კახა კალაძის გარდა, მათ ვისაც თბილისის მერობა სურს ამ დრომდე ნარკოტესტი არ ჩაუბარებია. ოპოზიციურ პარტიებში აცხადებენ, რომ მათ ნარკოტიკებთან დაკავშირებით პრობლემა არ აქვთ, თუმცა ისინი საკუთარი დღის წესრიგით მოქმედებენ და არა კახა კალაძის.
“ჩვენი გუნდი მზად ვართ ჩავაბაროთ ნებისმიერი ტესტი, ადამიანების და ქალაქის წინაშე, ხოლო რაც შეეხება კალაძის და გახარიას ამ ურთიერთ გადალაპარაკების პოლიტიკას, ჯობია დაასრულონ, რადგან გახარიამ ვერ ჩააბარა მთავარი ტესტი – პანდემიის პირობებში ვერ მართა ვერცერთი პროცესი, ხოლო კალაძემ ვერ ჩააბარა მთავარი ტესტი – თბილისის წინაში,”- აცხადებს თბილისის მერობის კანდიდატი პარტიიდან “ლელო საქართველოსთვის” ანა ბიბილაშვილი.
თბილისის მერობის კანდიდატი პოლიტიკური პლატფორმიდან “მესამე ძალა” თამარ კეკენაძე კი აცხადებს, რომ ის ცხოვრების ჯანსაღი წესით ცხოვრობს და მის პოპულარიზაციასაც ეწევა.
“ვფიქრობ ეს პოპულისტური განაცხადია ბატონი კახის მხრიდან, ვაპირებ ტესტი ჩავაბარო, მაგრამ მას შემდეგ, თუ მოქალაქეები ამირჩევენ. ეს არის ვალდებულება, რასაც კანონი ყველა საჯარო მოხელეს ავალდებულებს,”- განმარტავს თბილისის მერობის კანდიდატი პოლიტიკური პლატფორმიდან “მესამე ძალა” თამარ კეკენაძე.
კახა კალაძე კი ამბობს, რომ პოლიტიკოსებმა ბიძგი უნდა მისცენ, ჯანსაღი ცხოვრების წესის პოპულარიზაციას.
“ქართული ოცნების” წევრებმა ტესტი ჩააბარეს ვიდრე პარლამენტში შევიდოდნენ, გასაკვირია რატომ არ არის მოთხოვნა მერებთან დაკავშირებით. ალბათ კითხვის ნიშნები არსებობს და ამიტომ არ აბარებენ, ეს მათი გადასაწყვეტია,”- აცხადებს თბილისის მერი, თბილისის მერობის კანდიდატი “ქართული ოცნებიდან” კახა კალაძე.
