„სახელმწიფომ იმის გამო, რომ არ გააჩნია ერთიანი პოლიტიკა ფორს-მაჟორულ სიტუაციასთან მიმართებაში, ამით ჩვენი ყველაზე მოწყვლადი მოსახლეობა გაწირა. რადგან სწორედ ეს ერთიანი პოლიტიკა, ასევე ყველას ვალდებულების გაჩერება ყველას მიმართ, რასაც საქართველოში კოვიდის დაფიქსირების მეორე დღიდანვე მოვითხოვ, იქნებოდა უპირველესი გადარჩენა ხალხისთვის. მითუმეტეს, რომ გვაქვს საგანგებო სიტუაცია თავისი კომენდანტის საათით”, – ამის შესახებ პოლიტიკური მოძრაობა „ტრიბუნას“ ლიდერმა დავით ჭიჭინაძემ განაცხადა.
დავით ჭიჭინაძის განცხადებით, ერთის მხრივ ფაქტია ის, რომ ფინანსურ კომპანიების უმრავლესობას ხელშეკრულებაში აღარ უდევს ფორს-მაჟორი, რამაც 2008 წელს ბევრი ადამიანი გადაარჩინა, მაშინდელი ომის პირობებში ქონების დაკარგვისგან;
“მეორეს მხრივ მინისტრ წულუკიანის განკარგულება, რომლის მიხედვითაც ამუშავდა ეროვნული აღსრულების ბიურო, რაც ნიშნავს იმას, რომ სახელმწიფო გამოვიდა მხოლოდ მევახშეების, მიკროსაფინანსო ორგანიზაციების, ფინანსური სტრუქტურების დამცველი და უმუშევარი, შემოსავლების გარეშე დარჩენილი ადამიანები პირისპირ დატოვა ამ „მოძალადეებთან“. ანუ, თუ ხელისუფლება მევახშეების ეკონომიკას ეძახიან დღეს ეკონომიკას, მაშინ ამ საქმეში ნამდვილად აქვთ წარმატება“, – განაცხადა ჭიჭინაძემ.
