„ის ნაბიჯი, რომელიც ვერც ერთმა პოლიტიკურმა ძალამ, ბოლო 30 წლის განმავლობაში ვერ შეძლო, შეძლო „ქართულმა ოცნებამ“, როდესაც დათანხმდა სრულად პროპორციულ საარჩევნო სისტემას“ – აცხადებს პრემიერ-მინისტრი და ქვეყანაში მიმდინარე პოლიტიკურ პროცესებზე საუბრობს.
მთავრობის მეთაურმა ხაზი გაუსვა, რომ ბოლო ერთი წლის განმავლობაში, მმართველმა ძალამ, ხელისუფლებამ, ყველაფერი გააკეთა იმისთვის, რომ ქვეყანაში, პოლიტიკურ პროცესში მეტი პლურალიზმი ყოფილიყო, საქართველოს მეტი მოქალაქის ხმა ყოფილიყო წარმოდგენილი საქართველოს პარლამენტში, უფრო მეტი ახალი, ჯანსაღი პოლიტიკური ძალები გაჩენილიყვნენ.
„სწორედ ამიტომ და ამისთვის იყო მიმართული საარჩევნო რეფორმა, რომელიც პირდაპირ მიუთითებს, რომ პროპორციული სისტემა, საპარლამენტო დემოკრატიის პირობებში, რა თქმა უნდა, ნიშნავს პოლიტიკური კულტურის, პოლიტიკური ველის გაჯანსაღებას. რა თქმა უნდა, ეს ნიშნავს, შესაძლო ახალგაზრდა პოლიტიკური ძალებისთვის პოლიტიკურ ველზე შემოსვლის გამარტივებას. თუმცა, სამწუხაროდ, დღეს რაც გვაქვს, ცოტა სხვა შედეგი მივიღეთ, თუმცა უნდა გვესმოდეს, რომ დემოკრატიზაციის პროცესი არის საკმაოდ რთული, მიზანი და გენერალური ხაზი, რა თქმა უნდა, იყო სწორი, მაგრამ როგორც ჩანს, ცოტა უფრო მეტი მუშაობა მოგვიწევს. სწორედ ამისთვის არის გადადგმული ის ნაბიჯი, რომელიც ვერც ერთმა პოლიტიკურმა ძალამ, ბოლო 30 წლის განმავლობაში ვერ შეძლო, ეს შეძლო „ქართულმა ოცნებამ“, როდესაც დათანხმდა სრულად პროპორციულ საარჩევნო სისტემას“ – განაცხადა პრემიერ-მინისტრმა.
მისივე შეფასებით, საქართველოს მოსახლეობამ, არჩევნებზე მისვლით საკუთარი პოზიცია დააფიქსიდა და ეს მისაღებია.
„ის არჩევნები, რომელიც ჩატარდა, რა თქმა უნდა, არის პროგრესი, იმიტომ, რომ ჩვენ, როგორც შედეგი, დღეს მივიღეთ, ხაზგასმით აღვნიშნავ, პანდემიის პირობებში, დაახლოებით 2 მლნ მოქალაქე, რომელიც სრული პასუხისმგებლობით მივიდა საარჩევნო ყუთთან და მისცა ხმა, შედეგად ჩვენ მივიღეთ პარლამენტი, სადაც გვყავს 9 პოლიტიკური ძალა, პირველად, ქვეყნის ისტორიაში და ჩვენ მივიღეთ პარლამენტი, რომლის დიდი ნაწილიც არის არჩეული პროპორციული სისტემით“, – განაცხადა პრემიერმა.
