სამართალდამცავებმა, „ქურდული სამყაროს“ წევრობისთვის წარსულში ნასამართლევი „კრიმინალური ავტორიტეტები“ დააკავეს. ისინი „კანონიერი ქურდების“ დავალებებით მოქმედებდნენ და მოქალაქეებსა და მეწამეებს სხვადასხვა ოდენობის ფულს სძალავდნენ.
შსს-ს ცენტრალური კრიმინალური დეპარტამენტის უფროსის მოადგილის გიორგი ლილუაშვილის განაცხადებით, მათ ბრალი ქურდული სამყაროს წევრობაში, ცეცხლსასროლი იარაღისა და ნარკოტიკული საშუალებების უკანონო შეძენა-შენახვაში ედებათ.
„გამოძიებით დადგინდა, რომ „კრიმინალური ავტორიტეტები“ და “ქურდული სამყაროს” წევრები – ლ.ბ. და კ.კ. “კანონიერი ქურდების” მითითებებს ასრულებდნენ. მათ შორის, ფიზიკური ანგარიშსწორებით, მუქარითა და “ქურდული გარჩევის” გზით, “კანონიერი ქურდების” დავალებით, მოქალაქეებსა და მეწარმეებს თანხებს სძალავდნენ და ე.წ. ქურდულ საერთოს ავსებდნენ.
პოლიციამ ლ.ბ.-ის დროებითი საცხოვრებელი ბინიდან ნივთმტკიცებად ამოიღო “მაკაროვის” სისტემის ცეცხლსასროლი პისტოლეტი და 8 საბრძოლო ვაზნა, კ.კ.-ის პირადი ჩხრეკისას კი ამოღებულ იქნა დიდი ოდენობით ნარკოტიკული საშუალება “ჰეროინი”.
გამოძიება “ქურდული სამყაროს” წევრობის, ცეცხლსასროლი იარაღისა და ნარკოტიკული საშუალების უკანონო შეძენა-შენახვის ფაქტებზე, საქართველოს სისხლის სამართლის კოდექსის 223-ე პრიმა მუხლის 1-ლი ნაწილით, 236-ე მუხლის მე-3 ნაწილით და 260-ე მუხლის მე-3 ნაწილით მიმდინარეობს“, – აცხადებენ უწყებაში.
დაკავებულებს 7-დან 10 წლამდე პატიმრობა ემუქრებათ.