„ქართული ოცნების“ ხელისუფლებაში მოსვლის დღიდან, რეგიონებს განსაკუთრებული ყურადღება ექცევა, სოფლის მეურნეობის განვითარებაში კოლოსალური თანხები ჩაიდო, – ამის შესახებ „ქართული ოცნება – დემოკრატიული საქართველოს“ გენერალურმა მდივანმა, კახა კალაძემ მარნეულში, მარნეულისა და გარდაბნის მაჟორიტარი დეპუტატობის კანდიდატის, ზაურ დარგალის წარდგენაზე განაცხადა.
„მოხარული ვარ და დიდი პატივია, რომ დღეს, ძალიან შრომისმოყვარე, ლაღი და მაგარი ხალხის წინაშე ვიმყოფები. ხალხის, რომელიც საქართველოს აძლიერებს და ჩვენი ქვეყნის მრავალფეროვნებას განსაკუთრებულ ხიბლს სძენს. თქვენი რეგიონი გამორჩეულია ნაყოფიერი მიწებით და რაც მთავარია, ძვირფასი, მშრომელი ადამიანებით.
მოგმართავთ ამ დიდებულ მიწაზე მცხოვრებ საქართველოს მოქალაქეებს. მარნეული და მთიანად ეს მხარე არის ყველაზე ნათელი დასტური, თუ როგორ შეუძლიათ კავკასიელ ხალხებს ერთმანეთის თანადგომით, ურთიერთსიყვარულით და საუკუნოვანი მეგობრობით შექმნან შრომისა და წარმატების მაგალითი. მარნეული ერთ-ერთი ყველაზე ძლიერი და მდიდარი ქალაქია ამ მხარეში და ეს თქვენი, ამ რაიონის მკვიდრების დამსახურებაა. ეს არის ადგილი სადაც ყველა ერთად, მეგობრულად ცხოვრობს, ემსახურება თავისი რაიონის ინტერესებს და ეთნიკური, რელიგიური თუ ნებისმიერი განსხვავებები მხოლოდ ეხმარება და ავსებს აქაურობას სილამაზით და კულტურული მრავალფეროვნებით.
საქართველო ჩვენი ყველას საერთო სამშობლოა და მინდა, მადლობა გითხრათ თითოეულ თქვენგანს, რომ ამ თავდაუზოგავი შრომით ქმნით მარნეულის წარმატებას, რაც ნიშნავს, საქართველოს საერთო წარმატებაში მნიშვნელოვანი წვლილის შეტანას.
„ქართული ოცნების“ ხელისუფლებაში მოსვლის დღიდან, რეგიონებს განსაკუთრებული ყურადღება ექცევა, რაც თუნდაც იმაში გამოიხატება, რომ სოფლის მეურნეობის განვითარებაში კოლოსალური თანხები ჩაიდო, ამოქმედდა სხვადასხვა სახელმწიფო პროგრამა და ეს პროგრამები ძალიან ბევრმა ადამიანმა საკუთარი ბიზნესის განვითარებისთვის, ადამიანების დასაქმებისთვის გამოიყენა.
მარნეულმა და გარდაბანმა საკუთარ თავზე გამოსცადეს, თუ რას ნიშნავს ჰყავდეს მზრუნველი, ეფექტური მთავრობა და ადგილობრივი ხელისუფლება. თქვენს რეგიონში გლობალური პანდემიის, „კოვიდ-19“-ის გავრცელების საფრთხე ძალიან მაღალი იყო. ჩვენ ყველას გვახსოვს, როდესაც ჩაიკეტა მარნეული და რამდენიმე სოფელი, იყო ძალიან ვნებათაღელვა, უკმაყოფილება და ჩვენ ყველას ძალიან კარგად გვესმის ეს ყველაფერი. მაგრამ ის ადამიანები, ვინც იმ დღეებში უკმაყოფილებას გამოხატავდა, კრიტიკულად იყო განწყობილი, დღეს მადლობას გვეუბნებიან, რადგან ყველამ კარგად დაინახა და მიხვდა, თუ რამდენად მნიშვნელოვანია ჩვენი ხელისუფლებისთვის ადამიანის, ადამიანის სიცოცხლე და ჯანმრთელობის უსაფრთხოება. მინდა, ყველას ჯანმრთელობა გისურვოთ“, – განაცხადა კახა კალაძემ.
კალაძის თქმით, კრიზისის პირობებში კარგად გამოჩნდა, რომ რეგიონის მცხოვრებთა გვერდით არიან ძალიან ენერგიული, აქტიური, პატრიოტი ადამიანები, რომლებიც 24 საათი შრომობდნენ, რათა მათ ზიანი მაქსიმალურად არიდებოდა.
„როდესაც ჩვენ ვსაუბრობთ წინგადადგმულ ნაბიჯებზე, განხორციელებულ პროექტებზე, ეს რა თქმა უნდა, კარგია, მაგრამ თვალი უნდა გავუსწოროთ რეალობას და უნდა ვისაუბროთ იმაზეც, რომ არის პრობლემები, გამოწვევები და ეს ყველაფერი ერთად უნდა დავძლიოთ. ეს მხოლოდ და მხოლოდ ერთიანი ძალისხმევითაა შესაძლებელი. მე დარწმუნებული ვარ, თქვენი მხარდაჭერითა და თანადგომით აუცილებლად გავიმარჯვებთ მომავალ საპარლამენტო არჩევნებში“, – განაცხადა კახა კალაძემ.
