„კრწანისი რესორტ რეზიდენსის“ პროექტის დაწყება არის ძალიან მნიშვნელოვანი ჩვენი ქვეყნისთვის, ჩვენი დედაქალაქისთვის და ზოგადად, ჩვენი ეკონომიკური განვითარებისთვის არის ძალიან კარგი სტიმულის მიმცემი პრეცედენტი და მაგალითი, მით უმეტეს პანდემიის ფონზე, – ამის შესახებ, საქართველოს პრემიერ-მინისტრმა, ირაკლი ღარიბაშვილმა, „კრწანისი რესორტ რეზიდენსის“ პროექტის პრეზენტაციის შემდეგ, ჟურნალისტებთან საუბრისას განაცხადა.
პრემიერ-მინისტრმა, ინვესტორს, ნოშრევან ნამორაძეს მთავრობის სახელით მადლობა გადაუხადა.
„ეს არის 200 მლნ დოლარის კერძო ინვესტიცია. ათასობით ადამიანის დასაქმებას გულისხმობს ეს პროექტი და რა თქმა უნდა, ძალიან მისასალმებელია, რომ ასეთი ეკოლოგიური სივრცე, ახალი რეკრეაციული ზონები შეიქმნება ამ პროექტის ფარგლებში. აქვე მინდა აღვნიშნო, რომ ჩვენი მთავრობის ხელშეწყობით, ზოგადად ამ დეველოპერულ, სამშენებლო სექტორს ძალიან დიდი მხარდაჭერა ჰქონდა გასული წლიდან მოყოლებული, ვინაიდან, პანდემიის ეს პრობლემა შეეხო ყველას, აბსოლუტურად ყველა სექტორს“, – აღნიშნა მთავრობის მეთაურმა.
