საქართველოს პრემიერ-მინისტრის გიორგი გახარიას ინფორმაციით, დონორებთან მოლაპარაკებების შედეგად, წლის ბოლომდე საქართველოს ეკონომიკაში დამატებით 1 მილიარდ 500 მილიონი დოლარი შემოვა.
მისი განმარტებით, ეს არის საბიუჯეტო და მიზნობრივი დახმარებები, რომლებიც მიმართული იქნება, როგორც საბიუჯეტო დახმარების, ასევე კონკრეტულ პროექტებზე.
„მინდა, განსაკუთრებით მადლობა გადავუხადო ევროკავშირს, აზიის განვითარების ბანკს, ევროპის რეკონსტრუქციისა და განვითარების ბანკს, ევროპის საინვესტიციო ბანკს, გერმანიის განვითარების ფონდს, საფრანგეთის განვითარების სააგენტოს. ყველა ის დონორი ორგანიზაციაა, რომელთან მოლაპარაკებების შედეგად დღეს შეგვიძლია, პირველადი მოლაპარაკებების შედეგად განვაცხადოთ, რომ წლის ბოლომდე საქართველოს ეკონომიკაში დამატებით ამ დონორების მხრიდან ეკონომიკის მხარდაჭერის სახით იქნება ინექციის სახით შემოსული 1 მილიარდ 500 მილიონი დოლარი. ეს არის დაახლოებით ის ციფრი, რომელზეც ჩვენ ამ დონორ ორგანიზაციებთან შევთანხმდით პირველადი შეთანხმების საფუძველზე, რომ ეს ინექციები და დახმარება განხორციელება წლის ბოლომდე, მხოლოდ სახელმწიფოს მიმართულებით“, – განაცხადა პრემიერმა.
