“პრემიერის დავალებით, საგარეო უწყება მუშაობს ავღანეთიდან ქართველების უსაფრთხოდ გამოყვანასთან დაკავშირებით” – ხვთისიაშვილი

საგარეო საქმეთა სამინისტრო, მთავრობის ადმინისტრაციასთან ერთად, პრემიერის დავალებით აქტიურად მუშაობს სამშობლოში ავღანეთიდან საქართველოს მოქალაქეების გამოყვანასთან დაკავშირებით, – ამის შესახებ საგარეო საქმეთა მინისტრის მოადგილემ, ალექსანდრე ხვთისიაშვილმა განაცხადა.

როგორც საგარეო საქმეთა მინისტრის მოადგილემ აღნიშნა, მათ ვერ მოახერხეს ღამის განმავლობაში აეროპორტში მისვლა, რადგან ქაბულში მდგომარეობა იყო დაძაბული და არჩიეს, დარჩენილიყვნენ ბაზაზე. ახლა მიმდინარეობს მუშაობა უკვე მათი ბაზიდან ქაბულის აეროპორტში გადასაყვანად, რის შემდეგაც ისინი სამშობლოში გამოემგზავრებიან.

„მოგაწოდებთ ინფორმაციას ავღანეთიდან საქართველოს მოქალაქეების გამოყვანასთან დაკავშირებით. საგარეო საქმეთა სამინისტრო, მთავრობის ადმინისტრაციასთან ერთად, პრემიერის დავალებით აქტიურად მუშაობს საქართველოს მოქალაქეების სამშობლოში დაბრუნებასთან დაკავშირებით.

გუშინ დილით გვთხოვეს დახმარება. დაგვირეკეს და გვთხოვეს დავხმარებოდით საქართველოში ჩამოყვანაში. 2 საათისთვის ჩვენ უკვე გვქონდა უზრუნველყოფილი შესაბამისი რეისი ქაბულის აეროპორტიდან, შეთანხმებული გვქონდა ჩვენს პარტნიორ ქვეყნებთან და ვთხოვეთ ჩვენს მოქალაქეებს, რომ მისულიყვნენ აეროპორტში. სამწუხაროდ, ვერ მოხერხდა მათი აეროპორტში მისვლა იმ მომენტისთვის, როდესაც რეისი იყო დაგეგმილი და უკრაინული ბორტი მათ გარეშე გამოფრინდა.

ამასთან ერთად, ჩვენ სხვა პარტნიორ ქვეყნებთან გვქონდა საუბარი. მათი მხრიდან არის დასტური, რომ მათი გამოყვანა მოხერხდება, თუ ისინი აეროპორტში მოხვდებიან. რამდენიმე რეისი არის კიდევ დაგეგმილი. მათ საწუხაროდ, ვერ მოახერხეს ღამის განმავლობაში აეროპორტში მისვლა, რადგან ქაბულში მდგომარეობა იყო დაძაბული და არჩიეს, დარჩენილიყვნენ ბაზაზე.

ახლა ვმუშაობთ უკვე მათი ბაზიდან ქაბულის აეროპორტში გადასაყვანად. თურქულმა მხარემ დაგვიდასტურა, მზაობა, რომ დაგვეხმარებიან, ისინი მიიყვანონ ჯავშნიანი მანქანებით ქაბულის აეროპორტში, ახლა მიმდინარეობს ეს ოპერაცია დ უახლეს მომავალში იმედია, ისინი ქაბულის აეროპორტში იქნებიან მიყვანილები, საიდანაც ასევე ჩვენი პარტნიორები უზრუნველყოფენ მათ გადმოყვანას საქართველოში.

ამასთან ერთდ, მიღებული იქნება გადაწყვეტილება, რომ საქართველოს მთავრობა გააგზავნის ცალკე ბორტს მათ წამოსაყვანად. შესაბამისად, ახლა მიმდინარეობს ნებართვებთან დაკავშირებული სამუშაოები, ჩვენი თვითმფრინავი ჩაფრინდება ქაბულში და უზრუნველყოფ მათ წამოყვანას უკვე ჩვენი ბორტით.

ესენი არიან კერძო კონტრაქტორები დასაქმებულები არიან კერძო კომპანიაში. ესენი ყოფილი სამხედროები არიან და მუშაობენ კერძო კონტრაქტით. 17 კაცი დასაქმებულია კანადურ კომპანიაში, 6 – ამერიკულ კომპანიაში“, – განაცხადა ალექსანდრე ხვთისიაშვილმა.

მსგავსი თემები