დღე: თებერვალი 26, 2022

BBC-ის ინფორმაციით, ევროპის რამდენიმე ქვეყანამ რუსული ავიაკომპანიებისთვის საკუთარი საჰაერო სივრცე ჩაკეტა. ბოლო მონაცემებით, რუსული ავიაკომპანიებისთვის საჰაერო სივრცე გაერთიანებულმა სამეფომ, ესტონეთმა, ლატვიამ, ლიეტუვამ, პოლონეთმა, ბულგარეთმა და ჩეხეთმა ჩაკეტეს.

უკრაინის პრეზიდენტის ვოლოდიმირ ზელენსკის თქმით, უკრაინას მსოფლიო ლიდერები უდგას გვერდით. “ვესაუბრე ინდოეთის პრემიერ-მინისტრს, ნარენდა მოდის. მას ინფორმაცია მივაწოდე იმის შესახებ, თუ როგორ პასუხობს უკრაინა რუსეთის აგრესიას. ახლა 100 000-ზე მეტი დამპყრობელი იმყოფება ჩვენს მიწაზე. ისინი ისვრიან საცხოვრებელი კორპუსების მიმართულებით. ინდოეთს მოვუწოდე აღმოგვიჩინოს პოლიტიკური მხარდაჭერა გაერო-ს უშიშროების საბჭოში. შევაჩეროთ აგრესორი ერთად!“- წერს ზელენსკი. პრეზიდენტის თქმით, დახამრება საბერძნეთმაც და შვეიცარიამაც აღმოუჩინეს უკრაინას, რისთვისაც ის დიდ მადლობას უძღვნის მათ.

ბრიტანეთის თავდაცვის სამინისტრომ გაავრცელა ინფორმაცია, რომ რუსული ძალების დიდი ნაწილი ამჟამად კიევის ცენტრიდან 30 კილომეტრშია. ბრიტანეთი რუსეთს აფრთხილებს, რომ დამიანური დანაკარგი მათი მხრიდან დიდი ალბათობით მძიმე და იმაზე დიდი იქნება, ვიდრე ისინი ამას ელიან ან აღიარებენ კრემლში. რუსული მხარე კი აცხადებს, რომ საომარი მოქმედებების შედეგად ადამიანური დანაკარგი რუსეთს ჯერ არ აქვს.

უკრაინული მედიის ინფორმაციით, უკრაინის შეიარაღებულმა ძალებმა რუსი დამპყრობლების კოლონას რაკეტებით დაარტყეს – განადგურდა დაახლოებით 20 ერთეული სამხედრო ტექნიკა. მათივე ცნობით, რუსებზე თავდასხმა ჩერნიგოვის რაიონში, გოროდნიას მიდამოებში მოხდა. ჩერნიგოვის რაიონში, გოროდნიასთან უკრაინის შეიარაღებულმა ძალებმა სარაკეტო შეტევა განახორციელეს მტრის კოლონაზე. ხანძრის შედეგად რუსული არმიის ნაწილებმა დანაკარგი განიცადეს. მათ აქვთ პერსონალის დიდი დანაკარგი, ბევრია დაჭრილი“, – ნათქვამია განცხადებაში.

კიევში „კომენდანტის საათის“ დაწყების დრო შეიცვალა. დღეიდან ის 17:00 საათიდან დაიწყება და დილის 8 საათამდე გაგრძელდება. ამის შესახებ ინფორმაციას დედაქალაქის მერი ვიტალი კლიჩკო ავრცელებს. აღნიშნული შეზღუდვა 28 თებერვლის დილამდე იმოქმედებს. “ყველა სამოქალაქო პირი, ვინც იქნება გარეთ “კომენდანტის საათის” მოქმედების დროს ჩაითვლება მტრის დივერსიული-დაზვერვითი ჯგუფის წევრად. გთხოვთ გაგებით მოეკიდოთ ვითარებას და არ გამოხვიდეთ გარეთ,”- განაცხადა კლიჩკომ.  

საქართველოს მთავრობის განკარგულებით, უკრაინაში მოსახლეობის დასახმარებლად, მთავრობის სარეზერვო ფონდიდან 1 მილიონი ლარი გამოიყოფა. “სარეზერვო ფონდიდან გამოყოფილი თანხით, საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტრო უკრაინაში მიმდინარე მოვლენებთან დაკავშირებით, დაზარალებული მოსახლეობისათვის ფარმაცევტულ პროდუქტებსა და სამედიცინო დანიშნულების საგნებს შეისყიდის”, – ნათქვამია მთავრობის განცხადებაში.  

უკრაინის პრეზიდენტის, ვოლოდიმირ ზელენსკის თქმით, რუსეთის გეგმა მისი დაჭერისათვის, ჩავარდა. პრეზიდენტი ამბობს, რომ რუსეთი მის დაჭერას გასულ ღამეს აპირებდა. “რუსეთს ჩემი დაჭერის გეგმა ჰქონდა შემუშავებული, თუმცა მათი ეს მიზანი არ შესრულდა და გეგმაც ჩავარდა. უკრაინული ძალები ახლა აკონტროლებდნენ კიევს და მის გარშემო არსებულ მთავარ ქალაქებს”, -განაცხადა ზელენსკიმ. ზელენსკი რუსეთის მოსახლეობას მოუწოდებს, რომ გააძლიერონ ზეწოლა პუტინზე, რათა მალე დასრულდეს ომი და ნაკლები ადამიანის სიცოცხლე შეეწიროს მას.

უცხოური მედიის თანახმად, ჩინეთმა რუსული ნავთობის შესყიდვა შეაჩერა. ამის მიზეზი რუსეთის მხრიდან უკრაინაში შეჭრის შედეგად ამოქმედებული დასავლური ფინანსურ-ეკონომიკური სანქციებია. შემსყიდველები, რომლებიც რუსულ ნავთობს აღმოსავლეთის პორტებში ყიდულობდნენ, აცხადებენ, რომ სანამ სანქციების მოქმედებას ნათელი არ მოეფინება, აჩერებენ ნავთობის შესყიდვას. რუსული ESPO და Sokol მარკის ნავთობის შესყიდვის მომდევნო ეტაპი მარტის შუა რიცხვებში გაიმართება. Urals მარკის ნავთობი კი რომლის ტრანსპორტირებაც შავი ზღვის პორტებიდან ხდება, ამ კვირაში დიდი ფასდაკლებით იყიდება.

რუსეთის თავდაცვის სამინისტრო ავრცელებს ინფორმაციას, რომლის მიხედვითაც საომარი მოქმედებების შედეგად არც ერთი რუსი ჯარისკაცი არ გარდაცვლილა. უკრაინული მხარე კი ასობით გარდაცვლილ რუს ჯარისკაცზე საუბრობს. უკრაინის ვიცე პრემიერმა „წითელ ჯვარს“ გარდაცვლილი რუსი სამხედროების რუსეთის ტერიტორიაზე დაბრუნებაში დახმარება სთხოვა. უკრაინეები თვლიან, რომ საჭიროა რუსეთმა იცოდეს, რამდენი სამხედრო პირია დაღუპული მათი მხრიდან.

უკრაინის პრეზიდენტის ვოლოდიმირ ზელენსკის განცხადებით, იტალიის პრემიერ-მინისტრმა მარიო დრაგიმ სატელეფონო საუბარში ის დაარწმუნა, რომ SWIFT-ის საერთაშორისო პროგრამიდან რუსეთის გარიცხვის გადაწყვეტილებას მხარს დაუჭერს. “ჩვენი სახელმწიფოების უკრაინისა და იტალიის ისტორიაში ახალი გვერდია. სულ ახლახან მარიო დრაგიმ სატელეფონო საუბარში მხარი დაუჭირა რუსეთის გარიცხვას SWIFT-ის საერთაშორისო პროგრამიდან.”, – ზელენსკი. საერთაშორისო მედიის ინფორმაციით, ამერიკის შეერთებული შტატები და ევროკავშირი უკვე სერიოზულად განიხილავენ რუსეთის SWIFT-ის საერთაშორისო პროგრამიდან გარიცხვას.

საქართველოში უკრაინის ელჩმა იგორ დოლგოვმა საელჩოში გამართულ ბრიფინგზე განაცხადა, რომ  რუსეთის ჯარმა თავისი დარტყმა განახორციელა იმ საცხოვრებელი სახლების მიმართულებით, სადაც მშვიდობიანი მოსახლეობა ცხოვრობს. “უკვე მესამე დღეა რაც უკრაინა თავს იცავს. ეს დღე უკრაინის პრეზიდენტმა ბატონმა ვლადიმერ ზელენსკიმ დაიწყო მიმართვით უკრაინისა და მთელი მსოფლიოსადმი. ღამე ამერიკის შეერთებულმა შტატებმა გადაწყვიტა, გამოეყო 600 მლნ დოლარი დამატებითი სახსრების სახით უკრაინის დასახმარებლად. გუშინ ევროკავშირის საბჭომ მიიღო გადაწყვეტილება, რუსეთის ფედერაციის წინააღმდეგ სანქციების პაკეტის შემოღებაზე”, – განაცხადა დოლგოვმა. მისივე თქმით, რუსეთის ჯარმა თავისი დარტყმა განახორციელა იმ საცხოვრებელი სახლების მიმართულებით, სადაც სამშვიდობო მოსახლეობა ცხოვრობს. “მათ დაარტყეს საცხოვრებელი უბანს,…

CNN-ის ინფორმაციით რუსეთის თავდაცვის სამინისტრომ უკრაინის დასახლებული პუნქტების დაბომბვის შესახებ ინფორმაცია უარყო. რუსეთის თავდაცვის უწყების განმარტებით, მათ ნამდვილად განახორციელეს სარაკეტო იერიში უკრაინაზე, მაგრამ სამიზნე მხოლოდ უკრაინის შეიარაღებული ძალების სამხედრო ინფრასტრუქტურა იყო. “რუსეთის ფედერაციის შეიაღებულმა ძალებმა გასულ ღამეს შეუტია უკრაინაში არსებულ სამხედრო ინფრასტრუქტურას საკრუიზო რაკეტების საშუალებით. ვიმეორებ, სამიზნე არის მხოლოდ უკრაინის შეიარაღებული ძალების სამხედრო ინფრასტრუქტურა და არა დასახლებული პუნქტები ან სოციალური ინფრასტრუქტურა“, – განაცხადა გენერალ მაიორმა იგორ კონაშენკოვმა.

უკრაინის საგარეო საქმეთა მინისტრი დმიტრო კულება „ტვიტერის“ გვერდზე ავრცელებს ინფორმაციას, რომ  კვიპროსმა დაადასტურა, რომ ის არ დაბლოკავს გადაწყვეტილებას, რუსეთისთვის Swift-ის აკრძალვის შესახებ. “ჩვენ ეს შევძელით! კვიპროსმა დაადასტურა, რომ ის არ დაბლოკავს გადაწყვეტილებას რუსეთისთვის Swift-ის აკრძალვის შესახებ. უკრაინული დიპლომატია აგრძელებს 24/7-ზე მუშაობას, რათა მიაღწიოს მნიშვნელოვან გადაწყვეტილებებს და დაიცვას უკრაინა რუსი დამპყრობლებისგან”, – წერს კულება. შეგახსენებთ, საერთაშორისო საგადასახადო სისტემა Swift-დან რუსეთის გათიშვას მხარი გერმანიამ და იტალიამაც დაუჭირეს.

რუსეთის სარაკეტო შეტევა ამჯერად საცხოვრებელი კორპუსებისკენ მიემართა. რუსეთის საჰაერო ძალებმა უკრაინაში, ქალაქ კიევში, ლობანოვსკის პროსპექტზე მდგარ კორპუსს ესროლეს. გავრცელებული ინფორმაციით, რუსებმა ვერ შეძლეს კიევის აღება და იერიშები ცალკეულ ადგილებზე მიაქვთ.

15-ზე მეტი ქვეყნის მობილურმა ოპერატორმა უკრაინაში დარეკვა უფასო გახადა. მედიის ინფორმაციით, უკრაინელი ხალხის მხარდაჭერის მიზნით აშშ-ის, კანადის, ავსტრიის, გერმანიის, შვეიცარიის, ფინეთის, შვედეთის, ბალტიისპირეთის, ჩეხეთის, პოლონეთის, ხორვატიის, სერბეთისა და ბოსნია-ჰერცეგოვნის მობილურმა ოპერატორებმა მათი ქვეყნებიდან უკრაინაში დარეკვა უფასო გახადეს.

უკრაინის ქალაქ ვასილკოვისთვის ბრძოლა უკრაინის შეიარაღებული ძალების გამარჯვებით დასრულდა. ამის შესახებ ინფორმაციას ქალაქის მერი ნატალია ბალასინოვიჩი ავრცელებს. მისი თქმით, შტურმი მოგერიებულია და ქალაქში თანდათან სიმშვიდე ისადგურებს. “ბრძოლები უკვე სრულდება. შეიძლება ითქვას, რომ ვასილკოვიში უკვე სიჩუმეა და საშინელი ღამე დასასრულს მიუახლოვდა”, – განაცხადა მერმა. მისი განმარტებით, გუშინდელი დღის შემდეგ ქალაქის სამხედრო შენაერთებსა და აეროდრომებზე სარაკეტო იერიში იყო. ქალაქში გადმოდიოდა დესანტი. ვასილკოვი დედაქალაქ კიევიდან დაახლოებით 35 კილომეტრში მდებარეობს.

უკრაინის პრეზიდენტი, ვოლოდიმერ ზელინსკი Twitter-ზე უახლეს ინფორმაციას აქვეყნებს. საფრანგეთმა უკრაინას საბრძოლო იარაღი და სამხედრო აღჭურვილობა გაუგზავნა. “დიპლომატიურ ფრონტზე ახალი დღე ემანუელ მაკრონთან საუბრით დაიწყო. ჩვენი პარტნიორების იარაღი და აღჭურვილობა უკრაინისკენ მომავალ გზაზეა. ომის საწინააღმდეგო კოალიცია მუშაობს”, – წერს ზელენსკი

უცხოური გამოცემების მიერ გავრცელებული ინფორმაციით, რუსეთის თავდაცვის სამინისტრო ამტკიცებს, რომ რუსმა ჯარისკაცებმა უკრაინის სამხრეთ ნაწილში ქალაქი მელიტოპოლი აიღეს. მელიტოპოლი არის საშუალო სიდიდის ქალაქი, რომელიც მარიუპოლთან – უკრაინის საკვანძო პორტთან ახლოს მდებარეობს.

პრეზიდენტმა ჯო ბაიდენმა სახელმწიფო მდივანს ენტონი ბლინკენს დაავალა, გამოყოს $350 მილიონი, რათა დაეხმარონ უკრაინას უსაფრთხოებასა და თავდაცვაში. თეთრი სახლი უკრაინისთვის $350 მილიონიანი სამხედრო დახმარების დაუყოვნებლივ გაწევისთვის მემორანდუმს აცხადებს. თეთრმა სახლმა დახმარების გაწევაზე მას შემდეგ გავარცელა განცხადება, რაც ჯო ბაიდენსა და უკრაინის პრეზიდენტ ვოლოდიმირ ზელენსკის შორის 40-წუთიანი სატელეფონო საუბარი შედგა. მათ “კონკრეტული თავდაცვითი დახმარების გაწევა” განიხილეს.