მამუკა გორგოძემ კარიერა დაასრულა

ერთ-ერთი საუკეთესო ქართველი მორაგბე, რომელიც ამჟამად ფრანგულ კლუბ „ტულონის“ ღირსებას იცავს, მსოფლიოში არსებული პანდემიის გამო, სავარაუდოდ, კარიერის ბოლო გამოსამშვიდობებელ მატჩს ვერ ჩაატარებს. მას ფრანგულ კლუბთან კონტრაქტი ივნისის ბოლოს ეწურება, საფრანგეთის პრემიერ მინისტრის განცხადებით კი ქვეყანაში სპორტული ღონისძიებები სექტემბრამდე ვერ განახლდება.

მამუკა გორგოძეს საქართველოს ეროვნული ნაკრების რიგებში 75 მატჩი აქვს ჩატარებული და 27 გატანილი ლელოთი „ბორჯღალოსნების“ ყველა დროის საუკეთესო მელელოვეა. იგი ოთხი მსოფლიოს თასის მონაწილეა და ოთხჯერ დასახელდა მატჩის საუკეთესო მოთამაშედ, მათ შორის ინგლისისა და ახალი ზელანდიის ნაკრებების წინააღმდეგ. ლეგენდარულმა ქართველმა მორაგბემ სანაკრებო კარიერა 2017 წელს დაასრულა, თუმცა 2019 წლის მსოფლიო თასზე დაბრუნდა და ეროვნულ ნაკრებს კიდევ ერთხელ დაეხმარა.

გორგოძე 2011 წლის საქართველს საუკეთესო სპორტსმენად დასახელდა, ის ექვსჯერ აღიარეს საქართველოს საუკეთესო მორაგბედ. 

საქართველოს ნაკრების ექსკაპიტანი 2004 წელს საქართველოს ჩემპიონი გახდა. 2005-2014 წლებში ის „მონპელიეს“ ღირსებას იცავდა, სადაც 168 მატჩში 27 ლელო დადო. 2014 წლიდან კი „ტულონის“ რიგებში ჩაირიცხა, სადაც 110 მატჩში 11 ლელოს ავტორი გახდა. ევროპის წამყვან საკლუბო ტურნირებში ( ტოპ14, ჩემპიონთა თასი, ჩელენჯ ქაფი) ჩატარებული აქვს 300-მდე შეხვედრა.

მსგავსი თემები