სამგორის რაიონში დასაქმების ფორუმი გაიმართა

  •  

 

თბილისის სამგორის რაიონში, კერძოდ ვარკეთილის მედიათეკაში, რაიონის საკრებულოს მაჟორიტარისა და სოციალური მომსახურების სააგენტოს ერთობლივი დასაქმების ფორუმი გაიმართა. ღონისძიებაში15-მა კომპანიამ 1500-ზე მეტი თავისუფალი სამუშაო ადგილი წარმოადგინა.

​როგორც “მთავარს” სამგორის რაიონის გამგეობაში განუცხადეს, დასაქმების ფორუმი მნიშვნელოვანი და ეფექტიანი ინსტრუმენტია სამუშაოს მაძიებელთა დასაქმების ხელშეწყობისათვის. ფორუმი სამუშაოს მაძიებლებს უმარტივებს წვდომას ვაკანსიებზე. ასეთ ფართომასშტაბიან ღონისძიებებზე სამუშაოს მაძიებლებს საშუალება აქვთ,ერთ სივრცეში, ერთდროულად გაეცნონ და აარჩიონ სხვადასხვა შეთავაზება რამდენიმე დამსაქმებლისგან, ასევე, უშუალო კომუნიკაცია დაამყარონ პოტენციურ დამქირავებელთან. აღსანიშნავია, რომ ამჯერად ვაკანსიები წარმოდგენილი იყო მომსახურების, გაყიდვების, სამშენებლო და ტურიზმის სფეროებიდან.

მათივე ინფორმაციით, სოციალური მომსახურების სააგენტომ ორგანიზება გაუწია დასაქმების ფორუმში სამგორის რაიონში მომუშავე  მსხვილი და საშუალო დამსაქმებლების ჩართვას. დაგეგმილი ფორუმის შესახებ აცნობა Worknet-ზე დარეგისტრირებულ სამუშაოს მაძიებლებს და უზრუნველყო მათი დასწრება ღონისძიებაზე. ადგილზე მიმდინარეობდა მოქალაქეების რეგისტრაცია დასაქმების პორტალზე.

აღსანიშნავია, რომ რეგისტრაციის შემდეგ სამუშაოს მაძიებლებს ყოველდღიურად, პერსონალურ მობილურ ნომერზე, განახლებული მონაცემები ეცნობებათ შრომის ბაზარზე გაჩენილი ახალი ვაკანტური სამუშაო ადგილების თაობაზე.

სოციალური მომსახურების სააგენტოს დასაქმების პროგრამების დეპარტამენტის უფროსმა დამსწრე საზოგადოებას დასაქმების სერვისებსა და ერთობლივი ღონისძიების მნიშვნელობაზე ესაუბრა. მარიამ ბეზარაშვილმა ფორუმზე მოსულ მოქალაქეებს დეტალურად გააცნო პროგრამებში ჩართვის პროცედურები.

საკრებულოს სამგორის მაჟორიტარმა დეპუტატმა გიორგი დოხტურიშვილმა ერთობლივად ორგანიზებულ ფორუმზე და მოსალოდნელ შედეგებზე გაამახვილა ყურადღება. თავად კომპანიების წარმომადგნელებმა, კი მათი ვაკანსიები და მოთხოვნები პერსონალურად წარმოადგინეს.

 

მსგავსი თემები