14 აპრილს თბილისში, დედაენის დღე აღინიშნება

თბილისის მერიის ორგანიზებით, 14 აპრილს, დედაენის დღის აღსანიშნავი ღონისძიებები დედაენის ბაღში  12:00 საათიდან გაიმართება. მოეწყობა სხვადასხვა სივრცე, წიგნების გამოფენა-გაყიდვა, პარალელურ რეჟიმში გაიმართება წიგნების პრეზენტაციები, რომელთა ავტორები ამონარიდებს წაიკითხავენ საკუთარი წიგნებიდან.
ასევე, ნებისმიერ მსურველს შეეძლება, საკუთარი ხელით დაამზადოს ქართული ასოები, მოხატოს 1920 წელს გამოცემული დედაენა, რამდენიმე გვერდი დაბეჭდოს და სამახსოვროდ წაიღოს.
ზუსტად 19:00 საათზე კი დაიწყება დათო ევგენიძის კონცერტი „ანიდან ჰოემდე“.
როგორც თბილისის მერის მოადგილე სოფიო ხუნწარიამ განაცხადა, დედაენის ძეგლთან, ასევე, გაიმართება თბილისის შანიძის სახელობის ხელოვნების სკოლის სიმებიან საკრავთა ორკესტრის კონცერტი და გიორგი ალექსიძის სახელობის თბილისის თანამედროვე ბალეტის პერფორმანსი.
თბილისის მერიის ცნობით, „დედა ენის“ ბაღში განთავსდება იაკობ გოგებაშვილის პირადი არქივიდან „დედა ენის“ სტამბური კლიშეები და ამ სახელმძღვანელოსთვის შექმნილი ლექსებისა და მოთხრობების ორიგინალი სამუშაო ვერსიები, ასევე, „დედა ენის“ შესახებ რეცენზიები და სოლომონ ასლანიშვილი-ბავრელის მიერ შექმნილი „დედაენა“.

მსგავსი თემები