თბილისის მთავრობის სხდომაზე დღეს, დედაქალაქის გზებზე ავტობუსების მარშრუტებში ცვლილებების პროექტი განიხილეს, რაც, კალაძის შეფასებით, სერიოზულ პრობლემას წარმოადგენს კონკრეტული რაიონებისა და ქუჩებისთვის, სადაც მუდმივად არსებობს საზოგადოებრივი ტრანსპორტის პრობლემა. ზოგ ქუჩაზე კი საერთოდ არ მოძრაობს ავტობუსები, ან ხშირ შემთხვევაში ძალიან დიდია ცდის ინტერვალი.
ცვლილებების თანახმად, ამოქმედდება შვიდი ახალი მარშრუტი, შეიცვლება ხუთი მარშრუტი, 13 მარშრუტს დაემატება ავტობუსები, ხოლო სამ მარშრუტზე საშუალო ტევადობის ავტობუსები დიდი ტევადობის ავტობუსებით ჩანაცვლდება.
“როდესაც ახალ ავტობუსებს შემოვიყვანთ და პარკი შეიცვლება, ეს პრობლემა მთელი ქალაქის მასშტაბით მოგვარდება. კარგად გვესმის არსებული მდგომარეობა, პრობლემები, გამოწვევები. კარგად გვაქვს გააზრებული და ვიცით თითოეული ჩვენი ნაბიჯი, თუ რა უნდა გაკეთდეს იმისთვის, რომ არსებული მდგომარეობა შეიცვალოს”, – აცხადებს კახა კალაძე.
მისივე თქმით, სატრანსპორტო პოლიტიკა დედაქალაქის ამჟამინდელი მთავრობისთვის ერთ-ერთი უმნიშვნელოვანესი მიმართულებაა. შესაბამისად იგეგმება კონკრეტული პროექტების განხორციელება.
ავტობუსების მარშრუტების ცვლილებასთან დაკავშირებით საზოგადოების ინფორმირება, მერის მოადგილე მაია ბითაძეს დაევალა.
