უახლოეს პერიოდში, “ფორმულა კრეატივი” და დავით კეზერაშვილი, ერთობლივად ტელევიზიას გახსნიან. გავრცელებულ ინფორმაციას ადასტურებს მიშა მშვილდაძე.
მისი განცხადებით, ტელევიზია ზეპარტიული იქნება, არ მოემსახურება ერთი რომელიმე პარტიის ინტერესებსა და გარკვეული ღირებულებების მატარებელ ყველა პარტიაზე იმუშავებს.
ამასთან, “ფორმულა კრეტივის” დამფუძნებელმა, ირაკლი საღინაძემ რამდენიმე დღის წინ განცხადებაც გაავრცელა ტელევიზიის გახსნასთან დაკავშირებით.
“დღეს ქვეყანაში შემქნილი პოლიტიკური ვითარება და აშკარად გაძლიერებული რუსული პროპაგანდა საფრთხეს უქმნის ჩვენი ქვეყნის ეკონომიკურ, პოლიტიკურ და კულტურულ განვითარებას, თავისუფალ სიტყვასა და ადამიანის უფლებებს.
ხელისუფლება ყველანაირად ცდილობს საკუთარი გავლენის ქვეშ მოაქციოს მთელი მედიასივრცე და ჩაახშოს კრიტიკული აზრი. მოქალაქეებს ეზღუდებათ შესაძლებლობა, ჰქონდეთ მრავალმხრივი და სრულფასოვანი ინფორმაცია ქვეყანაში მიმდინარე მოვლენებზე. ეჭვქვეშ დგას კონსტიტუციით დეკლარირებული დასავლური ღირებულებები.
კომპანია “ფორმულა კრეატივი” თანამოაზრეებთან და პარტნიორებთან ერთად ქმნის ახალ მედიაპლატფორმას. გვაქვს სურვილი და ვალდებულება, შევქმნათ ხარისხიანი, უკომპრომისო, სანდო, ოპერატიული და ეფექტური მედია-საშუალება, ახალი ტელევიზია, სადაც ასპარეზი და პოზიციის გამოხატვის საშუალება ექნება ყველა იმ ადამიანს, ორგანიზაციას, პარტიას და ჯგუფს, ვისთვისაც სულერთი არ არის ჩვენი ქვეყნის განვითარებული და ცივილიზირებული მომავალი”, – ვკითხულობთ “ფორმულა კრეატივის” განცხადებაში.
თავის მხრივ, საქართველოს თავდაცვის ყოფილმა მინისტრმა, დავით კეზერაშვილმა, მეგობრებთან ერთად, ახალი ტელევიზიის შექმნის შესახებ განცხადება გაავრცელა. მისი თქმით, უკანასკნელ პერიოდში განვითარებულმა მოვლენებმა ბევრი რამ ახლებურად დაანახა და მიიღო გადაწყვეტილება, ჩაერთოს საქართველოს საზოგადოებრივ ცხოვრებაში.
