კლინიკა “გულის” დამფუძნებელის ანზორ მელიას განცხადებით, დიდი სახელმწიფო კლინიკების შექმნა პატარა კერძო კლინიკების “ჩაყლაპვას” გამოიწვევს.
“ქირურგებს ფეხბურთელებივით ყიდულობენ და ეს დაუშვებელია. ეს გააკოტრებს კლინიკებს. სახელმწიფო კლინიკების ნაწილში მინისტრს არ ვეთანხმები. საჭიროა ჯანსაღი კონკურენცია. სახელმწიფო კლინიკები უნდა იყოს ქვეყანაში, თუმცა კერძო კლინიკებს მუშაობის საშუალება უნდა მიეცეს”, – აღნიშნა ანზორ მელიამ.
მისი თქმით, ჯანდაცვის მინისტრის განცხადება, რომ სახელმწიფო კლინიკები კონკურენციის გარანტი იქნებიან, არასწორია, რადგან ისინი კერძო კლინიკას ხარისხით ვერასდროს აჯობებენ.
“ჯანსაღი კონკურენცია უნდა იყოს. სახელმწიფო კლინიკაში მეც ნამუშევარი ვარ და ვიცი, რომ არასოდეს იქნება იქ ისეთი ხარისხი, როგორიც არის კერძო კლინიკაში, რომელიც თავის ავტორიტეტს უფრთხილდება. თავისუფალ ბაზარზე ასე არ შეიძლება.
კი ბატონო გააკეთონ, უნდა იყოს (სახელმწიფო კლინიკები), მაგრამ კერძო კლინიკებსაც უნდა მისცენ საშუალება იმუშაონ. ახალი რეგულაციები შემოიტანეს: 31 დეკემბრამდე გვქონდა განაცხადების შეტანის უფლება, ახალი კაბინეტები გავაკეთეთ, ახალი სესხები ავიღეთ. არ იქნება სწორი გახსნან სახელმწიფო კლინიკები და კერძო კლინიკებს პრობლემები შეუქმნან”, – განაცხადა ანზორ მელიამ.
