ესპანეთში, კორონავირუსით გარდაცვლილი 34 წლის ცირა ნაჭყებიას ცხედარს შესაძლოა კრემაცია ჩაუტარონ. ოჯახი მსოფლიოში გავრცელებული პანდემიის გამო, საქართველოში ცხედრის გადმოსვენებას ვერ ახერხებს. განიხილება მეორე ვერსიაც – ცხედარი ადგილობრივ სასაფლაოზე დაიკრძალოს, რა შემთხვევაშიც ოჯახს გადმოსვენების უფლება 5-დან 7 წლამდე ვადაში ექნება.
ახალგაზრდა ქალის ქმარი, მამუკა ნაჭყებია მადრიდის ერთ-ერთ კლინიკაში, ორ კვირიან სავალდებულო კარანტინში იმყოფება.
„გთხოვთ, ეს საცოდავი გოგო გადმომასვენებინოთ. საქართველოდან რომ მოვდიოდი ბავშვებმა მთხოვეს დედა ჯანმრთელი ჩამომიყვანეო. ჯანმრთელი ვერ მიმყავს და მკვდარი მაინც მივუყვანო თავის შვილებს. ბავშვები ტირიან, მას პატარა ნიკოლოზი ელოდება. იციან რომ დედა გარდაეცვალათ. საკონსულოში მითხრეს, რომ ეპიდემიის გამო გადასვენება ვერ ხერხდება. მეუბნებიან დავწვათ, ან დავასაფლავოთ და 5 თუ 7 წლის შემდეგ შეგეძლებათ საქართველოში გადასვენებაო. აქაური კანონმდებლობით ასეაო. 5-7 წლის მერე სად დავასაფლავო. რა ვუთხრა ბავშვებს, რომლებიც ჭიშკართან ატირებულები ელოდებიან დედას, დავტოვე დედა ესპანეთში და ჩამოვედი საქართველოში-თქო?! გეხვეწებით დამეხმარეთ რამენაირად და თუ გადავასვენებ, საერთოდ არ მივიყვან სახლში, პირდაპირ სასაფლაოზე წავიყვან და დავასაფლავებ“- ამბობს გარდაცვლილის მეუღლე.
ცირა ნაჭყებია, მეუღლესთან ერთად მადრიდში გასულ თვეს, სიმსივნის სამკურნალოდ გაემგზავრა, ის 20 მარტს კორონავირუსით გარდაიცვალა.
