დღე: იანვარი 24, 2023

უკრაინის პრეზიდენტის ოფისის ხელმძღვანელის მოადგილემ, კირილ ტიმოშენკომ თანამდებობა დატოვა. შესაბამისი ინფორმაცია მან ტელეგრამა-არხზე დაადასტურა. „მადლობა უკრაინის პრეზიდენტს, ვოლოდიმირ ზელენსკის ნდობისთვის და ყოველდღე და ყოველ წუთს კეთილი საქმეების კეთების შესაძლებლობისთვის. მადლობა საოლქო სამხედრო ადმინისტრაციების თითოეულ ხელმძღვანელს. ჩვენ შევძელით ქვეყანაში საერთო გუნდის აშენება. თქვენ ნამდვილად მაგრები ხართ. თქვენ სინათლის ნამდვილი მეომრები ხართ!“ – წერს ტიმოშენკო. ვოლოდიმირ ზელენსკიმ  თანანდებობიდან გადადგომის შესახებ კირილ ტიმოშენკოს განცხადება დააკმაყოფილა. „წარდგენილი განცხადების შესაბამისად, კირილო ტიმოშენკო გათავისუფლდეს უკრაინის პრეზიდენტის აპარატის უფროსის მოადგილის თანამდებობიდან“, – აღნიშნულია პრეზიდენტის განკარგულებაში.  

უკრაინის გენერალური პროკურორის მოადგილემ, რომელიც 2022 წლის ბოლოს ესპანეთში შვებულებაში იმყოფებოდა, თანამდებობის დატოვების შესახებ განცხადება დაწერა. „უკრაინსკაია პრავდას“ ინფორმაციით, მას შემდეგ, რაც ალექსეი სიმონენკოს დასვენების შესახებ ინფორმაცია გასაჯაროვდა, მას გადადგომის შესახებ განცხადების დაწერა სთხოვეს. გავრცელებული ინფორმაციით, სიმონენკო ოჯახთან ერთად 10 დღით, ახალი წლის აღსანიშნად იმყოფებოდა ესპანეთის საკურორტო ქალაქ მარბელიაში. გუშინ, უკრაინის პრეზიდენტმა ხელი მოაწერა განკარგულებას, რომლის თანახმადაც, სახელმწიფო თანამდებობის პირებს უკრაინის საზღვრებს გარეთ გასვლა მხოლოდ სამსახურებრივი მიზნით შეეძლებათ. ,,თანამდებობის პირები საზღვარგარეთ დასასვენებლად ან სხვა არასახელმწიფო მიზნით გამგზავრებას ვეღარ შეძლებენ”- ზელენსკი

უკრაინა Bradley-ის ტიპის ქვეითთა საბრძოლო მანქანებს უახლოეს კვირებში მიიღებს. ამის შესახებ ინფორმაციას „ამერიკის ხმის“ უკრაინული რედაქცია პენტაგონის წარმომადგენელზე დაყრდნობით ავრცელებს. აშშ-ის თავდაცვის უწყების ინფორმაციით, ვაშინგტონის მიერ გამოცხადებული სამხედრო დახმარების ბოლო პაკეტი კონცენტრირებულია უკრაინისთვის ისეთი შესაძლებლობების მიწოდებაზე, რომელთა გამოყენებასაც ისინი დაუყოვნებლივ შეძლებენ, ბრძოლის ველზე ძალთა ბალანსის შესაცვლელად. მედიის ცნობით, აშშ-ის მიერ გამოცხადებული წინა ორი სამხედრო დახმარების პაკეტში Bradley-ს ტიპის ქვეითთა 109 საბრძოლო მანქანაა გათვალისწინებული.