პარლამენტის ყოფილი თავმჯდომარე ირაკლი კობახიძე აცხადებს, რომ მმართველ გუნდში შემოთავაზებულ ყველა საარჩევნო მოდელის ვერსიას განიხილავენ.
ირაკლი კობახიძემ აღნიშნა, რომ დიპლომატებმა “გერმანული მოდელის” მაჟორიტარული ნაწილის განხილვა დამოუკიდებლად შესთავაზეს, რის შესახებაც გუნდში იმსჯელებენ.
“ზოგადად, გვექნება გუნდში მსჯელობა ყველა ვერსიასთან დაკავშირებით და, მათ შორის, გუშინ შემოთავაზებულ ვარიანტთანაც დაკავშირებით. ვნახოთ, ამის მიხედვით საით წავა პროცესი. მათ ჰქონდათ წარმოდგენილი ვარიანტი გერმანული მოდელის ფარგლებში და გერმანული მოდელისგან დამოუკიდებლად საერთაშორისო პარტნიორებმა შემოგვთავაზეს ის ნაწილი, რომელიც მხოლოდ მაჟორიტარულ არჩევნებს ეხება,”- განაცხადა ირაკლი კობახიძემ.
შეგახსენებთ, რომ გაერთიანებული ოპოზიციისა და მმართველი გუნდის დიალოგის მეორე რაუნდი საერთაშორისო საზოგადოების ჩართულობით 8 დეკემბერს, სასტუმრო “შერატონ მეტეხი პალასში” დაახლოებით 5 საათის განმავლობაში მიმდინარეობდა.
შეხვედრაზე დიპლომატებმა მმართველ გუნდს მრავალმანდატიანი მაჟორიტარული ოლქების სისტემა შესთავაზეს.
