“კოვიდ 19”-თან ბრძოლაში კერძო კლინიკებიც ჩაერთვებიან – შეხვედრა პრემიერთან

“კოვიდ 19“-ის პანდემიასთან დაკავშირებით პრემიერ მინისტრი კერძო კლინიკების ხელმძღვანელებს შეხვდა და არსებული საწოლფონდის რაოდენობასა და საჭიროების შემთხვევაში, დამატებითი რესურსების მობილიზებაზე ესაუბრა.

შეხვედრა ჯანდაცვის მინისტრისა და ფინანსთა მინისტრის მონაწილეობით გაიმართა. მთავრობის მეთაურმა დეტალური ინფორმაცია მიიღო თითოეულ კლინიკაში არსებული საწოლფონდის რაოდენობის, მათი საჭიროებებისა და დამატებითი რესურსის მობილიზების შესახებ.

გიორგი გახარიამ თითოეული კლინიკის ხელმძღვანელს, ექიმებს, სამედიცინო პერსონალს და ყველა თანამშრომელს განსაკუთრებული მადლობა გადაუხადა იმ ძალისხმევისთვის, რომელსაც ისინი სწევენ კოვიდინფიცირებული პაციენტების მართვის პროცესში.

საუბარი შეეხო იმ ღონისძიებებს, რომლებიც ჰოსპიტალური სექტორის გადატვირთვის თავიდან აცილების მიზნით ხორციელდება. კიდევ ერთხელ აღინიშნა, რომ ამ კუთხით განსაკუთრებული მნიშვნელობა ენიჭება მსუბუქი შემთხვევების მკურნალობას ბინაზე – ოჯახის ექიმთან აქტიური კონსულტაციით, ან კოვიდ-სასტუმროებში, სადაც გაძლიერებულია თერაპიული ელემენტები და უზრუნველყოფილია ინფიცირებულთა მუდმივი სამედიცინო მეთვალყურეობა. კლინიკების ხელმძღვანელებთან შეხვედრისას ხაზი გაესვა იმ ფაქტს, რომ აუცილებელია მხოლოდ და მხოლოდ მძიმე შემთხვევების ჰოსპიტალიზაცია, რათა სისტემა არ გადაიტვირთოს და კლინიკის მიღმა არ დარჩნენ ის ადამიანები, ვისაც სპეციალური სამედიცინო სერვისებით მკურნალობა პირველ რიგში სჭირდება.

ამასთან, კიდევ ერთხელ აღინიშნა, რომ მთავრობა ინარჩუნებს წერტილოვანი და ლოკალური მიდგომების სტრატეგიას და სისტემური შეზღუდვების ამოქმედება არ იგეგმება.

პრემიერ-მინისტრმა შეხვედრისას განაცხადა, რომ ვირუსის გავრცელების ამ ეტაპზე განსაკუთრებული მნიშვნელობა ენიჭება პროცესის ოპერატიულ მართვას, შესაბამისად კლინიკების ხელმძღვანელებთან შეხვედრები კიდევ უფრო ინტენსიური გახდება.

მსგავსი თემები