“ეს არის აგრესია ქართველი ხალხის მიმართ „ნაციონალური მოძრაობისა“ და მისი ბელადის მხრიდან” – მამუკა ბახტაძე

“ეს არ იყო ცალკე აღებული რომელიმე ჟურნალისტის მიერ ნათქვამი სრულიად მიუღებელი ფრაზები; ეს არის წლების განმავლობაში ქართველი ხალხის მიმართ არსებული აგრესია, რომელიც მოდის „ნაციონალური მოძრაობისა“ და მისი ბელადის მხრიდან”, – ამის შესახებ „რუსთავი 2“-ის ეთერში, „პოსტსკრიპტუმის“ წამყვანის, გიორგი გაბუნიას მონოლოგთან დაკავშირებით პრემიერ-მინისტრმა, მამუკა ბახტაძემ განაცხადა.

მთავრობის მეთაურის თქმით, მსგავსი რამ პირველად არ მომხდარა. მისი თქმით, მსგავსი სცენარებით, დესტრუქციული ძალები, დესტაბილიზაციას და ქვეყნის ეროვნული ინტერესების დაზიანებას ცდილობენ.

„ის, რაც ჩვენ გუშინ ვიხილეთ, იყო სრულიად ამაზრზენი და ამორალური საქციელი და ამავე დროს გამიზნული და უბინძურესი პროვოკაცია, რომლის მიზანია საქართველოში დესტაბილიზაცია და ქვეყნის ეროვნული ინტერესების დაზიანება. ეს არავის არ გამოუვა. მსგავსი სცენარები საქართველოში არ მოხდება და ჩვენ ამას არ დავუშვებთ. ჩვენი მხრიდან, მათ შორის სახელწიფო უწყებებისგან გაკეთდა განცხადებები, რომელიც ასეთ დროს უნდა გაკეთებულიყო. აქ შეფასება ერთმნიშვნელოვანია. ქართველმა ხალხმა კიდევ ერთხელ დაინახა, რა ამოძრავებს ამ დესტრუქციულ ძალას. მათ ამოძრავებთ ის, რომ დააზიანონ ქართული სახელმწიფოებრიობა და პრობლემები შეუქმნან ქართულ საზოგადოებას, ქართველ ხალხს“, – განაცხადა პრემიერ-მინისტრმა.

მსგავსი თემები