თბილისში, ხორავას ქუჩაზე მოზარდების მკვლელობის საქმესთან დაკავშირებით შექმნილი დროებითი საპარლამენტო კომისიის წევრებმა, ყოფილი მთავარი პროკურორის, ირაკლი შოთაძის განმარტებების მოისმინეს.
როგორც ყოფილი მთავარი პროკურორი აცხადებს, როდესაც მისთვის ცნობილი გახდა, რომ 2 მოზარდის მკვლელობის საქმეში თანამშრომლის შვილი ფიგურირებდა, გასცა კონკრეტული მითითება, დაედგინათ მირზა სუბელიანის შვილის ბრალეულობა, ანუ რა როლი ჰქონდა არასრულწლოვანს მკვლელობის ნაწილში.
შოთაძის შეფასებით, ჩატარდა ყველა საგამოძიებო მოქმედება და დადგინდა, რომ მირზა სუბელიანის შვილს არანაირი შემხებლობა არ ჰქონდა ჩადენილ მკვლელობასთან.
“ვინაიდან ჩვენი თანამშრომლის შვილი ფიგურირებდა, გავეცი კონკრეტული მითითება, მაგრამ იმ მითითების გაცემა, რომ გამოიკვეთოს ბრალდებული, მით უმეტეს მკვლელობის საქმეზე, იქ ჩემი ჩარევის საჭიროება არ არსებობდა. მაგრამ ამ შემთხვევაში იყო კონკრეტული ფაქტი, სადაც საუბარი იყო მირზა სუბელიანის შვილის შესაძლო მონაწილეობაზე და ჩემთვის განსაკუთრებული ინტერესის ობიექტს წარმოადგენდა. ჩემი მოსაზრება დღევანდელი გადმოსახედიდან ის არის, რომ ჩატარდა ყველა საგამოძიებო მოქმედება და დადგინდა, რომ მირზა სუბელიანის შვილს არანაირი შემხებლობა არ ჰქონდა ჩადენილ მკვლელობასთან. ეს არის ჩემი პასუხი“, – განაცხადა ირაკლი შოთაძემ დეპუტატების კითხვებზე პასუხისას.
მისივე თქმით, მკვლელობიდან 30 დღის განმავლობაში ყველა შესაძლო და საჭირო, 600-ზე საგამოძიებო მოქმედება განხორციელდა. იგი სრულ ნდობას უცხადებს პროკურორებს, რომლებიც აღნიშნულ საქმესთან დაკავშირებით მას, მთავარი პროკურორის რანგში ინფორმაციას აწვდიდნენ.
“მე რომ წავიკითხო ეს სისხლის სამართლის საქმე, ან ნებისმიერი სისხლის სამართლის საქმე, იმდენი საგამოძიებო და საპროცესო მოქმედება შეიძლება თავში მომივიდეს, ამაზე ახლა არ დავიწყებ საუბარს. ჩემთვის ჩემი პროკურორების მოსაზრება და შეფასება სისხლის სამართლის საქმისა, რასაც ისინი მაწვდიდნენ და რის შესახებაც მერე მე საჯაროდ ვსაუბრობდი, სანდო და მისაღებია დღესაც“ , – აცხადებს ირაკლი შოთაძე.
აღსანიშნავია, რომ ირაკლი შოთაძემ მთავარი პროკურორის თანამდებობა მას შემდეგ დატოვა, რაც ხორავას ქუჩაზე მოკლული მოზარდის, დავით სარალიძის მამამ, პროკურატურა მკვლელობის საქმის არაკეთილსინდისიერად გამოძიებაში დაადანაშაულა და საპროტესტო აქცია გამართა, რასაც მოსახლეობის მხრიდან დიდი მხარდაჭერა მოჰყვა.
