საპარლამენტო უმრავლესობის ლიდერის მამუკა მდინარაძის განცხადებით, საქართველომ, „ქართული ოცნების“ ხელისუფლებამ შეძლო, ეფექტიანად ემართა ვითარება არა მხოლოდ საგანგებო მდგომარეობის დროს, არამედ მისი დასრულების შემდეგაც.
„ამის კარგი გაგებით ბრწყინვალე იარაღი აღმოჩნდა ის საკანონმდებლო ცვლილებები, რომლებიც ჩვენ მივიღეთ და რომლის გაგრძელებაზეც ახლა არის საუბარი. მოგეხსენებათ, რომ ამ თვის 15-მდე იყო შესაბამისი ვადა, თუმცა გარდა იმისა, რომ ჩვენ ამ რეგულაციებით, შესაბამისი მექანიზმებით ერთი მხრივ ვიცავთ მოქალაქის სიცოცხლეს და ჯანმრთელობას, ასევე ვიცავთ ინტერესს, რომ ეკონომიკას მიადგეს ნაკლები ზიანი. მოგეხსენებათ ასევე ისიც, რომ ამ რეგულაციების არსებობის პირობებში ჩვენ გავხსენით უფრო მეტად ეკონომიკა.
რეგულაციები საჭირო არ გახდა, პირიქით. დღეს ამის ბრწყინვალე მაგალითი იყო, როდესაც ჩვენ გავხსენით ფიტნესკლუბები და სავარჯიშო დარბაზები. ამიტომ ღმერთმა ქნას და არ დაგვჭირდეს, მაგრამ როდესაც საუბარია იმაზე, რომ თუ იქნა მეორე ტალღა, ცუდ ვარიანტში, შესაძლებელია, ეს იყოს სექტემბერში, ოქტომბერში, აქ უკვე დგება მესამე ინტერესის დაცვის საკითხი.
მესამე ინტერესი არის, რომ ჩვენ არჩევნები უნდა ჩავატაროთ დათქმულ დროს, კონსტიტუციით განსაზღვრულ თვეს, დღეს და რიცხვში. შესაბამისად, ეს მესამე ინტერესიც არის არანაკლებ მნიშვნელოვანი. მოგეხსენებათ, იყო ათასგვარი სპეკულაციები ამასთან დაკავშირებით, ხან გადმოწევაზე საუბრობდნენ, ხან იქით გადაწევაზე. არავინ არ აპირებს ამას“, – განაცხადა მდინარაძემ.
