მორიგი არქეოლოგიური მასალა​ გუდიაშვილის მოედნიდან

​თბილისის ერთ-ერთ ისტორიულ ნაწილში, კერძოდ გუდიაშვილის მოედანზე მიმდინარე სარეაბილიტაციო სამუშაოების დროს მორიგი არქეოლოგიური მასალა – სამი ქვევრი და თიხის ჭურჭლის ფრაგმენტები აღმოაჩინეს.
​სამუშაოები დედაქალაქის მერიისა და თბილისის განვითარების ფონდის პროექტის „ახალი ტფილისი“ ფარგლებში მიმდინარეობს.

​როგორც “მედიაცენტრ მთავარს” თბილისის განვითარების ფონდში განუცხადეს, აღმოჩენილ ქვევრებს და თიხის ჭურჭლის ფრაგმენტებს საქართველოს კულტურული მემკვიდრეობის დაცვის ეროვნული სააგენტო გამოიკვლევს, რომელიც აღნიშნული სარეაბილიტაციო სამუშაოების არქეოლოგიურ ზედამხედველობას ახორციელებს.

​ამავე სამუშაოების ფარგლებში, ივნისის ბოლოს, ბ. ახოსპირელის ქუჩის N4-ში, სარდაფში განლაგებულ სხვადასხვა ზომის ქვევრში კერამიკული ნაწარმი – დიდი, საშუალო და მცირე ზომის, მოჭიქული სამი დოქი, საშულო და მცირე ზომის ჭინჭილაც არის აღმოჩენილი. ისინი ზუსტად იმეორებენ გუდიაშვილის მოედანზე, ახოსპირელის N7/2-ში მდებარე საცხოვრებელი სახლის სარდაფში გამოვლენილ კერამიკულ ჭურჭელზე დატანილ დამღას, წვეროსანი მამაკაცის ანფასს, რომელსაც პირობითად „თბილისელი“ ეწოდა.

 

მსგავსი თემები