“არაა აუცილებელი, მოქალაქეებმა ქუჩაში ან ღია სივრცეში იარონ პირბადით – მსგავსი ვალდებულება არ შემოგვაქვს” – არჩილ თალაკვაძე

ახალი რეგულაციით, ჩვენ არ შემოგვაქვს ვალდებულება, რომ მოქალაქეს დილიდან საღამომდე ეკეთოს პირბადე. სამწუხაროდ, ჩვენი ზოგიერთი ოპონენტი ცდილობდა ამ თემით სპეკულაციას. საქმე ეხება მხოლოდ საზოგადოებრივ ტრანსპორტს და ისეთ დახურულ სივრცეებს, სადაც კონტაქტების მაღალი რაოდენობა გენერირდება დღის განმავლობაში, – ამის შესახებ საქართველოს პარლამენტის თავმჯდომარემ პარლამენტის ბიუროს სხდომაზე განაცხადა.

„ეს ნიშნავს იმას, რომ მოქალაქე, რომელიც პირბადეს შეიძენს, შეუძლია, ის გამოიყენოს ზუსტად ასეთ ადგილებში და დაზოგოს მისი გამოყენება. არაა აუცილებელი, ქუჩაში ან ღია სივრცეში იაროს პირბადით. მსგავსი ვალდებულება არ შემოდის“ – განაცხადა არჩილ თალაკვაძემ.

ადმინისტრაციულ სამართალდარღვევათა კოდექსში შესატანი ცვლილებები ბიუროს სხდომაზე დაინიცირდა. მმართველმა გუნდმა მიიღო გადაწყვეტილება და პირბადის გარეშე გადაადგილდება 50 ლარის ნაცვლად 20-დან 30 ლარამდე განისაზღვრება. დღესვე გაიმართება საკომიტეტო მოსმენა და ზუსტი თანხა დადგინდება.

მსგავსი თემები