დღე: იანვარი 18, 2025

ფილარმონიასთან მოქალაქეები აქციას მართავენ. მათ ნაწილს, ნიღაბი უკეთია, რითაც, მათივე განმარტებით, პროტესტს და დაუმორჩილებლობას გამოხატავენ იმ კანონის მიმართ, რომელიც ე.წ “ბალაკლავას” ტარებას კრძალავს. „ცეცხლი ოლიგარქიას“ სკანდირებენ ისინი. მათ დემონსტრაციულად ფოიერვერკიც ისროლეს. აქციის მონაწილეები  ფილარმონიიდან მსვლელობით გაემართებიან პარლამენტთან და იქ მომდინარე აქციას შეუერთდებიან.

საქართველოს მეხუთე პრეზიდენტი სალომე ზურაბიშვილი ჯგუფ „განს ენდ როუსს“ მიმართავს, საქართველოში კონცერტი ახალ არჩვენებამდე არ გამართოს. „შეკვეთილში დაგეგმილი „განს ენდ როუსის“კონცერტი არის სახელმწიფოს მიერ დაფინანსებული, ივანიშვილის კონტროლირებადი კონცერტი. საქართველოში საპროტესტო აქციები 51-ე დღეა, გრძელდება და არ შეწყდება ახალ არჩევნებამდე. კონცერტები მისასალმებელი იქნება ამის შემდეგ“- წერს ზურაბიშვილის .  

ზუგდიდის რაიონულმა სასამართლომ კოალიცია „ცვლილებისთვის“ წარმომადგენელი მარიამ სიჭინავა და აქტივისტი კერენ ესებუა 5 000 -5 000 ლარით დააჯარიმა. გადაწყვეტილება მოსამართლე ფატი ფურცხვანიძემ მიიღო. მოსამართლემ აქტივისტები სამართალდამრღვევებად ცნო ადმინისტრაციულ სამართალდარღვევათა კოდექსის 174-პირველი პრიმა მუხლის მეოთხე ნაწილით, რაც აქციაზე პიროტექნიკის გამოყენებას გულისხმობს. რაც შეეხება, მათთვის წაყენებულ კიდევ ერთ მუხლში – ასევე, ადმინისტრაციულ სამართალდარღვევათა კოდექსის 173-ე მუხლის პირველ ნაწილში, რაც პოლიციისადმი დაუმორჩილებლობას გულისხმობს, მოსამართლე ფატი ფურცხვანიძემ ისინი გაამართლა.

საქართველოს მეხუთე პრეზიდენტი  ვაშინგტონში დიასპორის წარმომადგენლებს შეხვდება. აღნიშნულის შესახებ სალომე ზურაბიშვილი სოციალურ ქსელში წერს. ამავე ცნობით, დიასპორასთან შეხვედრა ორშაბათს, 22 იანვარს, 19:00 საათზე შედგება. მანამნდე, სალომე ზურაბიშვილმა განაცხადა, რომ დონალდ ტრამპის მომავალი ადმინისტრაციის წარმომადგენლებს შეხვდა.  

შინაგან საქმეთა სამინისტრომ კოალიცია „ძლიერი საქართველოს“ საბურთალოს შტაბთან მომხდარ შემთხვევაზე გამოძიება დაიწყო. როგორც უწყებაში აცხადებენ, მომხდარზე გამოძიება სისხლის სამართლის კოდექსის 126-ე მუხლით დაიწყო, რაც ძალადობას გულისხმობს. „ლელოს“ წევრმა, საბა ბუაძემ განაცხადა, რომ შტაბიდან გამოსულებს მათ თავს დაესხნენ. „საბურთალოს შტაბიდან გამოსულებს პროვოკატორები შემოგვხვდნენ „შემთხვევით“, გინებით, დანით და ქვების სროლით“.    

საქართველოს მეხუთე პრეზიდენტი აცხადებს, რომ დონალდ ტრამპის წინასაინაუგურაციო მიღებაზე “ახალი, თავისუფალი და სამართლიანი არჩევნების საჭიროებაზე” ისაუბრა. როგორც სალომე ზურაბიშვილი სოციალურ ქსელში წერს აშშ-ის პრეზიდენტის მომავალი ადმინისტრაციის ქართველი ხალხის თხოვნა გადასცა. „პატივი მქონდა დავსწრებოდი „რესპუბლიკური პარტიის“ წინასაინაუგურაციო მიღებას დონალდ ტრამპ უმცროსის მიწვევით. ეს შესაძლებლობა გამოვიყენე, რათა ტრამპის მომავალ ადმინისტრაციაში საკვანძო გადაწყვეტილების მიმღები პირებისთვის ქართველი ხალხის სასწრაფო თხოვნა გადამეცა: ახალი, თავისუფალი და სამართლიანი არჩევნების საჭიროება,” – წერს ზურაბიშვილი.  

თემქის პოლიციასთან ხმაური და დაპირისპირება იყო. პოლიციამ  რამდენიმე ადამიანი დააკავა. მოქალაქეები ამ დრომდე რჩებიან ადგილზე. ადგილზე რჩებიან სამართალდამცავებიც. აქციის მონაწილეები ამბობენ, რომ მოქალქეების პირბადის ტარების გამო დააკავეს. “ძალის გამოყენებით დააკავეს ადამიანები. პირბადეების გამო ადამიანს არ აკავებენ. იძალადეს ჩვენზე, ჩემს მეგობას შუშა ჩაამტვრევინეს თავით. 6 ადამიანი არის დაკავებული”- ამბობს აქციის ერთ-ერთი მონაწილე. მოქალქეები თემქის პოლიციასთან აქციას მართავდნენ.

თბილისში საპროტესტო მსვლელობა დაიწყო. მოქალქეები მეტროსადგურ სარაჯიშვილთან შეიკრბნენ. დემონსტრანტები მსვლელობით გურამიშვილის გამზირზე მიემართებიან. საბოლოო გაჩერება კი თემქის პოლიციის შენობა იქნება. აქციის მონაწილეებს, სხვადასხვა შინაარსის ტრანსფარანტები აქვთ მიტანილი. ისინი ვადამდელი საპარლამენტო არჩევნების დანიშვნასა და აქციების დროს დაკავებული მოქალქეების გათავისუფლებას ითხოვენ.

სალომე ზურაბიშვილი სერბეთში გუშინ გამართულ საპროტესტო აქციას ეხმაურება და წერს, რომ საქართველოსა და სერბეთში საპროტესტო აქციები თავისუფლებისთვის ბრძოლაა. „საპროტესტო აქციები საქართველოში და საპროტესტო აქციები სერბეთში ერთი და იგივე ბრძოლაა თავისუფლებისთვის, დემოკრატიისთვის, დამოუკიდებლობისთვის და რუსეთის ბატონობის წინააღმდეგ“ – წერს საქართველოს მეხუთე პრეზიდენტი სალომე ზურაბიშვილი. სერბეთში მასშტაბური საპროტესტო აქციები მას შემდეგ დაიწყო, რაც ნოემბერში ქალაქ ნოვი სადის რკინიგზის სადგურის ჭერის ნაწილი ჩამოინგრა, რასაც 15 ადამიანი ემსხვერპლა.    

საქართველოს სახელმწიფო საზღვრის უკანონოდ გადაკვეთისა და საზღვარზე მიგრანტის უკანონოდ გადაყვანის ფაქტებზე უცხო ქვეყნის ექვსი მოქალაქე დააკავეს. ინფორმაციას შსს ავრცელებს. “გამოძიებით დადგინდა, რომ თურქეთის რესპუბლიკის მოქალაქემ 1981 წელს დაბადებულმა ს.ო.-მ თავისი მართვის ქვეშ არსებული სატვირთო ავტომანქანით, ასევე, თურქეთის რესპუბლიკის მოქალაქეები: 2002 წელს დაბადებული ო.ფ., 1988 წელს დაბადებული თ.ჩ., 1985 წელს დაბადებული ს.ი., 1989 წელს დაბადებული ჰ.ო. და 1987 წელს დაბადებული ა.ქ. სასაზღვრო საკონტროლო-გამშვები პუნქტის „სარფის“ გვერდის ავლით, საქართველოს ტერიტორიაზე ფარულად, უკანონოდ გადმოიყვანა. პოლიციამ ექვსივე მათგანი საზღვრო გამშვები პუნქტის ტერიტორიაზე დააკავა. დანაშაული 4-დან 8 წლამდე ვადით თავისუფლების აღკვეთას ითვალისწინებს”- აცხადებენ უწყებაში. გამოძიება…

თბილისსა და რეგიონებში, დღეს, 13-ზე მეტი აქცია-მსვლელობა იგეგმება.  მსვლელობები დედაქალაქში 14:00 საათზე დაიწყება. რაც შეეხება რეგიონებს ქუთაისში, 19:00 საათზე, მერიის წინ გაიმართება აქცია სახელწოდებით „კი ევროპას, არა რუსეთს!“ ბათუმში, 19:00 საათზე მოქალაქეები საკონსტიტუციო სასამართლოსთან გამართავენ აქციას – „სამშობლოს სამსახურში!“; ზუგდიდში, 17:00 საათზე – „ბრძოლა გამარჯვებამდე“ – სამხარეო ადმინისტრაციის წინ; თელავში, 18:00 – „უწყვეტი პროტესტი თელავში!“ – მერიის წინ; ახალციხეში, 18:00 საათზე – „არა რუსულ რეჟიმს“ – შოთა რუსთაველის ძეგლთან. საქართველოს მასშტაბით საპროტესტო აქციები თვეზე მეტია მიმდინარეობს. მოქალქეები ახალი არჩევნების დანიშვნას და აქციების დროს დაკავებული ადამიანების გათავისუფლებას ითხოვენ.