დღე: დეკემბერი 27, 2022

,,შეერთებული შტატები და მისი ნატოელი მოკავშირეები ცდილობენ რუსეთზე გამარჯვება ბრძოლის ველზე მოიპოვონ, რათა ჩვენი ქვეყანა გაანადგურონ,” – ამის შესახებ რუსეთის საგარეო საქმეთა მინისტრმა სერგეი ლავროვმა გამოცემა TASS-სთან ინტერვიუში განაცხადა. მისი თქმით, „ცხელი კონფლიქტის“ ბენეფიციარი შეერთებული შტატებია. „კოლექტიური დასავლეთისა და მათი მარიონეტის, ზელენსკის ქმედებები ადასტურებს უკრაინის კრიზისის გლობალურ ხასიათს. საიდუმლო არ არის, რომ აშშ-ისა და მისი ნატოელი მოკავშირეების სტრატეგიული მიზანია რუსეთის წინააღმდეგ გამარჯვების მოპოვება ბრძოლის ველზე, როგორც ჩვენი ქვეყნის დასუსტების ან უფრო მეტი, განადგურების მექანიზმი. ჩვენი ოპონენტები ყველაფერს გააკეთებენ ამ მიზნის მისაღწევად,” – განაცხადა ლავროვმა.  

უკრაინის შეიარაღებული ძალების გენერალური შტაბის ინფორმაციით, უკრაინელმა ჯარისკაცებმა ზაპოროჟიეს ოლქის ვასილიევსკის რაიონში რუსული ძალების ცოცხალი ძალის კონცენტრაციას ადგილს დაარტყეს. უწყების ცნობით, უკრაინის თავდაცვის ძალების ნაწილებმა, გასული დღის განმავლობაში, ლუგანსკისა და დონეცკის ოლქებში რუსული ძალების თავდასხმები მოიგერიეს და მოწინააღმდეგეს რამდენიმე დარტყმა მიაყენეს. „დაიღუპა და დაიჭრა მტრის 100-მდე ჯარისკაცი. დანაკარგებს შორის არის რუსეთის ფედერაციის უსაფრთხოების ფედერალური სამსახურის 15 თანამშრომელი“, – აცხადებენ გენშტაბში.  

რუსეთის საგარეო საქმეთა მინისტრი სერგეი ლავროვი მიიჩნევს, რომ აშშ ვლადიმერ პუტინის ლიკვიდაციით იმუქრება. ამის შესახებ ლავროვმა „ტასთან“ ინტერვიუში განაცხადა. მისივე თქმით, კრემლზე გამანადგურებელი დარტყმის მიტანის შესახებ პენტაგონის ოფიციალური პირების განცხადებები პუტინის ფიზიკური განადგურების საფრთხეზე მიუთითებს. „თუ ასეთი იდეები ვინმეს თავში მოსდის, ეს ვიღაც კარგად უნდა დაფიქრდეს ამის შედეგებზე“, – განაცხადა ლავროვმა.

რუსეთის საგარეო საქმეთა მინისტრი, სერგეი ლავროვი უკრაინას ულტიმატუმს უყენებს. მისი თქმით, კიევმა უნდა შეასრულოს მოსკოვის შეთავაზებები, წინააღმდეგ შემთხვევაში კი ამ საკითხს რუსეთის არმია გადაწყვეტს. „ჩვენი წინადადებები რეჟიმის მიერ კონტროლირებადი ტერიტორიების დემილიტარიზაციისა და დენაციფიკაციის შესახებ, იმ საფრთხის აღმოფხვრა, რომელიც იქიდან, მათ შორის ჩვენი ახალი მიწებიდან, რუსეთის უსაფრთხოებას ემუქრება, კარგად არის ცნობილი მტრისთვის. საქმე მარტივია: შეასრულეთ ისინი თქვენივე სასიკეთოდ, წინააღმდეგ შემთხვევაში საკითხს რუსული არმია გადაწყვეტს“, – განაცხადა ლავროვმა. მისივე განცხადებით, კონფლიქტის ხანგრძლოვობასთან დაკავშირებით ბურთი “ვაშინგტონისა და მისი რეჟიმის მოედანზეა”. ლავროვის აზრით, მათ შეუძლიათ ნებისმიერ მომენტში შეაჩერონ “უშედეგო წინააღმდეგობა”.

,,ჩვენ არ ვერევით საქართველოს შიდა საქმეებში, საუბარია სიცოცხლის გადარჩენაზე,”- ამის შესახებ უკრაინის პრეზიდენტის ოფისის მრჩევლმა, ალექსეი არესტოვიჩმა განაცხადა. არესტოვიჩი უერთდება რუსი უფლებადამცველის ინიციატივას 4 იანვარს საქართველოს მიხეილ სააკაშვილის მხარდასაჭერად სხვადასხვა ქალაქებში საქართველოს საელჩოებთან აქცია გაიმართოს. ,,ჩვენ არ ვერევით საქართველოს შიდა საქმეებში. საუბარია სიცოცხლის გადარჩენაზე. ადამიანის ყველაზე მთავარი უფლების დაცვაზე. როდესაც ადამიანი კვდება და არსებობს ტოქსიკოლოგიური დასკვნა მოწამვლაზე, როდესაც მომაკვდავი პირი მონაწილეობს სასამართლოში და სასამართლო ვერ ეხმარება მას, ასეთი სასამართლო ვერ ჩაითვლება სამართლიანად. თქვენ გამოდიხართ ადამიანის მხარდასაჭერად რომელსაც საჩვენებლად ანადგურებენ ციხეში. ეს  ადამიანობის წინააღმდეგ დანაშაულია”, – განაცხადა არესტოვიჩმა.

უკრაინის პრეზიდენტის, ვოლოდიმირ ზელენსკის განცხადებით, დონბასში არსებული მდგომარეობა რთული და მწვავეა. ზელენსკი მადლობას უხდის უკრაინის ყველა დამცველს, რომლებიც მტკიცედ იკავებენ პოზიციებს და ცდილობენ განდევნონ ოკუპანტები უკრაინის ტერიტორიიდან. „ბახმუტი, კრემინა და დონბასის სხვა ტერიტორიები. მდგომარეობა იქ მძიმე და მწვავეა. ოკუპანტები იყენებენ მათ ხელთ არსებულ ყველა რესურსს – და ეს მნიშვნელოვანი რესურსებია – იმისათვის, რომ ცოტაოდენ წინსვლას მაინც მიაღწიონ“, – აღნიშნავს ზელენსკი.  

უკრაინის პრეზიდენტსა და ინდოეთის პრემიერ-მინისტრს, ნარენდრა მოდის შორის სატელეფონო საუბარი გაიმართა. უცხოური მედიის ინფორმაციით, ინდოეთის პრემიერმა ზელენსკის “ცეცხლის დაუყოვნებლივ შეწყვეტისკენ” მოუწოდა. სატელეფონო საუბრის შემდეგ ვოლოდიმირ ზელენსკიმ  „ტვიტერზე“ დაწერა, რომ სწორედ „დიდი ოცეულის“ სამიტზე განაცხადა საკუთარი ხედვის შესახებ, რა პირობებში შეიძლება, დასრულდეს ომი და ახლა ამ გეგმის რეალიზებაში ინდოეთის დახმარების იმედი აქვს.