საგარეჯოში, სოფელ ხაშმში, წმინდა გიორგის სახელობის ეკლესიის გაქურდვისთვის პოლიციამ ერთი პირი დააკავა, ხოლო მისი არასრულწლოვანი ძმა ამავე დანაშაულის ჩადენაში ამხილა.
როგორც უწყებაში აცხადებენ, შინაგან საქმეთა სამინისტროს კახეთის პოლიციის დეპარტამენტის საგარეჯოს რაიონული სამმართველოს თანამშრომლებმა, ჩატარებული ოპერატიული და საგამოძიებო ღონისძიებების შედეგად, ქურდობის ბრალდებით 2000 წელს დაბადებული მ.გ. დააკავეს.
ამავე დანაშაულის ჩადენაში მხილებულია დაკავებულის არასრულწლოვანი ძმა – 2004 წელს დაბადებული ლ.გ. დანაშაული 4-დან 7 წლამდე ვადით თავისუფლების აღკვეთას ითვალისწინებს.
„გამოძიებით დადგინდა, რომ ძმებმა – მ.გ.-მ და ლ.გ.-მ, მიმდინარე წლის 7 ივლისს, საგარეჯოს მუნიციპალიტეტის სოფელ ხაშმში მდებარე წმინდა გიორგის სახელობის ეკლესიიდან სხვადასხვა ნივთი მოიპარეს. გამოძიება საქართველოს სისხლის სამართლის კოდექსის 177-ე მუხლის მე-2 ნაწილის “ა” ქვეპუნქტით და მე-3 ნაწილის “ა” ქვეპუნქტით მიმდინარეობს, რაც გულისხმობს წინასწარი შეთანხმებით ჯგუფის მიერ ჩადენილ ქურდობას, რამაც მნიშვნელოვანი ზიანი გამოიწვია“ – აცხადებენ შსს-ში.
შეგახსენებთ, რომ ტაძარი გუშინ გაძარცვეს, საიდანაც თანხა და სხვადასხვა საეკლესიო ნივთები მოიპარეს. მათ შორის, ძვირადღირებული ქვებით მოჭედილი გვირგვინი და საზიარებელი ჭურჭელი.
