პარლამენტის ვიცე-სპიკერი არჩილ თალაკვაძე, ვაქცინაციის დაგვიანებასთან დაკავშირებით ოპონენტების ბრალდებებს პასუხობს და მათ გასულ წლებს ახსენებს, ვინც ხანდაზმულებს კბილები ამოუღო და უკბილოდ დატოვა.
„რაც შეეხება ვაქცინებს, მომეჩვენა თუ ის ხალხი ლაპარაკობს აქ ვაქცინების დაგვიანებაზე, ვინც კბილები ამოუღეთ ხანდაზმულ ადამიანებს? ღიმილიანი საქართველო გახსოვთ თქვენი პროგრამა? და თქვენ გინდათ ახლა დაგვაჯეროთ რომ მართლა წუხართ, რომ ვაქცინამ ორი დღით დაიგვიანა?“, – ასე მიმართა ვიცე-სპიკერმა არჩილ თალაკვაძემ „ნაციონალური მოძრაობის“ წევრებს პლენარულ სხდომაზე.
მისივე თქმით, ყველა მოქალაქე აიცრება და ეს პრობლემა ამოიწურება სრულად.
„მინისტრთან გვაქვს პირდაპირი კომუნიკაცია და მისგან გვაქვს ინფორმაცია, რომ ვისაც ახლა უწევს მეორე ვაქცინაცია, ყველა მოქალაქე აიცრება და ეს პრობლემა ამოიწურება სრულად“, – განაცხადა ვიცე-სპიკერმა.
რაც შეეხება კბილების ამოღების თემას, არჩილ თალაკვაძემ „ნაციონალური მოძრაობის“ პროგრამა – „ღიმილიანი საქართველო“ გაიხსენა რომელიც ხანდაზმულებისთვის სტომატოლოგიურ დახმარებას ითვალისწინებდა.
