დღე: ნოემბერი 11, 2022

ზამთრის მოახლოებასთან ერთად, უკრაინა უფრო მეტად ფრთხილობს და ემზადება. ამჯერად, უკრაინა ბელარუსთან საზღვარზე კედელს აშენებს. ინფორმაციას ვოლოდიმირ ზელენსკის ოფისის ხელმძღვანელის მოადგილე, კირილ ტიმოშენკო ავრცელებს. ტიმოშენკოს თქმით, უკრაინის ჩრდილოეთ საზღვარზე კედელი შენდება, ხოლო რუსეთთან მოსაზღვრე ოლქებში კი ფორტიფიკაციებითაც ამაგრებენ. “ჩრდილოეთით მუშაობა დუღს – აქ ბელარუსთან საზღვარზე კედელს აშენებენ… თხრილი, ბორცვი, რკინაბეტონის ღობე მავთულხლართებით – ესაა საინჟინრო ბარიერები, რომლებსაც ვოლინის ოლქში აშენებენ. ასე უკვე მოწყობილია საზღვრის დაახლოებით 3 კილომეტრი, მუშაობა გრძელდება. ეს ყველაფერი არაა, მაგრამ ყველა დეტალს არ გავამხელთ. მუშაობა მიმდინარეობს ასევე რივნესა და ჟიტომირის ოლქებში”, – წერს ტიმოშენკო.  

უკრაინული მხარის განცხადებით, ოკუპანტების მხრიდან საცხოვრებელი კორპუსის დაბომბვის შედეგად, გარდაცვლილთა რაოდენობა მზარდია. როგორც  უკრაინის საგანგებო სიტუაციების სახელმწიფო სამსახურში აცხადებენ, დაბომბილი საცხოვრებელი კორპუსის წმენდა ამ დრომდე გრძელდება. „რუსეთის ძალების მიერ მიკოლაევის დაბომბვის შედეგად დაღუპულთა რიცხვი შვიდამდე გაიზარდა. ხუთსართულიან საცხოვრებელ სახლს მოხვდა. ნანგრევების გაწმენდა ამ დრომდე გრძელდება“ – აცხადებენ საგანგებო სიტუაციების სამსახურში.

უკრაინის თავდაცვის სამინისტრო განცხადებას ავრცელებს, რომლითაც რუს სამხედროებს მიმართავს. უწყების ცნობით, ხერსონი უკრაინის კონტროლ ქვეშ ბრუნდება და რუსი დამპყრობლების უკან დახევის მარშრუტები უკრაინის არმიის საცეცხლე კონტროლის ქვეშაა. ,,როგორც მოსალოდნელი იყო, უკრაინული ხერსონიდან რუსული არმიის ჯარების ძირითადი დაჯგუფების გაყვანის შემდეგ, თქვენმა სარდლობამ მიგატოვათ. თქვენი მეთაურები მოგიწოდებენ, ჩაიცვათ სამოქალაქო ტანსაცმელი და სცადოთ ხერსონიდან თავის დაღწევა. ცხადია, წარმატებას ვერ მიაღწევთ. ხერსონი უკრაინის კონტროლ ქვეშ უბრუნდება, ქალაქში უკრაინის შეიარაღებული ძალების ქვედანაყოფები შედიან. რუსი დამპყრობლების უკან დახევის მარშრუტები უკრაინის არმიის საცეცხლე კონტროლის ქვეშაა. უკრაინის შეიარაღებულ ძალებთან დაპირისპირების ნებისმიერი მცდელობა აღიკვეთება. ყველა რუსი სამხედრო, რომელიც წინააღმდეგობას გაგვიწევს,…

რუსეთის პრეზიდენტი, ვლადიმერ პუტინი ”დიდი ოცეულის” სამიტზე ონალინ ფორმატითაც არ მიიღებს მონაწილეობას. ამის შესახებ კრემლის პრესსპიკერმა დიმიტრი პესკოვმა განაცხადა. პესკოვის თქმით, არ იგიგმება პუტინის ონლაინ დასწრება ”დიდი ოცეულის”  და APEC-ის სამიტებზე ან მისი ვიდეოს გაგზავნა მონაწილეებისთვის. პესკოვის თქმით, ამას პუტინის განრიგი და რუსეთში ყოფნის აუცილებლობა განაპირობებს. რუსეთის დელეგაციას ”დიდი ოცეულის” სამიტზე რუსეთის საგარეო საქმეთა მინისტრი, სერგეი ლავროვი უხელმძღვანელებს.  

უკრაინის შეიარაღებული ძალები ხერსონში შევიდნენ. ამის შესახებ ინფორმაცია და ფოტომასალა სხვადასხვა უკრაინული ტელეგრამ არხებით ვრცელდება. გავრცელებულ ფოტოებში ჩანს, რომ ხერსონის მცხოვრებლებმა ქალაქის ცენტრალურ მოედანზე უკრაინის დროშები აღმართეს. აღნიშნული ინფორმაცია ოფიციალურად ჯერჯერობით არ დადასტურებულა. ცნობისთვის რუსეთის თავდაცვის მინისტრმა, სერგეი  შოიგუმ ხერსონიდან გასვლის ბრძანება 9 ნოემბერს გასცა.

ოპოზიციონერი დეპუტატის, გრიგოლ ვაშაძის განცხადებით, წარმოდგენა არ აქვს  და არ აინტერესებს რა ხდება „ერთიან ნაციონალურ მოძრაობაში“. „წარმოდგენა არ მაქვს რას მელაპარაკებით, შენს ოჯახში რა ხდება ვიცი? აი, ისე არ ვიცი იქ რა ხდება. არ ვიცი, არ მაინტერესებს. ქალიშვილი მყავს დაფიცებული სიტყვას არ ვამბობ საქართველოს შიდა პოლიტიკაზე“, – განაცხადა ვაშაძემ “ტვ პირველთან”.

,,ყველა ამბობს, რომ ნატო-ს კარი ღიაა, მაგრამ საჭიროა ამ კარამდე მიღწევა,” – ამის შესახებ უკრაინის პრეზიდენტმა, ვოლოდიმირ ზელენსკიმ CNN-თან ინტერვიუში განაცხადა. მისი თქმით, უკრაინას სჭირდება უსაფრთხოების გარანტიები. მსოფლიოს სჭირდება უკრაინისთვის უსაფრთხოების გარანტიები, რადგან ამაზეა დამოკიდებული სტაბილურობა. „გამარჯვების შემდეგ, მშვიდობის დამყარების შემდეგ, არ გვსურს ისევ დავუბრუნდეთ იგივე სიტუაციას და ეს შეიძლება მოხდეს. როგორც გითხარით, რუსეთის ამჟამინდელ ხელისუფლებას უნდა პაუზა ამა თუ იმ ფორმით, მინსკის შეთანხმების მსგავსი, ან სხვა შეთანხმებით, მათ სურთ პაუზა. ისინი მოიკრებენ ძალებს, ფულს, იარაღს, დაიწყებენ მზადებას და როდესაც ყველაფერ ამას მოამზადებენ, ისინი დაიწყებენ თავდასხმას, რადგან მათ ერთადერთი მიზანი…

რუსეთის პრეზიდენტის პრესსპიკერის, დიმიტრი პესკოვის განცხადებით, რუსული ჯარების გაყვანა ხერსონიდან დნეპრის მარცხენა სანაპიროზე არ შეცვლის რუსეთის მიერ ანექსირებული ხერსონის რეგიონის სტატუსს. ,,ეს არის რუსეთის ფედერაციის სუბიექტი, ეს სტატუსი არის იურიდიულად განსაზღვრული და დაცული. აქ არანაირი ცვლილება არ არის და არ შეიძლება იყოს”, – განაცხადა პესკოვმა. მისივე თქმით, კრემლი ხერსონიდან უკან დახევას  დამამცირებლად არ მიიჩნევს.

კიევის საკრებულოს II სესიის პლენარულ სხდომაზე 64-მა დეპუტატმა მიიღო გადაწყვეტილება რუსული ენის სკოლამდელი და ზოგადსაგანმანათლებლო დაწესებულებების სასწავლო პროგრამებიდან ამოღების შესახებ. კიევის საკრებულოს დეპუტატის, განათლებისა და მეცნიერების კომისიის ხელმძღვანელის, ვადიმ ვასილუჩკის განცხადებით, რუსეთის ფედერაციასთან ომის პირობებში ბაღებსა და საჯარო სკოლებში რუსული ენის შესწავლა არ არის მართებული. ,,რუსეთის ფედერაციის ლიდერებმა არაერთხელ განაცხადეს, რომ „რუსეთი აღწევს იქამდე, სადამდეც გავრცელებულია რუსული ენა“. აქედან გამომდინარე კიევის საკრებულოს დეპუტატთა კორპუსმა მიიღო გადაწყვეტილება, რომელიც საზოგადოებაში დაძაბულობის ესკალაციისა და კიევის საგანმანათლებლო სივრცის დაცვის საშუალებას მისცემს აგრესორი სახელმწიფოს ჰიბრიდული გავლენებისგან. ენა მნიშვნელოვანია და ომის დროს ეს ეროვნული უსაფრთხოების საკითხია”…

აზერბაიჯანის პრეზიდენტი ილჰამ ალიევის განცხადებით, მიღებულ ერთობლივ განცხადებებში აზერბაიჯანმა და სომხეთმა ოფიციალურად აღიარეს ერთმანეთის სუვერენიტეტი, რაც აჩვენებს, რომ ყარაბაღის კონფლიქტი წარსულში დარჩა. „ოქტომბერში პრაღასა და სოჭში მიღებულ ერთობლივ განცხადებებში აზერბაიჯანმა და სომხეთმა ოფიციალურად აღიარეს ერთმანეთის სუვერენიტეტი. ეს კიდევ ერთხელ აჩვენებს, რომ ყარაბაღის კონფლიქტი წარსულში დარჩა. ყარაბაღის მეორე ომის შედეგები რეგიონისთვის ახალ შესაძლებლობებს ხსნის. აზერბაიჯანი აქტიურად მუშაობს ზანგეზურის დერეფნის შექმნაზე და თავის ტერიტორიაზე დერეფანთან დაკავშირებულ ფართომასშტაბურ საქმიანობას ეწევა. ზანგეზურის დერეფნის გახსნა სარგებელს მოუტანს რეგიონის ყველა ქვეყანას“, – განაცხადა ალიევმა.

,,ბაქო-თბილისი-ჯეიჰანის ნავთობსადენის პროექტი მსოფლიოში ერთ-ერთი ყველაზე წარმატებული ენერგეტიკული ინიციატივაა,” – ამის შესახებ თურქეთის პრეზიდენტმა, რეჯეფ თაიფ ერდოღანმა სამარყანდში, თურქულენოვან სახელმწიფოთა ორგანიზაციის სამიტზე სიტყვით გამოსვლისას განაცხადა. მისი თქმით, ანკარა მზად არის თურქულენოვან სახელმწიფოებთან აქტიური თანამშრომლობისთვის ყველა მიმართულებით. „ანკარა დიდი ხანია, ახორციელებს თურქეთის და რეგიონის ენერგოუსაფრთხოების უზრუნველყოფის ინიციატივებს. ბაქო-თბილისი-ჯეიჰანის ნავთობსადენის პროექტი მსოფლიოში ერთ-ერთი ყველაზე წარმატებული ენერგეტიკული ინიციატივაა“, – განაცხადა ერდოღანმა.  

უკრაინის შეიარაღებული ძალების გენერალური შტაბის ინფორმაციით,  რუსმა ოკუპანტებმა ომის დაწყებიდან დღემდე, დაახლოებით 79 400 ჯარისკაცი დაკარგეს. გენშტაბის ცნობით, ოკუპანტების სამხედრო დანაკარგი ასეთია:ჯარისკაცი – დაახლოებით 79 400; ​ტანკი – 2 814; ჯავშანტექნიკა – ​5 696; საარტილერიო სისტემა – 1 817; სარაკეტო სისტემა – 393; საზენიტო საბრძოლო სისტემა – 205; თვითმფრინავები – 278; ვერტმფრენი – 261; ოპერატიულ-ტაქტიკური უპილოტო საფრენი აპარატი – 1 505; საკრუიზო რაკეტები – 399; საავტომობილო ტექნიკა და საწვავის ავზები – 4 259; გემი/ნავი/კატარღა – 16; ​ სპეციალური აღჭურვილობა – 159.