ჩანაწერი არ მინახავს, თუმცა გარკვეული ინფორმაცია რომ არსებობდა, ეს არ დაუმალავს ნიკა გვარამიას, სწორედ ამის გამო გავიძლიერე დაცვა და ფაქტობრივად ტყვედ ვარ ქცეული, – ასე უპასუხა კითხვას, ტელეწამყვანმა, გიორგი გაბუნიამ, რომელიც უკრაინული სააგენტოს მიერ მიხეილ სააკაშვილისა და ზურაბ ადეიშვილის სატელეფონო საუბარს ეხებოდა.
როგორც გიორგი გაბუნიამ აღნიშნა, რადგან ნიკა გვარამიას ჰქონდა ამ საკითხზე ინფორმაცია, გასაკვირი არ არის, რომ ამის შესახებ სხვებსაც სცოდნოდა.
„მე რაც ვიცი, ნიკა გვარამიამ მითხრა, რომ სუს-ისგან ჰქონდა ეს ინფორმაცია, ვინ იყო, რა იყო, არ ვიცი“, – განაცხადა გიორგი გაბუნიამ.
კითხვაზე, გავრცელებული ჩანაწერის მიხედვით, საიდან შეიძლება ჰქონოდათ ინფორმაცია ადეიშვილსა და სააკაშვილს გაბუნიას ლიკვიდაციის მზადებაზე, გიორგი გაბუნიამ აღნიშნა, რომ წლების განმავლობაში ადამიანები, მათ შორის გვარამია ხელისუფლების წარმომადგენლები იყვნენ და კონტაქტები აქვთ.
„შეიძლება ვიღაცამ შეიძლება მიაწოდა ეს ინფორმაცია. მე ასეთი კონტაქტები არ მაქვს“, – განაცხადა გაბუნიამ.
უკრაინულმა ვებგვერდმა obozrevatel.com უკრაინის რეფორმების აღმასრულებელი კომიტეტის თავმჯდომარის, მიხეილ სააკაშვილისა და საქართველოს ყოფილი გენერალური პროკურორის, ზურაბ ადეიშვილის სატელეფონი საუბრის ჩანაწერი გამოაქვეყნა. ვებგვერდის ინფორმაციით, ჩანაწერში მიხეილ სააკაშვილი და ზურაბ ადეიშვილი ტელეკომპანია „მთავარის“ დირექტორ ნიკა გვარამიასა და ტელეწამყვან გიორგი გაბუნიაზე საუბრობენ.
