“რუსეთში ფრენები ფინანსდება იმისთვის, რომ შვილიშვილმა ნახოს ბაბუა, ნათესავმა ნათესავი, ბიძაშვილმა მამიდაშვილი” – მამუკა ბახტაძე

საქართველოს პრემიერ-მინისტრი, მამუკა ბახტაძე, საქართველოს მთავრობის მიერ, რუსეთში ფრენების დასაფინანსებლად 600 ათასი ევროს გამოყოფის მიზეზებს ხსნის.

მთავრობის მეთაურის განცხადებით, “ქართული ოცნების” ხელისუფლებამ, გადაწყვეტილება საქართველოს იმ მოქალაქეების დახმარების მიზნით მიიღო, რომლებიც რუსეთის ფედერაციაში ცხოვრობენ და ზაფხულის გატარება საქართველოში ჰქონდათ დაგეგმილი. ოპოზიციის კრიტიკას კი მამუკა ბახტაძე პოლიტიკურ ინსინუაციებს უწოდებს. 

“საოცარი შეფასებები ვიხილეთ ამ ინციატივის. ქართულ პოლიტიკაში მოღვაწე ადამიანებს საკმაოდ დიდი ფანტაზია აქვთ. ყველაზე ნაკლები იყო ტურისტული კომპონენტი რატომაც ეს გადაწყვეტილება მივიღეთ. ეს იყო მარტივი გადაწყვეტილება, რომელიც უკავშირდება ჩვენს პასუხისმგებლობას საქართველოს მოქალაქეების წინაშე. იცით, რომ საქართველოს ბევრი მოქალაქე ცხოვრობს რუსეთის ფედერაციაში. ჩვენ ვართ ზაფხულის პერიოდში , ბევრი ადამიანი გეგმავს, რომ ზაფხული გაატაროს საქართველოში, შვილიშვილი ჩამოვიდეს და ნახოს ბაბუა, ბიძაშვილმა ნახოს მამიდაშვილი და ასე შემდეგ. ძალიან მნიშვნელოვანია, რომ როდესაც ჩვენს მოქალაქეებს მსგავსი პრობლემები ექმნებათ, ჩვენ მხარში ამოვუდგეთ, განსაკუთრებით მაშინ როდესაც ეს პრობლემები მათგან დამოუკიდებლად ექმნებათ,“- აცხადებს პრემიერი.

მსგავსი თემები