გარდაცვლილი თამარ ბაჩალიაშვილის დედა მისი შვილის საქმეში ამერიკის ფედერალური ბიუროს ექსპერტების ჩართვას ითხოვს.
როგორც თეონა თამაზაშვილმა თბილისის პროკურატურაში გამართული შეხვედრის შემდეგ განაცხადა, თუ „ეფბიაის“ გამომძიებლების ჩართვა შეუძლებელია, მისი შვილის საქმეში ფედერალური ბიუროს ექსპერტები უნდა ჩაერთონ.
„ასევე, მოვითხოვე სატელიტის ფოტოები და გვითხრეს, რომ მოთხოვნა გაგზავნილია და პასუხები ჯერ არ არის“, – განაცხადა თამაზაშვილმა.
ამასთან, გარდაცვლილის დედის თქმით, შეხვედრაზე მას უთხრეს, რომ ბაჩალიაშვილის ავტომობილის სიჩქარის გადაცემათა კოლოფზე მისი დნმ-ის კვალია, თუმცა თეონა თამაზაშვილის მტკიცებით, მას გადაცემათა კოლოფზე ხელი არასდროს მოუკიდია.
