უარი საქართველოს ევროატლანტიკურ კურსსა და მშვიდობიან განვითარებას – არასამთავრობოების შეფასება

  •  

მმართველი გუნდის დღევანდელ გადაწყვეტილებასთან დაკავშირებით, რომელიც ე.წ. შარლ მიშელის დოკუმენტის ანულირებას გულისხმობს, არასამთავრობო სექტორი განცხადებას ავრცელებს. მათი შეფასებით, „ქართული ოცნების“ გადაწყვეტილება არის უარი ევროატლანტიკურ კურსსა და დემოკრატიული რეფორმების გზით ქვეყნის მშვიდობიან განვითარებაზე.

„ხელმომწერი ორგანიზაციები ვეხმიანებით მმართველი პარტიის თავმჯდომარის, ირაკლი კობახიძის, განცხადებას, „ქართული ოცნების“ მიერ 19 აპრილს ევროკავშირის მედიაციით ხელმოწერილი, ე.წ. შარლ მიშელის შეთანხმებიდან გასვლის თაობაზე.

მიგვაჩნია, რომ აღნიშნული გადაწყვეტილება, ხელისუფლების მხრიდან წარმოადგენს აშკარა უარს საქართველოს ევროატლანტიკურ კურსსა და დემოკრატიული რეფორმების გზით ქვეყნის მშვიდობიან განვითარებაზე.

„ქართული ოცნების“ გადაწყვეტილება არის გზა წინასაარჩევნოდ პოლიტიკური კრიზისისა და პოლარიზაციის გაღრმავებისკენ და ემსახურება მხოლოდ ძალაუფლების შენარჩუნების სურვილს, რასაც „ქართული ოცნება“ მზადაა, შესწიროს ქვეყნის კეთილდღეობა, დასავლური კურსი, დემოკრატიული განვითარება და მეგობრული ურთიერთობები სტრატეგიულ პარტნიორებთან“, – ვკითხულობთ განცხადებაში, რომელსაც ხელს აწერენ:

საქართველოს დემოკრატიული ინიციატივა (GDI); საერთაშორისო გამჭვირვალობა-საქართველო (TI Georgia); ღია საზოგადოების ფონდი (OSGF); სამართლიანი არჩევნებისა და დემოკრატიის საერთაშორისო საზოგადოება (ISFED); სამოქალაქო მოძრაობა- სირცხვილია (Shame movement); მმართველობის მონიტორინგის ცენტრი (GMC); საზოგადოება და ბანკები; საფარი საქართველოს ატლანტიკური საბჭო ადამიანის უფლებათა ცენტრი (HRC); საქართველოს რეფორმების ასოციაცია (GRASS); დემოკრატიის კვლევის ინსტიტუტი (DRI); ტოლერანტობისა და მრავალფეროვნების ინსტიტუტი (TDI); კვლევითი ჟურნალისტიკის და ეკონომიკური ანალიზის ცენტრი მედიის განვითარების ფონდი (MDF); სოციალური სამართლიანობის ცენტრი (SJC); ევროპის ფონდი (EPF); ეკონომიკური პოლიტიკის კვლევითი ცენტრი (EPRC); ინფორმაციის თავისუფლების განვითარების ინსტიტუტი (IDFI).

შეგახსენებთ, რომ მმართველმა გუნდმა შარლ მიშელს გაწეული დახმარებისთვის მადლობა გადაუხადა და განაცხადა, რომ მისი ძალისხმევით შექმნილმა დოკუმენტმა მისია შეასრულა და თავი ამოწურა.

მსგავსი თემები