რეგიონული განვითარებისა და ინფრასტრუქტურის მინისტრი მაია ცქიტიშვილი ანაკლიის განვითარების კონსორციუმს გამოუცდელობაში ადანაშაულებს.
როგორც სახელმწიფო მინისტრმა პარლამენტის ტრიბუნიდან განაცხადა, მათ არც ოპერირების გამოცდილება აქვთ და არც ახალი პორტების შექმნის.
“დღეს ამ პროექტის და კონსორციუმის გაიგივება უშუალოდ მამუკა ხაზარაძესთან ხდება. მინდა შეგახსენოთ პირველ რიგში ყველას, რომ ამ პროექტში 42%-ით არის შესული ის კომპანია, რომლის ერთ-ერთი დამფუძნებელი არის მამუკა ხაზარაძე, ხოლო მეორე დიდი წილი, ასევე, თანაბარი წილი 42%-ის ოდენობით, დღეის მდგომარეობით ფიქსირდება „კონტი ჯგუფზე”.
სწორედ იმის გამო, რომ ამ პროექტში, ამ კონსორციუმში იყო შესული „კონტი ჯგუფი”, სწორედ მისი გამოცდილება, მისი ფინანსური მდგომარეობა იყო იმ პირობის შესრულება, რაც იყო გამოცხადებული ინტერესთა გამოხატვაში. კერძოდ, ინტერესთა გამოხატვის პირობა ითვალისწინებდა იმას, რომ კომპანიას, რომელიც გაიმარჯვებდა ამ ტენდერში, უნდა ჰქონოდა სულ მცირე, 5-წლიანი გამოცდილება მსგავსი ტიპის პროექტების მშენებლობა-ოპერირებაში და ფინანსების მოზიდვაში, უნდა ჰქონოდა გამოცდილება პორტის, ერთი ან მეტი პორტის განვითარებასა და მართვაში, საზღვაო ტრანსპორტთან და მსგავს ოპერაციებთან დაკავშირებული გამოცდილება და გარდა ამისა, ყველა ის ფინანსური დოკუმენტაცია, უწყისი, თვითონ კონსორციუმის ფინანსური მდგომარეობა უნდა ყოფილიყო ისეთი სახით შედგენილი და წარმოდგენილი, რომ სახელმწიფო ყოფილიყო დარწმუნებული იმაში, რომ ფინანსური მდგომარეობა ამ კონსორციუმის იყო იმგვარი, რომელიც უზრუნველყოფდა ასეთი დონის პროექტის შესრულებას, ამ ტიპის დაფინანსების მოზიდვას და როდესაც სამთავრობო კომისიამ მიიღო გადაწყვეტილება ანაკლიის განვითარების კონსორციუმის გამარჯვებულად გამოცხადების თაობაზე, „კონტი ჯგუფი”, მათი ფინანსური მდგომარეობა, მათი გამოცდილება, მათ შორის, პორტების მშენებლობის და ოპერირების ნაწილში, იყო სწორედ ის მიზეზი, რატომაც ანაკლიის განვითარების კონსორციუმმა გაიმარჯვა ამ ტენდერში”,- განაცხადა მაია ცქიტიშვილმა.
მინისტრის განმარტებით, ანაკლიის განვითარების კონსორციუმი წარმოდგენილია მხოლოდ ქართული მენეჯმენტის სახით, რომელსაც არა აქვს ის გამოცდილება და ფინანსური მდგომარეობა, რომელმაც კონსორციუმს ამ პროცესში გაამარჯვებინა.
“სამწუხაროდ, დღეს „კონტი ჯგუფი” აქტიურად არ არის ჩართული პროცესში. დღეს, ანაკლიის განვითარების კონსორციუმი ჩვენთანაც არის წარმოდგენილი მხოლოდ მისი მენეჯმენტის, ქართული მენეჯმენტის მიერ, რაც ძალიან კარგი და დასაფასებელია, რომ ქართული ჯგუფი შეიქმნა, რომელიც შესაბამის გამოცდილებასაც იღებს. თუმცა, ჩვენ ვერ ვხედავთ სწორედ იმ გამოცდილებას, იმ ფინანსურ მდგომარეობას, რომელმაც გაამარჯვებინა კონსორციუმს ამ პროცესში და როდესაც ვსაუბრობთ ახლა იმ პრობლემებზე, რომელიც კონსორციუმს შეექმნა ამ პროექტის განხორციელებაში, ამ შემთხვევაში ის, რომ დღეს გამოუცდელი ადამიანები, ის ადამიანები, რომლებსაც აქვთ ძალიან კარგი განათლება, აქვთ უნარი პროექტების მართვის, მაგრამ ამასთან ერთად, ეს არის ჯგუფი, ის ქართული მენეჯმენტი, რომელსაც არასოდეს არ განუხორციელებია პორტის მშენებლობა, არც საქართველოში, არც მის ფარგლებს გარეთ, ეს არის ერთი პრობლემა, სწორედ იმ ზურგის და იმ პარტნიორის, იმ სტრატეგიული ინვესტორის ნაკლებობა, რომელიც ამ პროექტში უნდა ყოფილიყო.
„კონტი ჯგუფიც” იყო წარმოდგენილი, როგორც ამ პროექტის სტრატეგიული ინვესტორი, რაც ნიშნავს იმას, რომ სწორედ „კონტი ჯგუფის”, მისი ფინანსური სიძლიერით, მისი გამოცდილებით და მისი პორტფელით, იმ ყველა პროექტით, რაც ჰქონდათ შესრულებული, ეს სტრატეგიული ინვესტორი უნდა ყოფილიყო გარანტორი ბანკებისთვისაც, იმ რისკების და მათ შორის, იმის გარანტორი, რომ ამ პროექტის წარმატება იქნებოდა მიღწეული”,- განაცხადა მაია ცქიტიშვილმა პარლამენტის პლენარულ სხდომაზე.
