დღე: ოქტომბერი 10, 2021

საქართველოს პატრიარქი ბათუმში მომხდარ ტრაგედიასთან დაკავშირებით სამძიმარს გამოხატავს. სამძიმრის ტექსტს საპატრიარქო ავრცელებს. „დიდია მწუხარება, რომელიც ახლახანს ბათუმში მომხდარ ტრაგედიას მოჰყვა. გულითადად ვუსამძიმრებთ გარდაცვლილთა ოჯახის წევრებსა და ახლობლებს, დაზარალებულთ, ვუსამძიმრებთ მთელ საქართველოს. დღეს ყველა ამ ტკივილის თანაზიარია და შეძრულია მომხდარით. ვლოცულობთ გარდაცვლილთათვის. მათი სულების საოხად არაერთი პანაშვიდი იქნა გადახდილი. კვირას, წირვის შემდეგაც, აღევლინება ლოცვა, მათ შორის, სამების საკათედრო ტაძარში. შევთხოვ ღმერთს, მოგვცეს გამძლეობა, მოგვანიჭოს თვისი წყალობა და მშვიდობით აკურთხოს ჩვენი ქვეყანა და ჩვენი ხალხი”, – ვკითხულობთ  სამძიმრის წერილში.

დღეს, 10 ოქტომბერს, საქართველოში მოქმედ ტაძრებში ბათუმში მომხდარი ტრაგედიის დროს გარდაცვლილთა  სულის მოსახსენებელი პანაშვიდი შესრულდება. აღნიშნულთან დაკავშირებით ინფორმაციას საქართველოს საპატრიარქო ავრცელებს. „10 ოქტომბერს, ყოვლადწმინდა სამების სახელობის საპატრიარქო ტაძარში საღვთო ლიტურგიას აღავლენს საპატრიარქო ტახტის მოსაყდრე, სენაკისა და ჩხოროწყუს მიტროპოლიტი შიო (მუჯირი). ლიტურგიის შემდეგ, ისევე როგორც საქართველოს ტაძრების უმრავლესობაში, ბათუმში მომხდარი ტრაგედიის მსხვერპლთა სულის მოსახსენებელი პანაშვიდი შესრულდება“, – ვკითხულობთ განცხადებაში. შეგახსენებთ, რომ ბათუმში, საცხოვრებელი კორპუსის ჩამონგრევას 9 ადამიანის სიცოცხლე ემსხვერპლა, მათ შორის არიან ბავშვებიც.