თბილისს სექტემბრიდან 11 ახალი ბაგა-ბაღი შეემატება


​ახალი სასწავლო წლიდან თბილისს, 11 ახალი საბავშვო ბაღი შეემატება. 11-დან ცხრა შენობაში, ახალი ბაგა-ბაღი განთავსდება, ხოლო ორი გაფართოვდება და აქამდე არსებულ ბაგა-ბაღებს კორპუსების სახით შეემატება. ახალი შენობების გახსნით, სკოლამდელი განათლების მიღებას დამატებით 3000-მდე აღსაზრდელი შეძლებს.

​როგორც თბილისის მერმა კახა კალაძემ დღეს, დედაქალაქის მთავრობის სხდომაზე განაცხადა, ბაგა-ბაღების შენობა-ნაგებობებისა და ინფრასტრუქტურის თვალსაზრისით პრობლემები არსებობს, რაც უნდა მოწესრიგდეს. რამდენიმე ბაღში, ექსპერტიზის დასკვნის საფუძველზე, სასწავლო პროცესი შეწყდა, რათა გაუთვალისწინებელი პრობლემა თავიდან ყოფილიყო აცილებული. ასეთი შენობების რეაბილიტაცია უახლოეს მომავალში დაიწყება.

​მისივე ინფორმაციით, იგეგმება 12 ბაგა-ბაღის რეაბილიტაცია, რომელიც ავარიულ მდგომარეობაშია. ხოლო რამდენიმე შენობას კი დემონტაჟი სჭირდება და პროექტები თავიდან უნდა განხორციელდეს.

” ეს სამუშაოებიც წელს დაიწყება. რა თქმა უნდა, ახალი ბაგა-ბაღების მშენებლობა მომავალ წელსაც გაგრძელდება. ბავშვებმა სკოლამდელი განათლება უსაფრთხო და კომფორტულ გარემოში უნდა მიიღონ, რისთვისაც თბილისის მერია მაქსიმუმს გააკეთებს”, – აცხადებს კახა კალაძე.

მსგავსი თემები