საქართველოს პრემიერ-მინისტრი ირაკლი ღარიბაშვილი თურქეთში, პრეზიდენტ ერდოღანის ინაუგურაციაზე დასასწრებად გაემგზავრა.
რეჯეფ თაიფ ერდოღანის ფიცის დადების ცერემონია 14:00 საათზე, თურქეთის დიდ ეროვნულ ასამბლეაში გაიმართება. შემდეგ კი, პრეზიდენტი ანიტკაბირის კომპლექსს ეწვევა, სადაც მუსტაფა ქემალ ათათურქის მავზოლეუმი მდებარეობს.
17:00 საათზე საპრეზიდენტო კომპლექსში ინაუგურაციის ცერემონია დაიწყება. ცერემონიის დასრულების შემდეგ კი პრეზიდენტი მიწვეულ სტუმრებს საზეიმო სადილზე უმასპინძლებს.
თურქეთში, ინაუგურაციის ცერემონიაზე დასასწრებად 78 ქვეყნის მაღალი დონის ოფიციალური დელეგაცია ჩადის.