„შეტევა ,,C“ ჰეპატიტის ელიმინაციის პროგრამაზე. მინდა გითხრათ, რომ სიკეთის დისკრედიტაცია ბოროტებაა“ – ასე აფასებს ჯანმრთელობის დაცვისა და სოციალურ საკითხთა კომიტეტის თავმჯდომარე დიმიტრი ხუნდაძე პროგრამის ირგვლივ წამოწყებულ ნეგატიურ კამპანიას. დეპუტატმა სპეციალური ბრიფინგი გამართა და ბოლო პერიოდში გავრცელებულ განცხადებებზე ისაუბრა.
“ბოლო პერიოდში აქტიურად მიმდინარეობს შეტევა ,,C“ ჰეპატიტის ელიმინაციის პროგრამაზე. მინდა გითხრათ, რომ სიკეთის დისკრედიტაცია ბოროტებაა! საყოველთაო საპატიმრო პროგრამის“ ავტორები, საყოველთაო ჯანმრთელობის დაცვის პროგრამის შემქმნელებს „C“ ჰეპატიტის ელიმინაციას უწუნებენ და თავს ესხმიან სიკეთეს. ეს შემთხვევით არ ხდება, რადგან მათ უნდათ მსოფლიოში უპრეცედენტო პროექტის გაუფასურება – ოღონდ დააზიანონ ხელისუფლება, ოღონდ ჩრდილი მიაყენონ ქართულ ოცნებას, ისინი არ ერიდებიან ამ მნიშვნელოვანი სიკეთის დისკრედიტაციას. მოგეხსენებათ, რომ საქართველო ერთადერთი ქვეყანაა მსოფლიოში, სადაც ,,C’’ ჰეპატიტის ელიმინაციის პროექტი ამ მასშტაბით ხორციელდება“ – აღნიშნა დეპუტატმა.
დიმიტრი ხუნდაძემ წარსული წლებიც გაიხსენა და განაცხადა, რომ ამ მძიმე სენის გამო, ციხეებიდან გვამები გამოჰქონდათ.
„წარსული მძიმე იყო, ციხეებიდან ყოველ 5 დღეში 3 გვამი გამოჰქონდათ და გარეთ, დამატებით, კიდევ ორს ითხოვდნენ. ხალხი ქონებას ჰყიდდა, რომ მკურნალობის საფასური გადაეხადათ. დღეს კი კლინიკები სავსეა პაციენტებით და მათ ჯანმრთელობაზე ჯანდაცვის გასამმაგებული ბიუჯეტი იხარჯება. მიუხედავად სისტემაში არსებული ხარვეზებისა, დღეს ქუჩაში ადამიანი უფულობის გამო აღარ იღუპება“ – აღნიშნა დიმიტრი ხუნდაძემ.
რაც შეეხება პროგრამის ბენეფიციართა სტატისტიკას, დიმიტრი ხუნდაძის თქმით, პროგრამით, ამ დროისთვის 65 000 ადამიანმა ისარგებლა: „C” ჰეპატიტის ელიმინაციის პროგრამით, რომლითაც საქართველო მსოფლიო ყურადღების ცენტრში მოექცა, ამ დროისთვის 65.000 ადამიანმა ისარგებლა. აქედან 58.000-მა უკვე დაასრულა მკურნალობა და მათი განკურნების მაჩვენებელი 98%-ზე მეტია. ამ პროგრამას იწუნებენ იმ ხელისუფლების წარმომადგენლები, რომელთაც ციხეებში ჰყავდათ გამომწყვდეული 25.000-მდე პატიმარი და აქედან, თითქმის ნახევარი ,,C” ჰეპატიტის ვირუსით ინფიცირებული და “სიკვდილის” რეალური კანდიდატი იყო. მაშინ ამ ვითარებამ ევროპულ სასამართლომდეც კი მიაღწია და 5 საქმეზე დაუდგინდა ევროპული კონვენციის მე-3 მუხლის დარღვევა არაადექვატურ მკურნალობასთან და სისტემურ დარღვევებთან დაკავშირებით, რაც არა მხოლოდ პაციენტთა ჯანმრთელობის, არამედ, სახელმწიფოს იმიჯისთვისაც საკმაოდ საზიანო იყო. “ქართული ოცნების” ხელისუფლებაში მოსვლის შემდეგ კი ,,C” ჰეპატიტის მკურნალობის პროგრამა სასჯელაღსრულების სისტემიდან დაიწყო და შემდეგ მის გარეთაც გაფართოვდა.
საბოლოოდ, ევროპის საბჭოს მინისტრთა კომიტეტის 2014 წლის 12 ნოემბრის 1211-ე შეხვედრაზე დადებითად შეფასდა საქართველოს მიერ 2012 წლის შემდეგ გატარებული ღონისძიებები. საქართველოში სკრინინგის მოცვის პროგრამა, რომელიც, ბოლო პერიოდში, კიდევ უფრო გავრცელდა და გაშლილია მთელი ქვეყნის მასშტაბით 1200 წერტილში, ჯანმრთელობის მსოფლიო ორგანიზაციის მიერ არის აღიარებული, მაგრამ არ მოსწონს ჭიაბერაშვილს. გაურკვეველ კალკულაციებს აკეთებს, ივიწყებს წარსულს და ცდილობს, რეალობა თავდაყირა დააყენოს. დაგვიწუნა 65.000 ნამკურნალები პაციენტი და ბრალი დაგვდო, კიდევ 2000 პაციენტის სამკურნალო პრეპარატი გქონდათ და რატომ არ გამოიყენეთო? თითქოს ამ 2000 პაციენტს უარი ვუთხარით მკურნალობაზე. ის კი არ იცის, ან არ უნდა იცოდეს, რომ წამლის მარაგის ზუსტი პროგნოზირება შეუძლებელია და 3-5%-ის ფარგლებში მეტობა დასაშვებია. ეს არ არის დანაშაული. სჯობს, წამალს დააკლდეს პაციენტი, ვიდრე პაციენტს – წამალი. ეს არ არის წამლის გასაღების პროგრამა, ის ემსახურება პაციენტის განკურნებას. სპეკულაცია თითქოს ფინანსური ბარიერი იყო პაციენტთა დაბალი აქტივობის მიზეზი, არასწორია, რადგან ამ პრობლემის სრულად მოხსნის შემდეგაც პაციენტთა ჩართულობის ტემპი რადიკალურად არ გაზრდილა. სამწუხაროა, მაგრამ ადამიანები სხვა პრიორიტეტებს უფრო ანიჭებენ უპირატესობას, ვიდრე საკუთარ ჯანმრთელობაზე ზრუნვას. მაგრამ კიდევ უფრო სამწუხაროა და ამავე დროს მიუღებელიც იმ ადამიანებისაგან “ჭკუის სწავლება”, რომელთაც თავის დროზე, ჰქონდათ შესაბამისი თანამდებობაც და ბერკეტებიც, რომ საქმე ეკეთებინათ“ , – განაცხადა დიმიტრი ხუნდაძემ.
