დღე: იანვარი 11, 2021

მუხიანში, სავაჭრო ცენტრ “ჩემპიონში” ხანძრის ქრობის სამუშაოებისას მეხანძრე-მაშველებმა შენობაში ლეკვი იპოვეს და გადაარჩინეს. შემთხვევის ამსახველი ფოტოები საგანგებო სიტუაციათა მართვის სამსახურის ფეისბუქ გვერდზე გავრცელდა.  შეგახსენებთ, რომ  გლდანში, მუხიანის დასახლებაში, სავაჭრო ცენტ “ჩემპიონში” გაჩენილი ხანძარი ლიკვიდირებულია. ხანძრისას არავინ დაშავებულა. 

მომღერალ თემურ წიკლაურის გარდაცვალებაზე ცრუ ინფორმაციის გავრცელების შემდეგ მისი შვილი, ქეთი წიკლაური პირველ კომენტარს აკეთებს. „ეს დეზინფორმაციაა, რომელიც არ ვიცი, რა უფლებით გაავრცელეს. მე შეკითხვა მაქვს ჟურნალისტებთან, ადამიანობა თუ არ არსებობს, რაღაც ეთიკა და ცენზურა ხომ უნდა არსებობდეს? აღშფოთებული ვარ, მამა ცოცხალია. თუ რამე დააინტერესებთ ჟურნალისტებს, მე დამიკავშირდნენ“, – ამბობს ქეთი წიკლაური.

ხათუნა ლაგაზიძის სახლი გაქურდეს. ამის შესახებ პოლიტოლოგი სოციალურ ქსელში თავად წერს და გაქურდვის შემდეგ სახლისთვის გადაღებულ ვიდეოსაც აქვეყნებს. „წელი „ეგზოტიკური“ გამოწვევით დაიწყო: საინტერესოა რას ეძებდნენ და რა დამიტოვეს“,- წერს ხათუნა ლაგაზიძე.

დღეს, თბილისის საქალაქო სასამართლოში, მიკროსაფინანსო ორგანიზაციაზე თავდასხმის საქმეზე, მძევლად ხელში ჩაგდების ბრალდებით დაკავებული ლევან ზურაბაშვილის წინასასამართლო სხდომა გაიმართება. სასამართლო პროცესი 12:00 საათზე დაიწყება. სხდომის პარალელურად, სასამართლოსთან ზურაბაშვილის მხარდასაჭერი აქცია გაიმართება. ცნობისთვის, წერეთლის გამზირზე მდებარე მიკროსაფინანსო ორგანიზაციაში 31 წლის დავით ზურაბაშვილი შეიჭრა და 19 ადამიანი მძევლად აიყვანა. თავდამსხმელთან სამართალდამცავების მიერ რამდენიმესაათიანი მოლაპარაკებების შედეგად, ბრალდებულმა მძევლად აყვანილი ადამიანები ეტაპობრივად გაათავისუფლა. დავით ზურაბაშვილს საქართველოს პროკურატურამ მძევლად ხელში ჩაგდების ფაქტზე ბრალი საქართველოს სსკ-ის 144-ე მუხლის მეორე ნაწილის „გ“ ქვეპუნქტით წარუდგინა, რაც გულისხმობს ორი ან მეტი პირის მძევლად ხელში ჩაგდებას.

ტრაგედია მოხდა გლდანში – ახალგაზრდა ცოლ-ქმარი სავარაუდოდ, ბუნებრივი აირის გაჟონვის შედეგად გარდაიცვალა. ინფორმაცია ამის შესახებ სოციალურ ქსელში გავრცელდა. ახლობლების თქმით, შემთხვევა 10 იანვარს, დილის საათებში მოხდა. შსს -ს ინფორმაციით მომხდარზე გამოძიება სისხლის სამართლის კოდექსის 240-ე მუხლით დაიწყო.

მომღერალ თემურ წიკლაურის გარდაცვალების შესახებ გავრცელებულ ცრუ ინფორმაციას „ლეიბორისტული პარტიის“ ლიდერი, შალვა ნათელაშვილი გამოეხმაურა. „მამა-პაპათა დაკვირვებით, თუ ცოცხალი ადამიანის გარდაცვალებაზე გავრცელდა ცრუ ხმები, ის ადამიანი უაღრესად დღეგრძელია. დიდხანს სიცოცხლე, ბატონ თემურს“, – წერს ნათელაშვილი სოქცელში. თუმცა, მანამდე ნათელაშვილმა ასეთი სამძიმრის პოსტი გამოაქვეყნა, რომელიც მოგვიანებით წაშალა.

ოკუპირებული აფხაზეთის ე.წ. საგანგებო სიტუაციების სამინისტროს ინფორმაციით, ხანძრის ყველა კერა ჩამქრალია. „წვიმის შედეგად, აფხაზეთში ხანძრის ყველა კერა ჩამქრალია. როგორც მინისტრმაც აღნიშნა, ვითარება მართვადი და კონტროლირებადი იყო. დღეს ხანძარი გაჩნდა ოჩამჩირის რაიონშიც, თუმცა ისიც ჩამქრალია“, – განაცხადა ოკუპირებული აფხაზეთის ე.წ. საგანგებო სიტუაციების სამინისტროს პრესმდივანმა რომან ლაბიამ და აღნიშნა, რომ ჯერ კიდევ არაა დაზუსტებული, რა ფართობია დამწვარი ხანძრის შედეგად. აღსანიშნავია, რომ ბოლო დღეების განმავლობაში ყველაზე მძიმე ვითარება გაგრაში იყო, სადაც ხანძარი დასახლებულ პუნქტებსაც მიუახლოვდა.

უბედური შემთხვევა გლდანში – 17 წლის მოზარდი საცხოვრებელი კორპუსის მე-6 სართულიდან გადავარდა. ბიჭი ადგილზე დაიღუპა. შემთხვევის შემდეგ ღუდუშაურის კლინიკაში გადაიყვანეს არასარულწლოვანის დედა, რომელმაც საკუთარი სურვილით კლინიკა მალევე დატოვა. მომხდარზე გამოძიება სისხლის სამართლის კოდექსის 115-ე მუხლით მიმდინარეობს, რაც თვითმკვლელობამდე მიყვანას გულისხმობს. მომხდარის შესახებ სხვა დეტალები უცნობია.