერს, ტრამპმა დადებითი პასუხი გასცა. აშშ-ის პრეზიდენტი ფიქრობს, რომ კიმ ჩენ ინი რელიგიური ფანატიკოსი არ არის.  

რუსეთის ფედერაციის საგარეო საქმეთა მინისტრის მოადგილემ, ალექსანდრ გრუშკომ განაცხადა, რომ რუსეთი დაჟინებით მოითხოვს ,,რკინის გარანტიებს“, რათა უკრაინა ნატო-ში არ გაწევრიანდეს. „ნატო-ში უკრაინის გაწევრიანების პერსპექტივასთან დაკავშირებით ალიანსში განსხვავებული თვალსაზრისი არსებობს. ამ შემთხვევაში, ბატონი ფიცო აბსოლუტურად მართალია ამ გეგმების დახასიათებაში, რადგან ეს გამორიცხავს უკრაინაში მშვიდობის მიღწევას და, უფრო ფართო გაგებით, რაიმე სახის უსაფრთხოების არქიტექტურის შექმნასაც კი და ამ თვალსაზრისს ალიანსის რამდენიმე ქვეყანა იზიარებს“, – აღნიშნა გრუშკომ.

,,EU-ს ელჩებმა დღეს დილით მწვანე შუქი აანთეს ქართული დიპლომატიური პასპორტებისთვის სავიზო რეჟიმის შეჩერებაზე”, – წერს ,,რადიო თავისუფლების” ევროპის ბიუროს რედაქტორი რიკარდ იოზვიაკი X-ზე. ,,ევროკავშირის ელჩებმა დღეს დილით მწვანე შუქი აანთეს ქართული დიპლომატიური პასპორტებისთვის სავიზო რეჟიმის შეჩერებაზე. საგარეო საქმეთა მინისტრები ამას ორშაბათს დააფიქსირებენ. უნგრეთი და სლოვაკეთი წინააღმდეგ წინააღმდეგ მისცემს ხმას, მაგრამ არ აქვს მნიშვნელობა, რადგან კვალიფიციური უმრავლესობა არის”, – წერს იოზვიაკი.