„ოცნება“ – 41; „ნაციონალები“ – ისევ 5 – არჩევნებში მონაწილე პარტიებს რიგითი ნომრები მიანიჭეს

  •  

ადგილობრივი თვითმმართველობის არჩევნებში მონაწილეობისთვის პოლიტიკურ სუბიექტებს ნომერი მიენიჭათ. მმართველი გუნდი ისევ 41 ნომრით გამოვა, „ნაციონალური მოძრაობა“ კი ისევ 5 ნომრით.

ცესკოს განცხადებით, რიგითი ნომრის მინიჭებასთან დაკავშირებით, „საარჩევნო კოდექსში“ ცვლილება შევიდა და  პირველ რიგში, რიგითი ნომრის არჩევის უფლება აქვთ იმ პოლიტიკურ გაერთიანებებს, რომლებმაც წინა საპარლამენტო არჩევნებზე მიიღეს ყველაზე მეტი დაფინანსება.

„მათ ცესკო-ს მიმართეს განცხადებით, არაუგვიანეს მიმდინარე წლის 17 ივლისისა, რიგითი ნომრის არჩევასთან დაკავშირებით. მათი მხრიდან რიგითი ნომრის არჩევის პროცედურას აქვს დამატებითი ნიუანსები. სწორედ ამ საკითხებთან დაკავშირებით დღეს ცესკო-ში გაიმართა შეხვედრა პოლიტიკური გაერთიანებების წარმომადგენლებთან. შეხვედრას ესწრებოდა 11 პოლიტიკური გაერთიანების წარმომადგენელი. ამ შეხვედრას არ დაესწრებიან პოლიტიკური გაერთიანება „ქართული ოცნების“, „ნაციონალური მოძრაობის“ და „გირჩის“ წარმომადგენლები იქიდან გამომდინარე, რომ მათ უკვე მიიღეს გადაწყვეტილება, მიმართეს ცესკო- ს განცხადებით და დაიტოვეს ის რიგითი, რომელიც მათ წინა საპარლამენტო არჩევნებში ჰქონდათ მინიჭებული. რაც შეეხება ცესკო-ს, ჩვენ მოწადინებული ვართ, რომ გავუწიოთ დახმარება ყველა ჩართულ მხარეს საარჩევნო პროცედურასთან დაკავშირებით. ეს შეხვედრა სწორედ ემსახურება იმას, რომ ვისაუბროთ ყველა იმ თემაზე, რომელიც ეხება რიგითი ნომრის მინიჭებას“, – განაცხადა ცესკო-ს პრესსპიკერმა, ნათია იოსელიანმა.

რაც შეეხება სხვა პოლიტიკურ სუბიექტებს, მათი ნომრები შემდეგნაირად განაწილდა:

„ქართული ოცნება – დემოკრატიული საქართველო“ – 41;

„ერთიანი ნაციონალური მოძრაობა“- 5;

„ევროპული საქართველო“- 2 ;

„პატრიოტთა ალიანსი“- 8;

„გიორგი ვაშაძე – სტრატეგია აღმაშენებელი“-1;

„ლელო საქართველოსთვის“- 9 ;

„გირჩი“-36;

„ალეკო ელისაშვილი – მოქალაქეები“ – 7;

„ევროპელი დემოკრატები“ – 6 ;

„ლეიბორისტული პარტია“- 10;

„მოძრაობა სახელმწიფო ხალხისთვის“ – 4;

„რესპუბლიკური პარტია“ -11;

„კანონი და სამართალი“-12;

„პროგრესი და თავისუფლება“ – 21.

მსგავსი თემები