ჯანდაცვის მინისტრის, ეკატერინე ტიკარაძის ინფორმაციით, დღევანდელი მონაცემებით, კოვიდკლინიკებში 446 თავისუფალი ადგილია. ამის შესახებ მან ბრიფინგზე განაცხადა.
მისივე განცხადებით, ამ დროისთვის ჰოსპიტალში მკურნალობს 6 600 პაციენტი, მათგან 414 რეანიმაციულ განყოფილებაშია მოთავსებული.
მინისტრის ინფორმაციით, კოვიდსასტუმროში მოთავსებულია 3 900 მოქალაქე, ხოლო 16 000-მდე პირი ბინაზე, ოჯახის ექიმის ზედამხედველობით მკურნალობს.
„ამ ეტაპისთვის 6 600 პაციენტი იმყოფება ჰოსპიტალში, მათგან 1 283 არის ჟანგბადზე, 414 პაციენტი იმყოფება რეანიმაციულ განყოფილებაში და ამ ეტაპისთვის გვაქვს 446 თავისუფალი ადგილი. დღეს სასტუმროებში მკურნალობას გადის 3 900 ჩვენი მოქალაქე. ძალიან მიხარია, რომ სასტუმრო სივრცეებში მიმღეობა მკვეთრად გაიზარდა. ეს აღარ არის უთანხმოების საფუძველი სასწრაფოს ბრიგადებსა და პაციენტებს ან მათ ოჯახის წევრებს შორის. 16 000-ზე მეტი მოქალაქე მკურნალობას გადის ოჯახის ექიმის ზედამხედველობით.
ეს ყოველივე ჯამურად ნიშნავს იმას, რომ დღეს საქართველოს ჯანდაცვის სისტემა ემსახურება დაახლოებით 30 000-მდე კოვიდინფიცირებულს. ვხედავთ, რომ სერვისის მიწოდება უწყვეტია. ალბათ, სოციალურ ქსელებშიც მეტ-ნაკლებად სიმშვიდეა, რაც ჩვენც გვაძლევს იმის საფუძველს, რომ უფრო სტაბილურად გავაგრძელოთ ყველა საჭირო ცვლილება და გაუმჯობესება, რასაც გეგმურად მივყვებით“, – განაცხადა ეკატერინე ტიკარაძემ.
