დღე: დეკემბერი 31, 2024

საფრანგეთმა სირიაში “ისლამური სახელმწიფოს” ობიექტები დაბომბა. ინფორმაცია საფრანგეთის თავდაცვის მინისტრმა სებასტიენ ლეკორნუმ გაავრცელა. საფრანგეთთან ერთად სირიის ტერიტორიაზე ტერორისტების პოზიციებზე იერიშებს ახორციელებენ შეერთებული შტატები და ისრაელი. სირიაში 8 დეკემბერს მეამბოხეების მიერ ასადების რეჟიმის დამხობის შემდეგ ქვეყანას გარდამავალი მთავრობა მართავს. ქვეყნის ცალკეულ რადიკალურ დაჯგუფებებს შორის შეტაკებები ამ დრომდე მიმდინარეობს.

გერმანიის კანცლერმა ოლაფ შოლცმა ქვეყნის ამომრჩეველს მოუწოდა სოციალური ქსელების მეპატრონეებს ვადამდელი საპარლამენტო არჩევნების ბედის გადაწყვეტის უფლება არ მისცენ იმ ფონზე, როცა მილიარდერი ილონ მასკი ულტრამემარჯვენე პარტიას „ალტერნატივა გერმანიისთვის“ უჭერს მხარს. ინფორმაციას The Guardian-ი ავრცელებს. როგორც შოლცმა მის წინასაახალწლო მილოცვაში თქვა, მხოლოდ გერმანიის მოქალაქეებს აქვთ უფლება გადაწყვიტონ, თუ „სად წავა გერმანია“ 23 თებერვლის არჩევნების შემდეგ. გერმანული საზოგადოების ბედი კი, მისი თქმით, „ჭკვიანი და ღირსეული ადამიანების დიდ უმრავლესობაზე იქნება დამოკიდებული“. მან მასკი პირდაპირ არ ახსენა, თუმცა მოუწოდა გერმანელებს წინ აღუდგნენ მანიპულაციებს და დაიცვან დემოკრატია. „ბოლოსდაბოლოს ახალი წლის ღამეს სურვილების ჩაფიქრება ხდება. მე…

ევროკავშირი მზად არის უკრაინის გავლით რუსული გაზის ტრანზიტის შეწყვეტისთვის. ევროკომისიის წარმომადგენლის თქმით, ევროპული ინფრასტრუქტურა საკმარისად მოქნილია იმისათვის, რომ მესამე ქვეყნებიდან გაზი ალტერნატიული მარშრუტებით მიაწოდოს ცენტრალურ და აღმოსავლეთ ევროპას. ევროკომისიაში განაცხადეს, რომ ერთ წელიწადზე მეტია, მუშაობდნენ ევროპული თანამეგობრობის წევრ ქვეყნებთან, რათა მომზადებულიყვნენ ალტერნატიული სქემებისთვის. ევროპის გაზის ინფრასტრუქტურა კი გაძლიერდა გათხევადებული ბუნებრივი აირის იმპორტის მნიშვნელოვანი სიმძლავრეების წყალობით. ევროკომისიაში ასევე განაცხადეს, რომ ბოლო წლებში ენერგოეფექტურობის გაზრდისა და განახლებადი ენერგიის წყაროების გამოყენების გაფართოების ღონისძიებებმა ასევე გააძლიერეს გაზის მიწოდების საიმედოობა.

ეუთოს თავმჯდომარეების სამეული, რომლის შემადგენლობაშიც ჩრდილოეთი მაკედონია, მალტა და ფინეთი შედიან, 2024 წლის შემაჯამებელ განცხადებას ავრცელებს და აღნიშნავს, რომ რუსეთის მიერ უკრაინის წინააღმდეგ მიმდინარე აგრესია ევროპის უსაფრთხოებას, ნორმებისა და ღირებულებების საერთო სისტემას ძირს უთხრის. „ჩვენ ვადასტურებთ ჩვენს მტკიცე მხარდაჭერას საქართველოს სუვერენიტეტისა და ტერიტორიული მთლიანობის მიმართ. ჩვენ აღვნიშნავთ ჟენევის საერთაშორისო დისკუსიების მნიშვნელობას და მხარს ვუჭერთ კონფლიქტის შედეგად დაზარალებული თემებისთვის რეალური შედეგების მიღწევის მნიშვნელობას, რაც 2024 წელს ყურადღების ცენტრში იყო. ჩვენ ერთგული ვრჩებით დადგენილი ძალისხმევისა და ინიციატივების, მათ შორის ინციდენტების პრევენციისა და მათზე რეაგირების მექანიზმებზე მუშაობის“, – ნათქვამია განცხადებაში.

ჩრდილოატლანტიკური ალიანსის გენერალური მდივანი საქართველოს პრემიერ-მინისტრ ირაკლი კობახიძეს ახალ წელს ულოცავს. მარკ რუტე, ოფიციალურ მილოცვაში, საქართველოს მთავრობის მეთაურს ბედნიერ და წარმატებულ ახალ წელს უსურვებს. „გილოცავთ საუკეთესო სურვილებით და გისურვებთ ბედნიერ და წარმატებულ ახალ წელს“, – აღნიშნულია მარკ რუტეს მისალოც წერილში.

,,ძალიან ცოტა ბიზნესს აქვს სურვილი, ბრიტანეთის მოქმედი პრემიერის ადმინისტრაციის პირობებში, გაერთიანებულ სამეფოში ინვესტიცია ჩადოს”, – განაცხადა მსოფლიოს უმდიდრესმა ადამიანმა და ტრამპის ადმინისტრაციაში აშშ-ის მთავრობის ეფექტურობის დეპარტამენტის მომავალმა თანახელმძღვანელმა. ილონ მასკმა აღნიშნული კომენტარი გააკეთა შოტლანდიელი პოლიტიკოსების წერილის პასუხად, რომლითაც გამოთქვეს სურვილი, Tesla-მ ქვეყანაში საწარმო გახსნას.

,,უკრაინის შეიარაღებული ძალების სპეციალური ოპერაციების ძალების მე-6 პოლკის რეინჯერებმა, შეტევითი მოქმედებების წყალობით, რუსეთის ფედერაციის კურსკის ოლქის ერთ-ერთი დასახლება დაიკავეს”, – ინფორმაციას უკრაინული მედია უკრაინის შეიარაღებული ძალების სპეციალური ოპერაციების ძალებზე დაყრდნობით ავრცელებს. გარდა ამისა, დასახლებული პუნქტის აღებას წინ უძღოდა უკრაინული არტილერიის მუშაობა, რის შემდეგაც ჯარისკაცები შევიდნენ სოფელში, სპეცოპერაციის ფარგლებში აიღეს და გაასუფთავეს რაიონი. ,,აღმოჩნდა, რომ რუს სამხედროებთან ერთად სოფელი ჩრდილოეთ კორეის ჯარებსაც ეკავათ”, – წერია განცხადებაში.

თურქეთის შინაგან საქმეთა მინისტრის ალი ერლიკაიამის განცხადებით, ბაშარ ასადის რეჟიმის დამხობის შემდეგ სირიაში 35 114 სირიელი დაბრუნდა, რომელიც მანამდე ლტოლვილად თურქეთში იყო გადახვეწილი. მისი თქმით, ახლა სირიელთა უმეტესობა ალეპოში ბრუნდება. როგორც ერლიკაიამ დასძინა, დღესდღეობით თურქეთში 3 მილიონი სირიელი ცხოვრობს, რომელთაგან 805 ათასი თურქეთში დაბადებული ბავშვია. ცნობისთვის, 8 დეკემბერს სირიელი ამბოხებულების მიერ ქვეყნის ყველა მსხვილი ქალაქის აღების შემდეგ ბაშარ ასადი ოჯახთან ერთად მოსკოვში გაიქცა, სადაც მას პოლიტიკური თავშესაფარი მისცეს.

სამხრეთ კორეის ანტიკორუფციულმა სააგენტომ განაცხადა, რომ სასამართლომ იმპიჩმენტირებული პრეზიდენტის, იუნ სუკ იოლის დაკავებისა და მისი ოფისის ჩხრეკის შესახებ ორდერები გასცა. ასევე, უწყებამ აღნიშნა, რომ მიმდინარეობს გამოძიება იმასთან დაკავშირებით, იყო თუ არა იუნ სუკ იოლის მიერ საომარო მდგომარეობის გამოცხადება ამბოხება. მათივე თქმით, მან უგულებელყო საგამოძიებო ორგანოების არაერთგზის თხოვნა, მისულიყო დაკითხვაზე და მათთვის ოფისში ჩხრეკის ჩატარების უფლება მიეცა. იუნ სუკ იოლს სისხლისსამართლებრივი დევნისგან საპრეზიდენტო იმუნიტეტი იცავს, მაგრამ ეს არ ვრცელდება ამბოხების ან ღალატის ბრალდებებზე. შეგახსენებთ, რომ იუნ სუკ იოლს უფლებამოსილება შეუჩერდა მას შემდეგ, რაც ოპოზიციის მიერ კონტროლირებადმა ეროვნულმა ასამბლეამ 14 დეკემბერს მხარი…

გერმანიის ვიცე-კანცლერის რობერტ ჰაბეკის განცხადებით, ილონ მასკი აძლიერებს მათ, ვინც ევროპას ასუსტებს. მისი თქმით, მასკის მიერ ულტრამემარჯვენე პარტია „ალტერნატივა გერმანიისთვის“ მხარდაჭერა ლოგიკურია. „ეს ლოგიკური და სისტემატურია. მასკი აძლიერებს მათ, ვინც ევროპას ასუსტებს. სუსტი ევროპა მათ ინტერესებშია, ვისთვისაც რეგულაცია მათი ძალაუფლებისთვის შეუსაბამო შეზღუდვას წარმოადგენს“, – აღნიშნა რობერტ ჰაბეკმა. შეგახსენებთ, რომ ვიცე-კანცლერი რობერტ ჰაბეკი თებერვალში გასამართ ვადამდელ საპარლამენტო არჩევნებზე „მწვანეთა პარტიამ“ კანცლერობის კანდიდატად დაასახელა.

„მივმართავ ჰუსიტებს: თქვენ, ალბათ, არ აქცევთ ყურადღებას იმას, რაც მოხდა ახლო აღმოსავლეთში გასული წლის განმავლობაში. ნება მომეცით, შეგახსენოთ, რა დაემართა „ჰამასს“, „ჰეზბოლას“, ასადს, ყველას, ვინც ჩვენს განადგურებას ცდილობდა. დაე, ეს იყოს თქვენი ბოლო გაფრთხილება. ეს არ არის მუქარა, ეს დაპირებაა. თქვენც იგივე სავალალო ბედს გაიზიარებთ“, – ამის შესახებ გაერო-ში ისრაელის ელჩმა, დენი დანონმა განაცხადა. ელჩმა, გააფრთხილა თეირანი, რომ ისრაელს აქვს შესაძლებლობა ახლო აღმოსავლეთში, მათ შორის ირანში, ნებისმიერ სამიზნეს დაარტყას და რომ ისრაელი არ მოითმენს ირანის მარიონეტების მხრიდან თავდასხმებს.  

იუსტიციის მინისტრმა ანრი ოხანაშვილმა პირველი მოადგილის თანამდებობაზე ლევან ხარანაული დანიშნა. ,,ლევან ხარანაული სამართლის დოქტორი და თსუ-ის იურიდიული ფაკულტეტის ასოცირებული პროფესორია. აქვს საჯარო სამსახურში მუშაობის და აკადემიური საქმიანობის მრავალწლიანი გამოცდილება. არის არაერთი სამეცნიერო კვლევისა და მონოგრაფიის ავტორი”, – ნათქვამია იუსტიციის სამინისტროს მიერ გავრცელებულ ინფორმაციაში.