დღე: იანვარი 11, 2025

ბრიტანეთის ყოფილი პრემიერ-მინისტრი ბორის ჯონსონი რუსეთის პრეზიდენტს, ვლადიმერ პუტინს მოუწოდებს, უარი თქვას იმპერიალისტურ ამბიციებზე. „იცით, ოდესღაც ჩვენ გვქონდა იმპერია, ეს სიმართლეა. ჩვენ გვქონდა იმპერია, რომელიც შვიდჯერ დიდი იყო, ვიდრე რომის იმპერია. ეს მსოფლიოს ისტორიის განმავლობაში ყველაზე დიდი იმპერია იყო. დღეს მისგან ფაქტობრივად არაფერი დარჩა, მაგრამ კმაყოფილები ვართ, პოსტიმპერიალისტური როლით“- აღნიშნა ჯონსონმა. ბრიტანეთის ყოფილმა პრემიერ-მინისტრმა აღნიშნა, რომ სხვა ქვეყნების კონტროლი საჭირო არ არის, „ თუ გიყვარს გაუშვი“.

კომპანია „მეტას“ აღმასრულებელი დირექტორი მარკ ცუკერბერგი აშშ-ის არჩეულ პრეზიდენტს, დონალდ ტრამპს მოუწოდებს, ჩაერიოს, რომ ევროკავშირმა შეაჩეროს ამერიკული ტექნოლოგიური კომპანიების დაჯარიმება, ანტიმონოპოლიური კანონმდებლობის არ შესრულების გამო. „ვფიქრობ, შეერთებული შტატების სტრატეგიული უპირატესობა არის ის, რომ ჩვენ გვყავს ბევრი ყველაზე ძლიერი კომპანია მსოფლიოში და ვფიქრობ, რომ ეს უნდა იყოს აშშ-ს სტრატეგიის ნაწილი, ამის დაცვა. ეს არის ერთ-ერთი რამ, რასთან დაკავშირებითაც მე ოპტიმისტურად ვარ განწყობილი პრეზიდენტ ტრამპთან მიმართებით“ – განაცხადა ცუკერბერგმა. გასული წლის ნოემბერში, „მეტას“ კონგლომერატი, რომელიც მართავს Facebook-ს, Instagram-ს, WhatsApp-ს და სხვა სოციალურ მედიასა და საკომუნიკაციო პლატფორმებს, ევროკავშირის ანტიმონოპოლიური წესების დარღვევისთვის 797 მილიონი ევროთი…

ვოლოდიმირ ზელენსკის ინფორმაციით, უკრაინელმა ჯარისკაცებმა კურსკის ოლქში ჩრდილოეთ კორეელი სამხედროები ტყვედ აიყვანეს. „ორი ჯარისკაცი, რომლებიც დაჭრილები არიან, გადარჩნენ და ისინი კიევში გადაიყვანეს. ეს ადვილი ამოცანა არ ყოფილა, როგორც წესი რუსეთის ძალები და ჩრდილოეთ კორეელი სამხედროები თავიანთ დაჭრილებს კლავენ, რათა უკრაინის წინააღმდეგ ომში ჩრდილოეთ კორეის მონაწილეობის ნებისმიერ მტკიცებულება გააქრონ“ – წერს ვოლოდიმირ ზელენსკი. მისი თქმით, როგორც ყველა სამხედრო ტყვე, ჩრდილოეთ კორეელი ჯარისკაცებიც ყველა საჭირო სამედიცინო დახმარებას იღებენ.

ბელგიის სურსათის უვნებლობის სააგენტო მოქალქეებს მოუწოდებს, არ გამოიყენოს ნაძვის ხეები საჭმელად. სააგენტომ აღნიშნულთან დაკავშირებით, განმარტება მას შემდეგ გააკეთა, რაც ქალაქ გენტის ვებგვერდზე გამოქვეყნდა ინფორმაცია, რომლის მიხედვითაც, ნარჩენების მართვისთვის, წიწვების მეორადი გამოყენება და საკვებად მოხმარება შესაძლებელია. “სკანდინავიაში ამას დიდი ხანია აკეთებენ: ტოტებიდან წიწვის ნემსისებრ მასას კრეფენ, ცოტა ხნით აჩერებენ ადუღებულ წყალში, საწურში ატარებენ და სუფთა ქსოვილზე აშრობენ”, – წერია გენტის ვებგვერდზე. “როგორც კი წიწვები გაშრება, შეგიძლიათ, გემრიელი ჯემი მოამზადოთ პურის ან ტოსტისთვის” – ვკითხულობთ ვებგვერდზე. ბელგიის სურსათის უვნებლობის სააგენტოს საპასუხო განცხადებაში აღნიშნულია, რომ ნაძვის ხეები საკვებ ჯაჭვში გამოყენებისთვის არაა გათვალისწინებული.

რუსეთის ტამბოვის ოლქში დრონებით თავდასხმის შედეგად შვიდი ადამიანი დაშავდა. ინფორმაციას რუსული მედია ავრცელებს. „განახლებული ინფორმაციის თანახმად, შვიდი ადამიანი დაშავდა. დაშავებულებს ყველა საჭირო დახმარება გაუწიეს და მათი საავადმყოფოში გადაყვანა საჭირო არ გახდა“ – აცხადებს ტამბოვის ოლქის გუბერნატორი. ადგილობრივი მოსახლეობის ინფორმაციით, ქალაქში საჰაერო განგაში არ გამოცხადებულა. მანამდე რუსეთის თავდაცვის სამინისტრომ ინფორმაცია გაავრცელა, რომ ქვეყნის ტერიტორიაზე 85 უკრაინული დრონი ჩამოაგდეს.

ამერიკის შეერთებული შტატების პრეზიდენტი ჯო ბაიდენი მოსახლეობას 15 იანვარს მიმართავს. ეს იქნება ბაიდენის გამოსამშვიდობებელი სიტყვა. გავრცელებული ინფორმაციით, ჯო ბაიდენი მოსახლეობას ადგილობრივი დროით 20:00 საათზე მიმართავს. ახალი პრეზიდენტის, დონალდ ტრამპის ინაუგურაცია კი 20 იანვარს გაიმართება.    

აშშ-ის პრეზიდენტმა, ჯო ბაიდენმა თეთრ სახლში ჟურნალისტებს განუცხადა, რომ ვლადიმერ პუტინი რთულ მდგომარეობაშია. „პუტინი ახლა რთულ მდგომარეობაშია და მნიშვნელოვანია მას ამოსუნთქვის შესაძლებლობა არ ჰქონდეს, რათა იმ საშინელებების კეთება გააგრძელოს, რასაც აკეთებს“ – განაცხადა ჯო ბაიდენმა. მისი თქმით, „უკრაინას გამარჯვების რეალური შანსი აქვს“, თუ დასავლეთი მის მხარდაჭერას გააგრძელებს.

უკრაინელებმა რუსების მიერ გაშვებული 47 დრონი ჩამოაგდეს. ინფორმაციას უკრაინული მედია ქვეყნის საჰაერო ძალებზე დაყრდნობით ავრცელებს. უკრაინის საჰაერო ძალების ცნობით, სულ, რუსულმა ძალებმა უკრაინის მიმართულებით 74 დრონი გაუშვეს, რომელთაგან 47 უკრაინის თავდაცვის ძალებმა ჩამოაგდეს, ხოლო 27 უკრაინის ტერიტორიაზე გაუჩინარდა. რუსების მიერ გაშვებული დრონები პოლტავის, სუმის, ხარკოვის, ჩერკასის, ჩერნიგოვის, კიევის, დნეპროპეტროვსკის, ზაპოროჟიეს, მიკოლაივის, კიროვოგრადისა და ხერსონის ოლქებში ჩამოაგდეს. ჩამოგდებული რუსული დრონების ნამსხვრევების შედეგად უკრაინის შვიდ ოლქში კერძო სახლები, სხვადასხვა დაწესებულებები და ავტომობილები დაზიანდა

სლოვაკეთის დედაქალაქის ქუჩებში საპროტესტო აქცია გაიმართა. დემონსტრანტები პრემიერ-მინისტრ რობერტ ფიცოს პრორუსულობაში ადანაშაულებენ. „სლოვაკეთი ევროპაა, ჩვენ რუსეთი არ ვართ“ – განაცხადა „როიტერთან“ საუბარში აქციის ერთ-ერთმა მონაწილემ. აქციის მონაწილეებს ეროვნულ დროშებთან ერთად ევროკავშირის დროშებიც ეჭირათ და სკანდირებდნენ: „საკმარისია რუსეთი”. აქციის მონაწილეების განცხადებით, მათი განსაკუთრებული გაღიზიანება რამდენიმე კვირის წინ რობერტ ფიცოს მოსკოვში ვიზიტმა გამოიწვია.  

თეთრი სახლის ეროვნული უშიშროების საბჭოს სტრატეგიული კომუნიკაციების კოორდინატორი ჯონ კირბი აცხადებს, რომ რუსეთ-უკრაინის ომის არცერთი მხარე მოლაპარაკებებისთვის მზად არ არის. კირბის ჟურნალისტებმა ჰკითხეს, არის თუ არა რუსეთის წინააღმდეგ აშშ-ის მიერ დაწესებული ბოლო სანქციები სტრატეგიის ნაწილი, რომლის მიზანი ომის მოლაპარაკებების გზით დასრულებაა საპასუხოდ, კირბიმ აღნიშნა: „ეს არ გაკეთებულა იმ მოლოდინით, რომ სანქციები გახდება ვაჭრობის მონეტა, როდესაც უკრაინას მოუნდება მოლაპარაკების მაგიდასთან დაჯდომა. ახლა არანაირი მოლოდინი არ არსებობს, რომ რომელიმე მხარე მოლაპარაკებებისთვის მზადაა“  

სამხრეთ კორეაში ავიაკომპანია Jeju Air-ის თვითმფრინავის შავი ყუთების მიერ ინფორმაციის ჩაწერა ავიაკატასტროფამდე 4 წუთით ადრე შეწყდა. ინფორმაციას სააგენტო Reuters-ი ავრცელებს. სამხრეთ კორეის ტრანსპორტის სამინისტროს ცნობით, შესაბამისი სამსახურები გამოიძიებენ იმას, თუ რამ გამოიწვია თვითმფრინავის შავი ყუთების მუშაობის შეჩერება. 29 დეკემბერს Boeing 737-800-ი, რომელსაც მგზავრები ტაილანდის დედაქალაქ ბანგკოკიდან გადაჰყავდა, მუანის საერთაშორისო აეროპორტში დაშვებისას კედელს შეეჯახა. კატასტროფის დროს თვითმფრინავის ბორტზე 175 მგზავრი და ეკიპაჟის ექვსი წევრი იმყოფებოდა. ავიაკატასტროფის შედეგად 179 ადამიანი დაიღუპა, ხოლო ეკიპაჟის ორი წევრი გადარჩა.